ތިން މެޗުން މޮޅުވެ އެމް.އެން.ޔޫ.ބީ.އެސް ފައިނަލަށް

18 އޮކްޓޯބަރ ވީ ބުރާސްފަތި ދުވަހު ފެށުނު އެމް.އެން.ޔޫ.އެސް.ޔޫ އިންޓަރ ފެކަލްޓީ ބަހުސް މުބާރާތުގެ ފައިނަލަށް އެމް.އެން.ޔޫ.ބީ.އެސް ޖުމްލަ 6 ޕޮއިންޓާއެކު ދަތުރުކޮށްފިއެވެ.

ޖުމްލަ ހަތަރު ފެކަލްޓީއަކުން ބައިވެރިވެގެން ކުރިއަށްދާ މި މުބާރާތުގެ ފައިނަލް ކަށަވަރުކޮށްފައިވަނީ އެމް.އެން.ޔޫ.ބީއެސް އާއި އެފް.އީ އިންނެވެ.

ލީގު އުސޫލުން ކުރިއަށްދިޔައިރު ފުރަތަމަ ބުރުގައި އެމް.އެން.ޔޫ.ބީ.އެސް ވާދަކޮށްފައިވަނީ ސްކޫލް އޮފް ނާރސިންގެ ޓީމާއެވެ. ”ދިވެހިރާއްޖޭގެ ތަރައްޤީއަށް އެންމެ މުހިއްމީ އެއްފަސްކުރުމެވެ.“ މި މަޢުޟޫއާއި ދެކޮޅަށް ބަހުސްކޮށް އެމް.އެން.ޔޫ.ބީ.އެސްގެ ޓީމް ބަހުސް ކާމިޔާބުކުރީ 828 ޕޮއިންޓުންނެވެ.

ދެވަނަ ބުރުގައި ފެކަލްޓީ އޮފް އާރޓްސްގެ ޓީމާއި ދެކޮޅަށް އެމް.އެން.ޔޫ.ބީ.އެސް ވަކާލާތުކޮށް ބަހުސް ކާމިޔާބު ކުރީ 954.5 ޕޮއިންޓުންނެވެ. މި ބަހުސްއިން އެންމެ މޮޅު ބަހުސްކުރުންތެރިޔަކަށް ވެސް ހޮވިފައިވަނީ އެމް.އެން.ޔޫ.ބީ.އެސްގެ ޓީމުން ފާތިމަތު މާޝާއެވެ. މި ބަހުސްގެ މަޢުޟޫއަކީ ”ދިވެހި އިޤްތިޞާދުގެ މުސްތަޤްބަލަކީ ދިވެހި މަސްވެރިކަމެވެ.“ އެމް.އެން.ޔޫ.ބީ.އެސް ވަކާލާތުކުރީ މަޢުޟޫއާއި ދެކޮޅަށެވެ.

ދެ ބަހުސްވެސް ކާމިޔާބުކޮށް އެމް.އެން.ޔޫ.ބީ.އެސް ފައިނަލް ކަށަވަރުކުރުމަށްފަހު، ފައިނަލްގައި ވާދަކުރަން ހަމަޖެހިފައިވާ އެފް.އީގެ ޓީމާއި ރޭގައި ވަނީ ބައްދަލު ކޮއްފައެވެ. ރޭ މަޢުޟޫއާ އެއްކޮޅަށް ބަހުސްކުރި އެމް.އެން.ޔޫ.ބީ.އެސް ޓީމުން ވަނީ “ ދިވެހިރާއްޖޭގައި ބިދޭސީން ގިނަވުމީ މިނިވަންކަމާއި ޤައުމިއްޔަތަށް ހުރި ނުރަށްކަލެއް“ ކަން ސާބިތުކޮށްދީ 868 ޕޮއިންޓުން އެފް.އީގެ މައްޗަށް ކުރިހޯދާފައެވެ. މިބަހުސްގެ އެންމެ މޮޅު ބަހުސްކުރުންތެރިޔަކަށް ހޮވިފައިވަނީ އެމް.އެން.ޔޫ.ބީ.އެސްގެ ޓީމުން ފާތިމަތު މާޝާއެވެ.

އެމް.އެން.ޔޫ.އެސް.ޔޫ އިން އިންތިޒާމްކޮށްގެން ކުރިއަށް ގެންދާ މިބަހުސްގައި އެމް.އެން.ޔޫ.ބީ.އެސް އިން ބައިވެރިވި މީ ފުރަތަމަ ފަހަރެވެ. މިއަހަރުގެ މި މުބާރާތުގެ އިސް ފަނޑިޔާރަކީ އަލްއުސްތާޛް މުޙައްމަދު ޔާމީން އިބްރާހީމެވެ. އަދި ފަނޑިޔާރުންގެ ގޮތުގައި ދެންތިއްބަވާނީ އަލްފާޟިލް މުޙައްމަދު ޝިފާން، އަލްއުސްތާޛް މުޙައްމަދު ޖައުޝާން ޝަރީފް އަދި އަލްފާޟިލް އަލީ އަމީރެވެ.

އެމް.އެން.ޔޫ.އެސް.ޔޫ އިންޓަރ ފެކަލްޓީ ބަހުސް މުބާރާތުގެ ފައިނަލް މިރޭ 8:05 ގައި ފެށުމަށް ހަމަޖެހިފައިވާއިރު އެމް.އެން.ޔޫ.ބީ.އެސްގެ ޓީމަށް ސަޕޯޓުކުރުމަށް ވީހާވެސް ގިނަ ދަރިވަރުން މިރޭގެ ބަހުސް އަށް އައުމީ އެމް.އެން.ޔޫ.ބީ.އެސް.އެސް.އޭގެ ވަރަށްބޮޑު އެދުމެކެވެ. މިރޭގެ ބަހުސްގައި އެމް.އެން.ޔޫ.ބީ.އެސްގެ ޓީމް ވަކާލާތުކުރާނީ “ ހިތަށް އެންމެ ބޮޑަށް އަސަރުކުރާނީ، އިޝްޤީ ލޯތްބެއް ބީވުމުންނެވެ“ މި މަޢުޟޫއާއި ދެކޮޅަށެވެ.

ލިޔުނީ: ފާތިމަތު ޒަހްރާ (އެމް.އެން.ޔޫ.ބީ.އެސް.އެސް.އޭ، މީޑިއާ ކޯޑިނޭޓަރ)