ކުރިޔަށް މިދާ އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތް 2020 ގެ ތިންވަނަ ދުވަހުގައި ކުޅުނު އަންހެން ޑިވިޝަނުގެ މެޗުގައި ޗެމްޕިއަން ބީ.އެސް އަތުން ހޯދި މޮޅާއެކު އެސް.އެންއިން ތާވަލްގެ އެއްވަނައަށް ޖެހިލައިފިއެވެ.
އަންގާރަ ދުވަހުގެ ރޭ 20:00ގައި ފެށި އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތުގެ ތިންވަނަ ދުވަހުގެ ފުރަތަމަ މެޗުގައި ބައްދަލުކުރީ ގްރޫޕް ބީ އިން އެފް.އެޗް.އެސް އަދި އެފް.އެޗް.ޓީ.އެސްއެވެ. މިމެޗު އެފް.އެޗް.އެސްއިން ވަނީ ފަސޭހަކަމާއެކު ދެ ސެޓުން މެޗު ކާމިޔާބުކޮށްފައެވެ. އެފް.އެޗް.އެސް އިން ސެޓުތައް ގެންދިޔައީ، 25-13 އަދި 25-11 އިންނެވެ. މިމެޗުގެ އެންމެ މޮޅު ކުޅުންތެރިއަކަށް ހޮވުނީ އެފް.އެޗް.އެސްގެ ޖާޒީ ނަންބަރު 16، އަފާފް ނިޒާމެވެ.
ދެވަނަ މެޗުގައި ގްރޫޕް އޭގެ އެސް.އެން އަދި އެންމެ ފަހުގެ ޗެމްޕިއަން އެމް.އެން.ޔޫ ބީ.އެސްގެ ވާދަވެރި ކުރިމަތިލުން އެސް.އެންއިން ވަނީ ދެ ސެޓު އެއް ސެޓުން ކާމިޔާބުކޮށްފައެވެ. ފުރަތަމަ ސެޓު އެސް.އެންއިން 25-19 އިން ކާމިޔާބުކޮށްފައިވަނިކޮށް، ދެވަނަ ސެޓު ބީއެސް އިން ވަނީ ވާދަވެރި ކުޅުމަކަށްފަހު، 25-23 ގެންގޮސްފައެވެ. ނަމަވެސް ތިންވަނަ ސެޓުން އެމް.އެން.ޔޫ ބީ.އެސް ބަލިވީ 15-8 އިންނެވެ. އެސް.އެން އިން ވަނީ މުބާރާތުގައި ކުޅުނު ފުރަތަމަ މެޗުވެސް ސީދާ ދެ ސެޓުން ކާމިޔާބުކޮށްފައެވެ. މިމެޗުގެ އެންމެ މޮޅު ކުޅުންތެރިއަކީ އެސް.އެންގެ ޖާޒީ ނަންބަރު 10، އާއިޝަތު ޒުނީތާއެވެ.
އަންގާރަ ދުވަހުގެރޭ ކުޅުނު އެންމެ ފަހު މެޗުގައި ބައްދަލުކުރީ ގްރޫޕް އޭއިން އެފް.އީ އަދި އެފް.އެލް.އައި.އެސްއެވެ. އެފް.އެލް.އައި.އެސްއިން ވަނީ ސީދާ ދެސެޓު ގެންގޮސްގެން މެޗު ކާމިޔާބުކޮށްފައެވެ. އެފް.އެލް.އައި.އެސްއިން ސެޓުތައް ގެންދިޔައީ 25-16 އަދި 25-21އިންނެވެ. މިމެޗުގެ އެންމެ މޮޅުކުޅުންތެރިއަކަށް ހޮވުނީ އެފް.އެލް.އައި.އެސްގެ ޖާޒީ ނަންބަރު 8، އާމިނަތު ނަހުޝާއެވެ.
މުބާރާތުގެ ހަތަރުވަނަ ދުވަހުގެ މެޗުތައް 04 މާރިޗުވާ ބުދަ ދުވަހުގެ ރޭ 20:00ގައި ފަށަން ހަމަޖެހިފައިވާއިރު، ބުދަ ދުވަހުގެރޭގެ މެޗުތަކުގައި ކުޅޭނީ ފިރިހެން ޑިވިޝަނުގެ ޓީމުތަކެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ 2020 އަކީ އެމް.އެން.ޔޫ.އެސް.ޔޫގެ ފަރާތުން ބާއްވާ މިފަދަ 5ވަނަ މުބާރާތެވެ. މިގޮތުން މިމުބާރާތް ފުރަތަމަ ބޭއްވުނީ 2016 ގައެވެ. އަދި މި މުބާރާތަކީ އެމް.އެން.ޔޫ.އެސް.ޔޫގެ ފަރާތުން އިންތިޒާމް ކޮށްގެން ބާއްވާ ދެވަނައަށް އެންމެ ބޮޑު މުބާރާތެވެ. އެމް.އެން.ޔޫގެ ފެކަލްޓީ/ސެންޓަރ ތަކަށް ހުޅުވާލައިގެން ބާއްވާ މިމުބާރާތުގައި މިފަހަރު އަންހެން ޑިވިޝަނުގައި 8 ޓީމު އަދި ފިރިހެން ޑިވިޝަނުގައި 7 ޓީމާއެކު ޖުމްލަ 15 ޓީމު ވާދަ ކުރެއެވެ. މިމުބާރާތުގެ ސްޕޮންސަރކޮށްފައިވަނީ ފިއުލް އެކްސްޕްރެސް މޯލްޑިވްސްއިންނެވެ. އަދި އޮންލައިން މީޑިއާ ޕާރޓްނަރ އަކީ ރާއްޖެ އެމް.ވީއެވެ.
ލިޔުނީ: ޝަމާ މުޙައްމަދު،
އެމް.އެން.ޔޫ.އެސް.ޔޫ މީޑިއާ
