ޔުނިވަރސިޓީ، ކޮލެޖް، އަދި ހައިސްކޫލްތަކުގެ މެދުގައި ބާއްވާ އެންމެ ބޮޑު ފުޓްސަލް މުބާރާތް، އެމް.ޑަބްލިއު.އެސް.ސީ އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2019 ހުޅުވުމުގެ ރަސްމިއްޔާތު ރޭ ބާއްވައިފިއެވެ.
މިރަސްމިއްޔާތު ކުރިއަށްދިޔައީ މުބާރާތުގެ މެޗުތައް ކުޅެމުންދާ އެކުވެނި ވެލިދަނޑުގައެވެ. ރަސްމިއްޔާތު ޝަރަފްވެރި ކޮށްދެއްވީ މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް، އަޙްމަދު މަޙްލޫފެވެ. ފުޓްސަލް ބޭއްވުމުގައި ދިމާވާ ދަތިތަކާ ގުޅޭގޮތުން އެމް.އެން.ޔޫ އެސް.ޔޫގެ އެޑްވައިޒަރީ ބޯޑުގެ މެންބަރު އަރުޝަދު އަޝްރަފް ފާހަގަކުރި މައްސަލަތަކާ ގުޅޭގޮތުން މިނިސްޓަރ ވަނީ ރަސްމިއްޔާތުގައި ވާހަކަފުޅު ދައްކަވާފައެވެ. އެގޮތުން ރާއްޖޭގައި ޙަޤީޤީ ފުޓްސަލް ކުޅޭ ދަނޑެއް ނެތްކަމަށާއި، އެކުވެނި ވެލިދަނޑުގައި ޓާފް އެޅުމުގެ ބަދަލުގައި އިންޑޯ ފުޓްސަލް ސްޓޭޑިއަމްއެއް ތަރައްޤީ ކޮށްދެއްވާނެކަމަށް ވިދާޅުވިއެވެ. އަދި މާލޭގައި ފުޓްސަލް ކުޅޭ ޒުވާނުންނަށް، ޓާފް ދަނޑު ހޯދުމަށްޓަކައި ފައިސާ ދޭންޖެހޭ މައްސަލައަށް ހައްލު ހޯދައިދިނުމުގެ ގޮތުން ތިން ސަރަޙައްދެއްގައި ޓާފް ދަނޑު އެޅުމުގެ މަސައްކަތް ކުރެވެމުންދާކަމަށް ވިދާޅުވިއެވެ.
”ޙަޤީގަތުގަވެސް އަޅުގަނޑުމެން ބޭނުންވަނީ މިތަނަކީ ޙަޤީޤީ ފުޓްސަލް ކުޅޭ ތަނެއް ގޮތުގަ ތަރައްޤީ ކުރެވިގެން ދިއުން. އިރާދަކުރެއްވިއްޔާ އަޅުގަނޑަށް ކޮންދުވަހަކުންކަން ބުނާކަށް ނޭނގެ އެކަމަކު މިތަނަކީ ހަމަ މި ސަރަޙައްދަކީ އިރާދަކުރެއްވިއްޔާ ސީދާ ރަސްމީ ފުޓްސަލް ކުޅޭ ތަނެއް ގޮތުގަ އަޅުގަނޑުމެން ތަރައްޤީ ކޮށްދޭނަން“ .
މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް، އަޙްމަދު މަޙްލޫފް
ރަސްމިއްޔާތަށްފަހު މުބާރާތުގެ ގްރޫޕްސްޓޭޖްގެ ހަތަރު މެޗެއް ކުޅުނެވެ. އަންހެން ޑިވިޜަންގެ ގްރޫޕް އޭއިން ވާދަކުރީ އެފް.އެޗް.ޓީ.އެސް އާއި ފްލިސްގެ ޓީމެވެ. މިމެޗް 0-1ގެ ނަތީޖާއަކުން ކާމިޔާބުކުރީ އެފް.އެލް.އައި.އެސްގެ ޓީމެވެ. މޮޅުކުޅުންތެރިޔަކަށް ހޮވުނީ އެފް.އެލް.އައި.އެސްގެ ޖާރޒީ ނަންބަރު 13، ޝައުފާ އިބްރާހީމެވެ.
