ފެކަލްޓީ އޮފް ހެލްތު ސައިންސަސް އިން ފެކަލްޓީ އޮފް އެޑިއުކޭޝަންގެ މައްޗަށް ކުރި ހޯދައި މުބާރާތުގެ ފުރަތަމަ މެޗު ކާމިޔާބުކޮށްފިއެވެ.
އެމް.އެން.ޔޫ.އެސް.ޔޫއިން އިންތިޒާމު ކޮށްގެން ކުރިޔަށްގެންދާ އެމް.އެން.ޔޫ.އެސް.ޔޫ އިންޓަރ ފެކަލްޓީ ނެޓްބޯޅަ މުބާރާތް 2019ގެ މެޗުތައް މިއަދު ހެނދުނު 7:00ގައި ވަނީ ފަށައިފައެވެ.
އެގޮތުން މިއަދު ހެނދުނު ދެމެއްޗެއް ކުޅެފައިވާއިރު މުބާރާތުގެ ފުރަތަމަ މެޗުގައި ބައްދަލުކުރީ ފެކަލްޓީ އޮފް ހެލްތު ސައިންސަސް އަދި ފެކަލްޓީ އޮފް އެޑިއުކޭޝަން އެވެ. ވާދަވެރި ކުޅުމަކަށްފަހު މެޗު ނިމިގެން ދިޔައީ 12-15 ޕޮއިންޓުން ފެކަލްޓީ އޮފް ހެލްތު ސައިންސަސް އިން މެޗު ކާމިޔާބު ކޮށްގެނެވެ. މިމެޗުގެ އެންމެ މޮޅު ކުޅުންތެރިއަކަށް ހޮވިގެންދިޔައީ އެފް.އެޗް.އެސްގެ ޒިޔާދާ މުޙައްމަދެވެ.
ފެކަލްޓީއޮފް ލޯ އެންޑް އިސްލާމިކް ސްޓަޑީޒް އަދި ސްކޫލް އޮފް މެޑިސިން ބައްދަލުކުރި މެޗުގައި ފެކަލްޓީއޮފް ލޯ އެންޑް އިސްލާމިކް ސްޓަޑީޒް އިން 45 ޕޮއިންޓް ކާމިޔާބު ކޮށްފައިވާއިރު ސްކޫލް އޮފް މެޑިސިންއަށްވަނީ އެއްވެސް ޕޮއިންޓެއް ކާމިޔާބުކުރެވޭ ގޮތްނުވެފައެވެ. މިނަތީޖާއާއެކު މެޗު ކާމިޔާބުކުރީ ފެކަލްޓީއޮފް ލޯ އެންޑް އިސްލާމިކް ސްޓަޑީޒްއެވެ. މިމެޗުގެ އެންމެ މޮޅު ކުޅުންތެރިއަކަށް ހޮވުނީ އެފް.އެލް.އައި.އެސް އަށް އެންމެ ގިނަ ޕޮއިންޓް ކާމިޔާބު ކޮށްދިން ކުޅުންތެރިޔާ ފާތިމަތު ސަނާއެވެ.
މުބާރާތުގެ ފުރަތަމަ ދުވަހުގެ މެޗުތައް ހަވީރު އަދި ރޭގަނޑުވެސް ކުޅުމަށްވަނީ ހަމަޖެހިފައެވެ. ހަވީރުގެ މެޗުތަށް 16:00 ގައި ފަށަން ހަމަޖެހިފައިވާއިރު ރޭގަނޑު ކުޅެން ހަމަޖެހިފައިވާ މެޗުތައް ފަށާނީ 20:00ގައެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ނެޓްބޯޅަ މުބާރާތް 2019 އަކީ އެމް.އެން.ޔޫ.އެސް.ޔޫގެ ފަރާތުން ބާއްވާ މިފަދަ ތިންވަނަ މުބާރާތެވެ. މިގޮތުން ފުރަތަމަ މުބާރާތް ބޭއްވުނީ 2015ގައި ކަމަށްވާއިރު، އެ އަހަރުގެ ތަށި އުފުލާލީ އެމް.އެން.ޔޫ ބިޒްނަސް ސްކޫލުންނެވެ. 2016 ވަނަ އަހަރު ބޭއްވުނު 2 ވަނަ މުބާރާތުގެ ޗެމްޕިއަންކަން ފެކަލްޓީ އޮފް ލޯ އެންޑް އިސްލާމިކް ސްޓަޑީޒް އިން ހޯދިއިރު، 2017 އަދި 2018ވަނަ އަހަރު މި މުބާރާތް ބާއްވާފައެއް ނުވެއެވެ. މި މުބާރާތަކީ އެމް.އެން.ޔޫގެ ފެކަލްޓީ/ސެންޓަރތަކަށް ހުޅުވާލައިގެން ބާއްވާ މުބާރާތަކަށްވާއިރު، މި މުބާރާތުގައި ޖުމްލަ 10 ޓީމު މިފަހަރު ވާދަކުރެއެވެ. މި 10 ޓީމާއެކު، އެމް.އެން.ޔޫ.އެސް.ޔޫގެ ގޮފި އުފެދިފައިވާ ހުރިހާ ފެކަލްޓީ/ސެންޓަރތަކެއް މި މުބާރާތުގައި ތަމްސީލުކުރާއިރު، މި މުބާރާތްވެގެންދާނީ ތާރީޚީ މުބާރާތަކަށެވެ.
ލިޔުނީ: އާމިނަތު ޝަމާ މުހައްމަދު،
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
