ދިވެހިރާއްޖޭގެ ޤައުމީ ޔުނިވަރސިޓީއަށް އަލަށް ގުޅޭ ދަރިވަރުންނަށް އަމާޒުކޮށްގެން ކޮންމެ ސެމިސްޓަރއަކު ބާއްވާ ”ފްރެޝާސް ނައިޓް“ މިއަހަރުގެ ފުރަތަމަ ސެމިސްޓާރގައިވެސް ބާއްވައިފިއެވެ.
މި ހަރަކާތް ބާއްވާފައި ވަނީ 2020 ވަނަ އަހަރުގެ ފެބުރުވަރީ 6 ވީ ބުރާސްފަތި ދުވަހުގެރޭ އެފް.އީ ބެންޗް އޭރިއާގައެވެ. ޔުނިވަރސިޓީއަށް އަލަށް ގުޅުނު ދަރިވަރުންނަށް މަރުހަބާ ދަންނަވާފައިވަނީ އެމް.އެން.ޔޫ.އެސް.ޔޫގެ ހަޒާންދާރު ޙުސައިން ޒައިދެވެ. އަދި މި ޙަރަކާތް ފެށުމުގެ ގޮތުން އެމް.އެން.ޔޫގެ ޑީން އޮފް ސްޓޫޑެންޓްސް އަލްފާޟިލާ ނާދިޔާ އަހްމަދު ވާހަކަފުޅު ދައްކަވާފައިވެއެވެ.
”އެމް.އެން.ޔޫ.އެސް.ޔޫ ލީޑަރސް ގްރޫޕަކީ ދަރިވަރުންގެ ކުރިއެރުމާއި ލާބައަށް މަސައްކަތްކުރުމަށް އުފައްދާފައިވާ ގްރޫޕެއް. ކޮންމެ ކުއްޖަކުވެސް މި ގްރޫޕްގެ މެންބަރަކަށްވުމަކީ އަޅުގަނޑުގެ ވަރަށް ބޮޑު އެދުމެއް. ޔުނިވަރސިޓީ ޙަޔާތުގައި ކޮންމެ ދަރިވަރަކުވެސް މަސައްކަތްކުރަންވީ ކިޔެވުމާ އެއްވަރަށް އިތުރު ޙަރަކާތްތަކާއި އަމިއްލަ ކުރިއެރުމަށްވެސް ވަގުތުދެވޭތޯ!
– ރައީސް މުޙައްމަދު ޝާން ޢާމިރު
ލީޑަރސް ގްރޫޕްގެ މުޙިއްމުކަމާއި، އެމް.އެން.ޔޫ.އެސް.ޔޫ ލީޑަރސް ގްރޫޕަށް ދަރިވަރުން ވަނުމަށް ދަޢުވަތު ދެއްވަމުން އެމް.އެން.ޔޫ.އެސް.ޔޫގެ 7 ވަނަ ދައުރުގެ ރައީސް މުޙައްމަދު ޝާން އާމިރުވެސް ވަނީ މި ޙަރަކާތް ފެށުމުގެ ކުރިން ވާހަކަ ދައްކަވާފައެވެ.
މި ހަރަކާތުގައި ދެން ކުރިއަށް ގެންދެވުނީ މުނިފޫހިފިލުވުމުގެ އެކި އެކި ކުޅިވަރުތަކެވެ. އެގޮތުން، ”ވަން.ޓޫ.ތްރީ“ ކުޅިވަރާއި، ބަނަސް ކެއުންފަދަ މަޖާ ކުޅިވަރުތައް ވަނީ ކުރިއަށް ގެންދެވިފައެވެ. ހަމައެއާއެކު، އެމް.އެން.ޔޫގެ ފަރާތުންނާއި އެމް.އެން.ޔޫ.އެސް.ޔޫގެ ފަރާތުން ވަނީ އެކި ކުޅިވަރުތަކުން ވަނަތައް ހޯދި ދަރިވަރުންނަށް އިނާމު ދީފައެވެ. އަދި އެމް.އެން.ޔޫ.އެސް.ޔޫގެ ބޮޑުބެރު ގުރޫޕުން ވަނީ މުނިފޫހިފިލުވުމުގެ ހަރަކާތްތައް ކުރިއަށް ގެންގޮސްފައެވެ.
މި ކުޅިވަރުތަކަކީ އެމް.އެން.ޔޫ.އެސް.ޔޫއިން ކުރިއަށް ގެންދެވުނު ކުޅިވަރުތަކަށްވާއިރު، މުޅި އިވެންޓް ޑެކަރޭޓްކުރުމުގައިވެސް އެމް.އެން.ޔޫ.އެސް.ޔޫގެ އިސްވާރުން ވަނީ މުހިންމު ދައުރެއް އަދާކޮށްފައެވެ. ފާހަގަކޮށްލެވޭ ގޮތުގައި މި ހަރަކާތް ރާވާ، އިންތިޒާމުކުރުމުގައި އެމް.އެން.ޔޫ.އެސް.ޔޫގެ 50ށްވުރެ ގިނަ އިސްވާރުން ވަނީ ބައިވެރިވެފައެވެ.
އެމް.އެން.ޔޫ ދަރިވަރުންގެ ޔޫނިއަންގެ ފަރާތުން ދަނީ ދިވެހިރާއްޖޭގެ ޤައުމީ ޔުނިވަރސިޓީގެ މިފަދަ ކޮންމެ ޙަރަކާތެއްގައިވެސް ފުރިހަމަ އެއްބާރުލުމެއް ދެމުންނެވެ. އަދި މިފަދަ ޙަރަކާތްތައް އިންތިޒާމުކުރުމުގެ ފުރުޞަތުދެއްވާ ކަމަށްޓަކައި، އެމް.އެން.ޔޫގެ މެނޭޖްމަންޓަށް މި ފުރުޞަތުގައި އެމް.އެން.ޔޫ.އެސް.ޔޫގެ ނަމުގައި ވަރަށް ޚާއްޞަ ޝުކުރެއް އަދާކުރަމެވެ.
ލިޔުނީ: މުޙައްމަދު އަޙްނަފް،
މީޑިއާ ކޯޑިނޭޓަރ، އެމްއެން.ޔޫ.އެސް.ޔޫ
