ޒުވާނުންގެ ދުވަސް ފާހަގަކުރުމުގެ ގޮތުން މިނިސްޓްރީ އޮފް ޔޫތު އެންޑް ސްޕޯރޓްސްއިން އިންތިޒާމުކޮށްގެން ”ޔޫތު ފޯރަމް 2017″ގެ ނަމުގައި ފޯރަމެއް ބާއްވައިފިއެވެ. މި ފޯރަމް ކުރިއަށްދިޔައީ 28 ނޮވެންބަރު 2017 ވީ އަންގާރަދުވަހުގެ ހެނދުނު 08.00ން ހަވީރު 06.00 އަށް ދަރުބާރުގޭ ރަންނަބަނޑޭރި މާލަމުގައެވެ. މި ފޯރަމުގެ ނިންމުމުގެ ރަސްމިއްޔާތުވެސް ބޭއްވިގެންދިޔައީ ދަރުބާރުގޭ ރަންނަބަނޑޭރި މާލަމުގައި އެރޭގެ 08.30 ގައެވެ.
ޒުވާނުންގެ ދުވަސް ފާހަގަކުރުމުގެގޮތުން ބޭއްވި މިފޯރަމް ހުޅުވުމުގެ ރަސްމިއްޔާތު ޝަރަފްވެރިކޮށްދީފައިވަނީ ޔޫތު މިނިސްޓަރ އަލްފާޟިލާ އިރުތިޝާމް އާދަމްއެވެ. މީގެ އިތުރުން މި ފޯރަމް ބޭއްވުމުގައި ބޮޑު އެހީތެރިކަމެއްވެދެއްވި ރައްޔިތުންގެ މަޖިލީހުގެ ގެމަނަފުށީ ދާއިރާގެ ޢިއްޒަތްތެރި މެންބަރު ޖަމީލު އުސްމާނާއި މާފަންނު ދެކުނު ދާއިރާގެ ޢިއްޒަތްތެރި މެންބަރު އަބްދުﷲ ރިފާޢު ވެސް މި ރަސްމިއްޔާތުގައި ބައިވެރިވެފައިވެއެވެ. ހުޅުވުމުގެ ރަސްމިއްޔާތުގައި ގެމަނަފުށީ ދާއިރާގެ ޢިއްޒަތްތެރި މެންބަރު ޖަމީލު އުސްމާނާއި، ޔޫތު އެންޑް ސްޕޯރޓްސް މިނިސްޓަރ އަލްފާޟިލާ އިރުތިޝާމް އާދަމް ވާހަކަފުޅު ދެއްކެވިއެވެ.
ޔޫތު މިނިސްޓްރީން މަޢުލޫމާތުދެއްވި ގޮތުގައި މި ފޯރަމްގެ މަޤުޞަދަކީ ޤައުމުގެ ތަރައްޤީގައި ޒުވާނުންގެ ޙިއްޞާ މިހާރަށްވުރެ އިތުރުކުރުމެވެ. ޒުވާނުންގެ ތެރެއިން މަތީ ތަޢުލީމު ޙާޞިލުކުރަމުންދާ ދަރިވަރުންނަށް އަމާޒުކޮށްގެން ބޭއްވުނު މި ފޯރަމުގައި އެކި ކޮލެޖު/ޔުނިވަރސިޓީތަކުން ޖުމްލަ 100 އަށްވުރެ ގިނަ ދަރިވަރުން ބައިވެރިވެފައިވެއެވެ. ފާހަގަކޮށްލަންޖެހެނީ މީގެ ތެރެއިން ތިރީހަށްވުރެ ގިނަ ދަރިވަރުން ނިޞްބަތްވެގެންވަނީ ދިވެހިރާއްޖޭގެ ޤައުމީ ޔުނިވަރސިޓީއަށް ކަމެވެ.
