ދިވެހިރާއްޖޭގެ ގައުމީ ޔުނިވަރސިޓީ (އެމް.އެން.ޔޫ) ގެ އައު ޑީން އޮފް ސްޓޫޑެންޓްސް އަލްފާޟިލާ އައިޝަތު ލީލާ އަހުމަދު ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އާއި ބައްދަލުކޮށްފި އެވެ.
އެމް.އެން.ޔޫ.އެސް.ޔޫ އޮފީހުގައި 2020 ސެޕްޓެމްބަރު 13 ވަނަ ދުވަހުގެ ހެނދުނު ބޭއްވުނު މި ބައްދަލުވުމުގައި އެމް.އެން.ޔޫ.އެސް.ޔޫގެ ހިންގާ ކޮމެޓީގެ މެމްބަރުންނާއި، އެޑްވައިޒަރީ ބޯޑު މެމްބަރުންނާއި އެމް.އެން.ޔޫ ކައުންސިލްގައި ދަރިވަރުން ތަމްސީލު ކުރައްވާ މެންބަރު އަލްފާޟިލް އިބްރާހީމް ޣާނިމް ޝާހިދުގެ އިތުރުން މީޑިއާ ޓީމުގެ މެމްބަރުން ވަނީ ބައިވެރިވެފައެވެ.
މި ބައްދަލުވުމުގައި އައު ޑީން އޮފް ސްޓޫޑެންޓް ލީލާގެ ވާހަކަފުޅުގައި އެމް.އެން.ޔޫ.އެސް.ޔޫ އާއި ގައުމީ ޔުނިވަރސިޓީގެ މެނޭޖްމަންޓާއި އެކު އޮންނަ ގުޅުން އިތުރަށް ބަދަހިކުރުމަށް މަސައްކަތް ކުރާނެ ކަމަށް ވިދާޅުވެފައިވާއިރު، ދަރިވަރުންނަށް ދިމާވާ ގޮންޖެހުންތައް ހައްލުކުރަން މަސައްކަތް ކުރާނެ ކަމަށްވެސް އެކަމަނާ ވަނީ ވިދާޅުވެފައެވެ. މީގެ އިތުރުން ލީލާ މިސް ވިދާޅުވީ އެމް.އެން.ޔޫއަށް ދިމާވެފައިވާ އެންމެ ބޮޑު ގޮންޖެހުމަކީ ދަރިވަރުން ނުލިބުމުގެ މައްސަލަ ކަމަށާއި، އެ މައްސަލަ ހައްލު ކުރުމަށް ޔޫނިއަންއާއިއެކު ގިނަ މަސައްކަތްތަކެއް ކުރަން ޖެހިފައިވާ ކަމަށެވެ.
ޔޫނިއަންއިން މިހާރު ކުރަމުން ގެންދާ މަސައްކަތްތަކަށް ތައުރީފު ކުރައްވަމުން ލީލާ ވިދާޅުވީ އިސްވާރުން ނެރެދިނުމުގައި ޔޫނިއަނުން ކުރަމުން ގެންދާ މަސައްކަތަކީ އަގު ނުކުރެވޭނެ މަސައްކަތެއް ކަމަށެވެ.
މީގެ އިތުރުން ލީލާ ވަނީ ޔޫނިއަންއާއިއެކު އޮންނަ ގުޅުން ބަދަހިކުރުމަށް ޔޫނިއަންގެ ހިންގާ ކޮމެޓީ އާއިއެކު ކޮންމެ މަހަކު ދެ ފަހަރު ބައްދަލުކުރައްވާނެ ކަމަށް ވިދާޅުވެފައެވެ.
މި ބައްދަލުވުމުގައި ޔޫނިއަންގެ ފަރާތުން ވަނީ ޔޫނިއަންގެ މަސައްކަތްތަކުގެ އެންމެ ފަހުގެ އަދާހަމަ ހިއްސާ ކުރައްވާފައެވެ. އަދި ކުރިޔަށް އޮތް ތަނުގައި ޔޫނިއަން މަސައްކަތްތައް ރޭވިފައިވާ ގޮތް ވެސް ވަނީ ލީލާ މިސް އާއި ހިއްސާ ކުރައްވާފައެވެ.
ލީލާ މިސް އަކީ އެމް.އެން.ޔޫ ގެ ޑީން އޮފް ސްޓޫޑެންޓްގެ މަގާމާއި ހަވާލުވި ދެވަނަ ބޭފުޅާއެވެ. ކުރިން އެ މަގާމުގައި ހުންނެވީ އަލްފާޟިލާ ނާދިޔާ އަހުމަދެވެ.
ލިޔުނީ: ޢަބްދުﷲ އަތޫފް އާތިފް،
އެމް.އެން.ޔޫ.އެސް.ޔޫ މީޑިއާ
