ހުރިހާ ބަހުސަކުން މޮޅުވެ، އެމް.އެން.ޔޫ.އެސް.ޔޫ ޓީމު ސެމީއަށް

ހިނގަމުންމިދާ ރަމަޟާންމަހު ދައުލަތުގެ މީޑިއާ ކުންފުނި ޕަބްލިކް ސަރވިސް މީޑިއާ (ޕީ.އެސް.އެމް)ގެ ފަރާތުން އިންތިޒާމުކޮށްގެން ބާއްވާ ”ޕީ.އެސް.އެމް ފަހިދޫ ބަހުސް މުބާރާތް 1439″ގެ ގްރޫޕް ސްޓޭޖްގެ 3 ބަހުސުންވެސް މޮޅުވެ، ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ޓީމު މުބާރާތުގެ ސެމީ ފައިނަލަށް ދަތުރުކޮށްފިއެވެ.

ކޮންމެ ޓީމެއްގައިވެސް ޖުމްލަ 5 މެންބަރުން ހިމެނޭއިރު، ކޮންމެ ބަހުސަކަށްވެސް އަރާނީ 3 މެންބަރެކެވެ. އެމް.އެން.ޔޫ.އެސް.ޔޫގެ ޓީމުގައި ހިމެނޭ މެންބަރުންނަކީ:

1. އަލްއުސްތާޛް ޢަލީ ރަޝީދު (އެމް.އެން.ޔޫ ކައުންސިލްގައި ދަރިވަރުން ތަމްޞީލުކުރާ މެންބަރު އަދި އެމް.އެން.ޔޫ.އެސް.ޔޫ ޝަރަފުވެރިކަމާއި ޢިއްޒަތްތެރިކަމުގެ ނިޝާނުގެ ވެރިޔާ)
2. އަލްފާޟިލް ޢަލީ ޢަމީރު (އެމް.އެން.ޔޫ.އެސް.ޔޫ އެޑްވައިޒަރީ ބޯޑުގެ މެންބަރ)
3. އަލްއުސްތާޛް މުޙައްމަދު ޔާމީން އިބްރާހީމް
4. އަލްއުސްތާޛް މުޙައްމަދު ޖައުޝަން ޝަރީފް
5. އަލްފާޟިލާ އަމްރާ އަޙްމަދު

މެނޭޖަރ: އަލްފާޟިލް ޙުސައިން ޢަލީ (އެމް.އެން.ޔޫ.އެސް.ޔޫ އެޑްވައިޒަރީ ބޯޑުގެ މެންބަރ)

މުބާރާތުގައި 4 ޓީމަކުން ބައިވެރިވެފައިވާއިރު، ގްރޫޕް ސްޓޭޖުގައި ކޮންމެ ޓީމަކުންވެސް އަނެއް 3 ޓީމާއި ވާދަކުރިއެވެ. އަދި މުބާރާތުގެ ސެމީ ފައިނަލަށް ދަނީ ގްރޫޕް ސްޓޭޖުގެ ހުރިހާ ބަހުސެއް ނިމޭއިރު އެންމެ ގިނައިން ޕޮއިންޓް ހޯދާ 3 ޓީމެވެ. މިގޮތުން އެމް.އެން.ޔޫ.އެސް.ޔޫ އިން އެންމެ ފުރަތަމަ ވާދަކޮށްފައިވަނީ މިނިސްޓްރީ އޮފް ޖެންޑަރ އެންޑް ފެމިލީގެ ޓީމު ”ބަދަހި“ އާއެވެ. މި ބަހުސް އެމް.އެން.ޔޫ.އެސް.ޔޫ އިން ކާމިޔާބުކުރީ 773-475ގެ ފަސޭހަ ނަތީޖާއަކުންނެވެ. އެމް.އެން.ޔޫ.އެސް.ޔޫގެ ޓީމުގައި އެދުވަހު ބަހުސްކޮށްފައިވަނީ އަލްއުސްތާޛް ޢަލީ ރަޝީދާއި، އަލްއުސްތާޛް މުޙައްމަދު ޔާމީން އިބްރާހީމްގެ އިތުރުން އަލްފާޟިލް ޢަލީ އަމީރެވެ.

– 3 ވަނަ ބަހުސްގެ ތެރެއިން

މުބާރާތުގައި އެމް.އެން.ޔޫ.އެސް.ޔޫ އިން ވާދަކުރި 2 ވަނަ މެޗުގައި ބައްދަލުކުރީ ”ދިވެސް“އާ ކަމަށްވާއިރު، އެ ބަހުސް އެމް.އެން.ޔޫ.އެސް.ޔޫއިން ކާމިޔާބުކުރީ 728-635ގެ ނަތީޖާއަކުންނެވެ. މި ބަހުސަށް އެމް.އެން.ޔޫ.އެސް.ޔޫގެ ޓީމަށް އަރާފައިވަނީ އަލްއުސްތާޛް ޢަލީ ރަޝީދާއި އަލްއުސްތާޛް މުޙައްމަދު ޔާމީން އިބްރާހީމްގެ އިތުރުން އަލްއުސްތާޛް މުޙައްމަދު ޖައުޝަން ޝަރީފެވެ.

ގްރޫޕް ސްޓޭޖްގެ ފަހު މެޗުގައި މޯލްޑިވްސް ނޭޝަނަލް ޑިފެންސް ފޯސް (އެމް.އެން.ޑީ.އެފް)ގެ ކޮލެޖް އޮފް ޑިފެންސް އެންޑް ސެކިއުރިޓީ ސްޓަޑީޒް (ސީ.ޑީ.އެސް.އެސް)ގެ މައްޗަށް ކުރިހޯދާފައިވަނީ 746-643ގެ ނަތީޖާއަކުންނެވެ. މި ބަހުސަށް އަރާފައިވަނީ އަލްއުސްތާޛް މުޙައްމަދު ޔާމީން އިބްރާހީމް، އަލްފާޟިލް ޢަލީ އަމީރު އަދި އަލްފާޟިލާ އަމްރާ އަޙްމަދެވެ.

އެމް.އެން.ޔޫ.އެސް.ޔޫގެ ބަހުސްތައް ބައްލަވާލަން އެމް.އެން.ޔޫގެ ޑެޕިއުޓީ ވައިސް ޗާންސެލަރ އަލްފާޟިލާ ޢާއިޝަތު ޝާހީން އަދި ޑީން އޮފް ސްޓޫޑެންޓްސް އަލްފާޟިލާ ނާދިޔާ އަޙްމަދު ވަޑައިގެންފައިވާކަން މި ފުރުޞަތުގައި އުފަލާއެކު ފާހަގަކޮށްލަމެވެ.

މުބާރާތުގެ ސެމީ ފައިނަލް މެޗުތަކުގެ ތަފްޞީލު އެމް.އެން.ޔޫ.އެސް.ޔޫގެ ވެބްސައިޓް އަދި ފޭސްބުކް ޕޭޖު މެދުވެރިކޮށް ގެނެސްދެވޭނެއެވެ. އަދި ބަހުސްތަކުގެ ބައެއް މަންޒަރުތައް އެމް.އެން.ޔޫ.އެސް.ޔޫގެ ޔޫޓިއުބް ޗެނަލުން އަވަސް މުސްތަޤްބަލެއްގައި ފެންނާނެ ވާހަކަ ދަންނަވަމެވެ.