ދިވެހިރާއްޖޭގެ ޤައުމީ ޔުނިވަރސިޓީއަށް އަލަށް ގުޅުނު ދަރިވަރުންނަށް އަމާޒުކޮށްގެން ބާއްވާ ”އެމް.އެން.ޔޫ ޖެނެރަލް އޮރިއެންޓޭޝަން“ ކުރީ އަހަރުތަކެކޭވެސް އެއްފަދައިން މިއަހަރު ވެސް ބާއްވައިފިއެވެ.
އެމް.އެން.ޔޫއަށް އަލަށް ގުޅޭ ދަރިވަރުންނަށް ބާއްވާ މި އާންމު އޮރިއެންޓޭޝަން ބާއްވާފައިވަނީ 2 ސެޝަނަކަށް ބަހާލައިގެނެވެ. މެންދުރު ކުރީގެ ސެޝަނަކާއި މެންދުރު ފަހުގެ ސެޝަނެއް ބޭއްވިފައިވާއިރު، މެންދުރު ކުރީ ސެޝަނަށް ހާޒިރުވެފައިވަނީ، އެފް.އެޗް.އެސް، އެފް.އީ، އެފް.އެޗް.ޓީ.އެސް، ސީ.އެފް.އެސް، އެފް.އޭ އަދި ސްކޫލް އޮފް މެޑިސިންގެ ދަރިވަރުންނެވެ. އަދި މެންދުރުފަހު ސެޝަނަށް ހާޒިރުވެފައިވަނީ، ބީ.އެސް، އެފް.އެލް.އައި.އެސް، އެފް.އީ.އެސް.ޓީ އަދި ސްކޫލް އޮފް ނަރސިންގ ގެ ދަރިވަރުންނެވެ. މި 2 ސެޝަންގައި ޖުމްލަ 500 އެއްހާ ދަރިވަރުން ބައިވެރިވެފައިވެއެވެ.
އޮރިއެންޓޭޝަން ބޭއްވިފައިވަނީ މައިގަނޑު 7 ބަޔަކަށް ބަހާލައިގެންނެވެ. އެގޮތުން، ދަރިވަރުންގެ ކިޔެވުމާ ގުޅޭގޮތުން މައުލޫމާތުދެވިފައިވާއިރު، ދަރިވަރުންގެ އިދާރީ ޚިދުމަތްތަކާއި، ކޯސްތަކުގެ ފީއާއި، ދަރިވަރުންނަށް ޔުނިވަރސިޓީން ފޯރުކޮށްދޭ އެހީތަކުގެ މައުލޫމާތު ދެވިފައިވެއެވެ. ހަމައެއާއެކު، ދަރިވަރުންގެ އިމްތިހާންތަކާ ގުޅޭ ގޮތުންނާއި، ލައިބްރަރީގެ ޚިދުމަތްތަކާއި، އެމް.އެން.ޔޫ ދަރިވަރުންގެ ޔޫނިއަންއާ ގުޅޭ މައުލޫމާތު ހިއްސާކުރެވިފައިވެއެވެ. މިހުރިހާ ބައިތަކަކަށްވެސް މައުލޫމާތު ދެއްވާފައިވަނީ ކޮންމެ ބައެއްގެވެސް ކޮންމެވެސް އިސްބޭފުޅެކެވެ.
ފޮޓޯ: އެމް.އެން.ޔޫ.އެސް.ޔޫ މީޑިއާ
އޮރިއެންޓޭޝަންގައި އެމް.އެން.ޔޫ.އެސް.ޔޫގެ 50 ށް އިސްވާރުން ވަނީ އެހީތެރިކަން ފޯރުކޮށްދީފައެވެ. އެގޮތުން އޮރިއެންޓޭޝަންގައި ބައިވެރިވި ކޮންމެ ދަރިވަރަކަށް އެމް.އެން.ޔޫ.އެސް.ޔޫގެ ފަރާތުން ދެވުނު ހަދިޔާ ދިނުމުގައާއި، އެމް.އެން.ޔޫ.އެސް.ޔޫގެ ލީޑަރސް ގްރޫޕަށް ވަނުމަށް ޝަޢުޤުވެރިވާ ދަރިވަރުންގެ ނަން ލިސްޓު ނެގުމުގައި އިސްވާރުން ވަނީ މަސައްކަތްކޮށްފައެވެ.
2020ވަނަ އަހަރުގެ ފެބުރުއަރީ އިންޓޭކްގެ އެމް.އެން.ޔޫ އާންމު އޮރިއެންޓޭޝަން ބޭއްވިފައިވަނީ 2020ވަނަ އަހަރުގެ ފެބުރުއަރީ 2 ވަނަ ދުވަހު ސީ.އެފް.އެސް އޮޑިޓޯރިއަމްގައެވެ.
އެމް.އެން.ޔޫގެ މިފަދަ ޙަރަކާތްތަކުގައި އެމް.އެން.ޔޫ.އެސް.ޔޫ އިން އަބަދުވެސްދަނީ ފުރިހަމަ އެއްބާރުލުމެއް ދެމުންނެވެ.
ލިޔުނީ: މުޙައްމަދު އަޙްނަފް،
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