ފިރިހެން ޑިވިޜަންގެ ގްރޫޕް އޭއިން ބައްދަލުކުރީ ސައިރިކްސް ކޮލެޖާއި އެފް.އޭގެ ޓީމެވެ. ސައިރިކްސް ކޮލެޖްގެ ފަރާތުން ގިނަ ލަނޑުތަކެއް ފެނިގެން ދިޔަ މެޗު އެޓީމު ކާމިޔާބުކުރީ 12-2ގެ ތަފާތުބޮޑު ނަތީޖާއަކުންނެވެ. މޮޅު ކުޅުންތެރިއަކަށް ހޮވުނީ ސައިރިކްސް ކޮލެޖްގެ ޖާރޒީ ނަންބަރު 11، އިސްމާޢީލް މަޚްދޫމެވެ.
ފިރިހެން ޑިވިޜަންގެ ގްރޫޕް ބީއިން ވާދަކުރީ ކްލިކް ކޮލެޖާއި އެފް.އީ.އެސް.ޓީއެވެ. މިމެޗު 0-1ގެ ނަތީޖާއަކުން ކާމިޔާބުކުރީ ކްލިކް ކޮލެޖެވެ. މޮޅުކުޅުންތެރިއަކަށް ހޮވުނީ ކްލިކް ކޮލެޖްގެ ޖާރޒީ ނަންބަރު 2، އިބްރާހީމް ޙަސީބެވެ.
ފިރިހެން ޑިވިޜަންގެ ގްރޫޕް ސީއިން ވާދަކުރީ ވިލާ ކޮލެޖާއި މިދިޔަ އަހަރުގެ ޗެމްޕިއަން މެޕްސް ކޮލެޖެވެ. ފޯރިގަދަ ކުޅުމެއް ފެނިގެންދިޔަ މެޗު 2-5ގެ ނަތީޖާއަކުން ކާމިޔާބުކުރީ މެޕްސް ކޮލެޖެވެ. މެޕްސް ކޮލެޖްގެ 5 ލަނޑު ފަހު ހާފުގައި ކާމިޔާބުކުރީ ފުރަތަމަ ހާފުގައި ވިލާއިން 1 ލަނޑުގެ ލީޑެއް ނަގާފައި އޮއްވައެވެ. އެންމެ މޮޅު ކުޅުންތެރިއަކަށް ހޮވުނީ މެޕްސް ކޮލެޖްގެ ޖާރޒީ ނަންބަރު 11، މުޙައްމަދު ރިޝްފާނެވެ.
އެމް.ޑަބްލިއު.އެސް.ސީ އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2019ގެ ޓައިޓްލް ސްޕޮންސަރަކީ މާލޭ ވޯޓަރ އެންޑް ސްވަރޭޖް ކޮމްޕެނީ (އެމް.ޑަބްލިއު.އެސް.ސީ)އެވެ. މި މުބާރާތުގެ ޕްރިންޓިންގ ޕާޓްނަރަކީ އެމް 7އެވެ. ސްޕޮންސަރުންނަކީ ދިރާގު އަދި ވިޒިޓް ލާމްއެވެ. މީޑިއާ ޕާޓްނަރަކީ ޕީ.އެސް.އެމް ސްޕޯޓްސްއެވެ.
އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ޘާނަވީ ދާއިރާގައި ބާއްވާ އެންމެބޮޑު ކުޅިވަރު ޙަރަކާތެވެ. މި މުބާރާތް ރާވައި އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)އިންނެވެ. މި އަހަރު މި ބާއްވަނީ މީގެ 7ވަނަ މުބާރާތެވެ. 2013އިން ފެށިގެން މެދުކެނޑުމެއްނެތި މި މުބާރާތް އަންނަނީ ބާއްވަމުންނެވެ. މި މުބާރާތް ހުޅުވާލާފައިވަނީ އެމް.އެން.ޔޫގެ ފެކަލްޓީތަކާއި ދިވެހިރާއްޖޭގެ އެހެނިހެން ކޮލެޖުތަކަށެވެ. މުބާރާތުގައި ފިރިހެން ޑިވިޜަނާއި އަންހެން ޑިވިޜަން ހިމެނެއެވެ. މުބާރާރުގައި އަންހެން ޑިވިޜަން އެންމެ ފުރަތަމަ ހިމެނީ 2018ވަނަ އަހަރުއެވެ.
ލިޔުނީ: ޝީޒާ މުޙައްމަދު
އެމް.އެން.ޔޫ އެސް.ޔޫ މީޑިއާ
