އެފްއެޗްޓީއެސް ވެލްކަމް ނައިޓް ކާމިޔާބުކަމާއެކު ނިންމައިލައިފިއެވެ.
ކޮންމެ އަހަރަކު ޝެޓްސް އިން ބާއްވާ ”ވެލްކަމް ނައިޓް“ އަކީ އެފް.އެޗް.ޓީއެސް އަށް އަލަށް ވަންނަ ދަރިވަރުންނަށް ހާއްސަކޮށްގެން ކުރިޔަށްގެންދާ ހަރަކާތެކެވެ.
15 ފެބްރުއަރީ 2020 ވީ ހޮނިހިރުދުވަހު ބޭއްވިގެންދިޔަ މިހަރާކާތުގައި ޖެނުއަރީ އިންޓޭކަށް ގުޅުނު ކުދިންގެ ތެރެއިން 50 އަށް ވުރެން ގިނަ ކުދިން ބައިވެރިވެގެންދިޔައެވެ. ހަމައެޔާ އެކު އެމް.އެން.ޔޫ.އެސް.ޔޫ ގެ ހިންގާ ކޮމިޓީއާއި، ޝެޓްސްގެ އެކްސްކޯގެ މެމްބަރުން ވެސް މި ހަރަކާތުގައި ބައިވެރިވެފާއި ވެއެވެ.
ގިނަ ކުޅިވަރުތަކެއްގެ އިތުރުން މުނިފޫހިފިލުވުމުގެ ހަރަކާތްތައް ހުށަހަޅާދިނީ އެފް.އެޗް.ޓީ.އެސްގެ ދަރިވަރުން ކަމުގައިވާ މުޙައްމަދު ޙުސެއިން އާއި ފާތިމަތު އުލްޔާ ޝަފީގް އެވެ. އަދި ޝެޓްސްގެ ރައީސް މިކާއިލް ހަލީމް އާއި ނައީބު ރައީސް ޙުސެއިން ޒައީދު ވަނީ އަލަށް ގުޅުނު ދަރިވަރުންނާ މުޙާތަބުކޮށް ވާހަކަދައްކާފައެވެ. އަދި ހަމަ އެޔާއެކު އެމް.އެން.ޔޫ.އެސް.ޔޫގެ ރައީސް ޢަލީ ޝައްމޫން ވެސް މި ހަފްލާގައި ދަރިވަރުންނާ ބައްދަލުކޮށް މުޙާތަބު ކުރެއްވިއެވެ. މި ހަފްލާގައި މުޙާތަބު ކުރައްވަމުން ރައީސް ޝައްމޫން ވަނީ ޝެޓްސްއިން ”ސިންގަލްޔޫސް ޕުލާސްޓިކާއި ދެކޮޅަށް“ ކުރަމުންދާ މަސައްކަތް ފާހަގަކޮށް އެކަމަށް ތަޢްރީފުކުރަށްވާފައެވެ. އަދި ދަރިވަރުންގެ އަޚުލާގީ މިންގަނޑު ބަހައްޓަންޖެހޭ ގޮތާއި ގުޅޭގޮތުން ދަރިވަރުންނަށް އިރުޝާދު ދެއްވާފައިވެއެވެ.
އަލަށްގުޅުނު ދަރިވަރުންނަށް ހާއްސައްކޮށްގެން ބޭއްވުނު މި ހަރަކާތުގައި ކުޅުނު ކުޅިވަރުތަކުން ވަނަވަނަ ޙާސިލް ކުރި ދަރިވަރުންނަށް އިނާމު ދެވިފައިވެއެވެ. އަދި މި ހަރަކާތް ނިންމާލެވިފައި ވަނީ އެފް.އެޗް.ޓީ.އެސް ދަރިވަރުންގެ ނެށުމަކާއި، ފޮޓޯ ނެގުމުންނެވެ.
ލިޔުނީ: އަރުޙަމް އަޙްމަދު ޢަބްދުﷲ
އެފް.އެޗް.ޓީ.އެސް ގެ ދަރިވަރު
