ލ. އަތޮޅުގެ މުއައްސަސާތަކަށް ހުޅުވާލައިގެން މިހާރު ކުރިއަށްދާ އެމް.އެން.ޔޫ.އެސް.ޔޫ އަހުރަ ހޭންޑްބޯޅަ މުބާރާތުގެ ފިރިހެން ޑިވިޝަނުގެ ގްރޫޕް ސްޓޭޖް މެޗުތައް ނިމި، ސެމީ ފައިނަލުގައި ވާދަކުރާނެ ޓީމުތައް ކަށަވަރުވެއްޖެއެވެ.
ބުރާސްފަތިދުވަހުގެ ހަވީރު 04.00ގައި ކުޅެވުނު ފިރިހެން ޑިވިޝަނުގެ 5 ވަނަ މެޗު ލާމު ބްލޫސް އިން 4-3ގެ ނަތީޖާއަކުން ލ. ގަން ކައުންސިލްގެ މައްޗަށް ކުރި ހޯދިއިރު މި މެޗުގެ މޮޅު ކުޅުންތެރިޔަކަށް ހޮވިފައިވަނީ ލާމު ބްލޫސްގެ ޖާރޒީ ނަންބަރ 07 މުޙައްމަދު ނިމާލެވެ.
ގަން ރީޖަނަލް ހޮސްޕިޓަލާއި އިސްކަންދަރު އެއަރބޭސް ބައްދަލުކުރި މި ޑިވިޝަނުގެ ފަހު މެޗު، ބާކީ 11 މިނެޓު އޮއްވާ މޫސުން ގޯސްވުމުގެ ސަބަބުން ހުއްޓާލީއެވެ. އޭރު 5-4ގެ ނަތީޖާއަކުން ގަން ރީޖަނަލް ހޮސްޕިޓަލް ކުރީގައި އޮތްއިރު، މެޗުގެ ފަހު ނަތީޖާއަކަށް ނިންމުނީ މި ނަތީޖާއެވެ. މެޗުގެ މޮޅު ކުޅުންތެރިޔަކަށް ހޮވުނީ ގަން ރީޖަނަލް ހޮސްޕިޓަލްގެ ޖާރޒީ ނަންބަރ 01 މުޙައްމަދު މުއީނެވެ.
މި ނަތީޖާތަކާއެކު، ފިރިހެން ޑިވިޝަނުގެ ފުރަތަމަ ސެމީގައި ބައްދަލުކުރާނީ ގަން ރީޖަނަލް ހޮސްޕިޓަލާއި އިސްކަންދަރު އެއަރބޭސް އެވެ. މި މެޗުން މޮޅުވާ ޓީމަކަށް ފައިނަލްގެ ޖާގައަށް ކަށަވަރުވާނެއެވެ. އަދި ބަލިވާ ޓީމެއް ޖެހޭނީ ލާމު ބްލޫސް ޓީމާއެކު ދެވަނަ ސެމީގައި ބައްދަލުކުރާށެވެ.
މުބާރާތުގެ ބުރާސްފަތިދުވަހުގެރޭ ކުޅެން ހަމަޖެހިފައިވާ މެޗުތައް މޫސުން ތަންނުދިނުމުގެ ސަބަބުން ވަނީ ހުކުރުދުވަހުގެ ހެނދުނަށް ބަދަލުކުރެވިފައެވެ.
މުބާރާތުގެ ފިރިހެން ޑިވިޝަނުގައި ޖުމްލަ 4 ޓީމެއް ވާދަކުރާއިރު އަންހެން ޑިވިޝަނުގައި ޖުމްލަ 10 ޓީމެއް ވާދަކުރެއެވެ. މި މުބާރާތަކީ ލ. އަތޮޅުގެ މުއައްސަސާތަކަށް ހުޅުވާލައިގެން ބާއްވާ މުބާރާތަކަށްވާއިރު، މުބާރާތް ކުރިއަށްދާނީ އޮކްޓޯބަރ 01ން 06 އަށެވެ. މި މުބާރާތް ރާވާ އިންތިޒާމު ކުރަނީ ލ. ގަމު ކެމްޕަހުގައި ޤާއިމުކުރެވިފައިވާ އެމް.އެން.ޔޫ.އެސް.ޔޫގެ ގޮފި އަހުރައިންނެވެ. މިފަހަރުގެ މުބާރާތުގައި އެމް.އެން.ޔޫ.އެސް.ޔޫއިން ދަނީ މުބާރާތް އިންތިޒާމުކުރުމުގައި އަމަލީގޮތުން ހަރަކާތްތެރިވަމުންނެވެ.
މިއީ 2017 ވަނަ އަހަރުން ފެށިގެން ސިލްސިލާގޮތެއްގައި ބާއްވާ މިފަދަ 3 ވަނަ މުބާރާތެވެ. މިއަހަރުގެ މުބާރާތުގެ އެކަމޮޑޭޝާން ޕާޓްނަރ އަކީ “ނިރުވާނާ އިން ލާމު” އެވެ. ސްޕޮންސަރުންގެ ތެރޭގައި “ލ. ގަމު ކައުންސިލް”، “ލ. ގަން ޕޮލިސް ސްޓޭޝަން”، “ދިރާގު”، “އައިލެންޑާސް އެސޯސިއޭޝަން” އަދި “އަމީގޯސް ސްޕޯޓްސް ކްލަބް” ހިމެނެއެވެ. އަދި ހަމަ އެހެންމެ އެމް.އެން.ޔޫގެ ލ. ގަން ކެމްޕަހުން ދެއްވާ ފުރިހަމަ އެއްބާރުލުމާއި އެހީތެރިކަން ފާހަގަކުރެވެއެވެ.
ލިޔުނީ: އާމިނަތު ސަމާ މުހައްމަދު،
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
