ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ)ގެ ޑީން އޮފް ސްޓޫޑެންޓްސް އަލްފާޟިލާ ނާދިޔާ އަޙްމަދު އަދި ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ހިންގާ ކޮމިޓީން އެމް.އެން.ޔޫ ސްކޫލް އޮފް ނާރސިންގ ގެ މެނޭޖްމަންޓްގެ ބޭފުޅުންނާއި ބައްދަލުކުރައްވައިފިއެވެ. މި ބައްދަލުވުމުގައި އެމް.އެން.ޔޫ.އެސް.ޔޫ ހިންގާ ކޮމިޓީގެ ރައީސް އަރުޝަދު އަޝްރަފް، ނައިބު ރައީސް (ގޮފިތައް) ޢަލީ ޝަމްޢޫން، ނައިބު ރައީސް (ޢަމަލީ) ޙަސަން ޝާހު، ސެކްރެޓަރީ އަނާ އަޙްމަދު އަދި އެސިސްޓެންޓް ސެކްރެޓަރީ ޙައްވާ ނައުޝާވަނީ ބައިވެރިވެފައެވެ.
18 އޭޕްރީލް 2018ވީ ބުދަދުވަހުގެ މެންދުރުފަހު 01:30ގައި ފެށުނު މި ބައްދަލުވުން ކުރިއަށްދިޔައީ ސްކޫލް އޮފް ނާރސިންގ ހިންގަމުންދާ ޢިމާރާތުގައެވެ. މި ބައްދަލުވުން ބޭއްވުނީ ސްކޫލް އޮފް ނާރސިންގއަކީ މި އަހަރު އަލަށް އުފެދުނު ފެކަލްޓީއަކަށްވެފައި ”ނިއަރެސް“ މި ގޮތްޕަކީވެސް އަލަށް އުފެދުނު ގޮތްޕަކަށްވުމުން، މި ގޮފިން ކުރިޔަށް ގެންދިޔުމަށް ހަމަޖެހިފައިވާ ހަރަކާތްތަކާއި، ދިމާވާ ދަތިތަކާބެހޭ ގޮތުން މަޝްވަރާކުރުމަށެވެ. މި ބައްދަލުވުމުގައި ސްކޫލް އޮފް ނާރސިންގގެ ޑީން އަލްފާޟިލާ އާޝިޔާ އިބްރާހިމް ވިދާޅުވީ، މެނޭޖްމެންޓުން ދޭންޖެހޭ ފުރިހަމަ އެއްބާރުލުން ދޭނެކަމަށެވެ. އަދި ކުރިޔަށް އޮތްތަނުގައި ހުރިހާ ބެޗްތަކުގެ ދަރިވަރުންނާއިއެކު އެމް.އެން.ޔޫ.އެސް.ޔޫގެ ބައްދަލުވުމެއް ބާއްވާނެ ވާހަކަވެސް އެސް.އެންގެ ޑީން ވިދާޅުވިއެވެ.
އެމް.އެން.ޔޫ ޑީން އޮފް ސްޓޫޑެންޓްސް ނާދިޔާ މިސްގެ ވާހަކަފުޅުގައި ނިއަރެސް ގޮފީގެ ހަރަކާތްތައް އިތުރުކުރުމަށް ވަނީ ހިތްވަރުދެއްވާފައެވެ. އަދި އެސް.އެންގެ މެނޭޖްމެންޓާއި ނިއަރެސް ގޮފި ގުޅިގެން ހިންގާ ގިނަ ހަރަކާތްތަކެއް ފެންނާނެކަމަށް އުންމީދުކުރާވާހަކަވެސް އެކަމަނާ ވިދާޅުވިއެވެ.
މި ބައްދަލުވުމުގައި އެމް.އެން.ޔޫ.އެސް.ޔޫގެ ރައީސް އަރުޝަދު އަޝްރަފް ވިދާޅުވީ އަލަށް އުފެދުނު ގޮތްޕަކަށްވުމުން ދަތިތަކެއް އަންނާނެކަމަށާއި، އެހެންނަމަވެސް ޔޫނިއަން އިން ދޭންޖެހޭ ފުރިހަމަ އެއްބާރުލުން ދޭނެކަމަށެވެ.
