މޯލްޑިވްސް ޕޮލިސް ސާރވިސް އާއި މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަމަންޓް ގުޅިގެން ބާއްވާ ”ލާމަސީލު ޒުވާނާ“ ކޭމްޕުގައި ބައިވެރިވުމަށް ދިވެހިރާއްޖޭގެ ޤައުމީ ޔުނިވަރސިޓީގެ 20 ދަރިވަރުން ދ. ވާނީ އަށް ދަތުރުކޮށްފިއެވެ.
”ލާމަސީލު ޒުވާނާ“ ކޭމްޕަކީ މުޅި ރާއްޖެއަށް ހުޅުވާލައިގެން ބާއްވާ ކޭމްޕަކަށްވާއިރު، ރާއްޖޭގެ އެކި ކަންކޮޅުތަކުން 18 އަހަރާއި 25 އަހަރާ ދެމެދުގެ 100 ޒުވާނަކު މި ކޭމްޕުގައި ބައިވެރިވެއެވެ. މި ޕްރޮގްރާމުގެ ދަށުން ބައިވެރިންނަށް ތަފާތު ހުނަރުތައް ދަސްކޮށްދިނުމަށް ހަމަޖެހިފައިވާއިރު، މީގެ ތެރޭގައި އިސްލާމީ ރިވެތި އުސޫލުގެ ތެރެއިން ދިރިއުޅުން ކުރިއަށް ގެންދިއުމާއި، ދުޅަހެޔޮ ސިއްހަތެއްގައި ދެމިތިބުމަށް ދިރިއުޅުމުގެ ވައްޓަފާޅިއަށް ބަދަލުގެނައުމާއި އަދި ދިރިއުޅުމުގައި ދިމާވާ ތަފާތު ގޮންޖެހުންތަކާ ކުރިމަތިލާނެ ގޮތްތައް ހިމެނެއެވެ.
މީގެ އިތުރުން ވަޒީފާގެ މާހައުލަށް ޒުވާނުން އަހުލުވެރިކުރުވުމަށް ތަމްރީނުދީ، ލާމަސީލު ޒުވާނަކަށް ވެވޭނެ ގޮތްތައް ދަސްކޮށްދެވޭނެއެވެ. މި ކޭމްޕު ކުރިއަށްދާނީ 2020 ޖެނުއަރީ 12ން 25ށް ދ. ވާނީގައެވެ.