މައިގަނޑު 5 ދާއިރާއަކަށް ވާހަކަދެކެވުނު މި ފޯރަމް ހުށައަޅައިދެއްވާފައިވަނީ އަލްފާޟިލް އަޙްމަދު ޙަސަން ދީދީއެވެ. ފޯރަމްގައި ވާހަކަ ދެއްކެވުމަށް ތިމާވެށީގެ ދާއިރާއިން އަލްފާޟިލް ޙަސަން ޙުސައިން ޝިހާބު، ތަޢުލީމާއި އިޖުތިމާޢީ ދާއިރާއިން އެމް.އެން.ޔޫގެ ވައިސް ޗާންސެލަރ ޑރ. ޢަލީ ފަވާޒް ޝަރީފް، ކުޅިވަރުގެ ދާއިރާއިން އަލްފާޟިލް އަޙްމަދު މަރްޒޫޤު، އިޤްތިޞާދީ ދާއިރާއިން އަލްފާޟިލާ މަރިޔަމް ވިސާމް، އަދި ދީނީގޮތުން އައި.ޔޫ.އެމްގެ ޗާންސެލަރ ޑރ. މުޙައްމަދު ޝަހީމް ޢަލީ ސަޢީދު ފޯރަމްގެ ޕެނަލިސްޓުންގެ ގޮތުގައި ބައިވެރިވެވަޑައިގެންނެވިއެވެ. މިއިން ކޮންމެ ދާއިރާއަކާއި ގުޅޭގޮތުން ޕެނަލިސްޓުން ވާހަކަދެއްކެވުމަށްފަހު، ސުވާލާއި ޖަވާބުގެ ސެޝަންތަކެއް ކުރިއަށް ގެންގޮސްފައިވެއެވެ. ފޯރަމްގެ ބައިވެރިންގެ ފަރާތުން ކުރިމަތިކުރި ގިނަ ސުވާލުތަކަކަށް ޕެނަލިސްޓުން ޖަވާބުދެއްވާފައިވެއެވެ. ޕެނަލިސްޓުންގެ ވާހަކަދެއްކެވުމަށްފަހު ފޯރަމްގެ ބައިވެރިން ބަހާލެވިފައިވާ ގުރޫޕްތަކުގެ ފަރާތުން ކޮންމެ ގުރޫޕަކުން ވަކި ދާއިރާއަކަށް ބިނާކޮށް ވާހަކަދައްކާފައިވެއެވެ.
”ޔޫތު ފޯރަމް 2017“ ނިންމާލުމުގެ ގޮތުން ކުރިއަށްދިޔަ ރަސްމިއްޔާތުވަނީ ޕީ.އެސް.އެމްގެ ޓީ.ވީ.އެމް ޗެނަލްއިން ވަގުތުން ދުރަށް ދައްކާފައެވެ. މިނިސްޓަރ އޮފް ޔޫތު އެންޑް ސްޕޯރޓްސް އަލްފާޟިލާ އިރުތިޝާމް ޢަލީ ޝަރަފްވެރިކޮށްދެއްވި މި ރަސްމިއްޔާތުގައި ފޯރަމްގެ ޕެނަލިސްޓުންނަށް ޔޫތު މިނިސްޓްރީގެ ފަރާތުން ފިލައެއް އަރުވާފައިވާއިރު، ފޯރަމްގައި ބައިވެރިވި ހުރިހާ ބައިވެރިންނަށްވަނީ ސެޓްފިކެޓް ޙަވާލުކޮށްފައެވެ. މިރަސްމިއްޔާތުގައި ޔޫތު މިނިސްޓަރ އިރުތިޝާމް އަލީގެ އިތުރުން މާފަންނު ދެކުނު ދާއިރާގެ އިއްޒަތްތެރި މެންބަރު އަބްދުﷲ ރިފާޢު ވާހަކަފުޅު ދައްކަވާފައިވެއެވެ. މީގެ އިތުރުން ފޯރަމްގެ ބައިވެރިންގެ ފަރާތުން ދިވެހިރާއްޖޭގެ ޤައުމީ ޔުނިވަރސިޓީގެ ކައުންސިލްގައި ދަރިވަރުން ތަމްސީލުކުރާ މެންބަރު އަލްފާޟިލް އަލީ ރަޝީދުވެސް ވާހަކަފުޅު ދައްކަވާފައިވެއެވެ. މި ރަސްމިއްޔާތު ނިމިގެންދިޔައީ ޤައުމީ ސަލާމުންނެވެ.
