ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ 9 ވަނަ ދައުރުގެ ހިންގާ ކޮމެޓީ ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ)ގެ ވައިސް ޗާންސެލަރ ޑރ. މުހައްމަދު ޝަރީފް އިފްތިތާހުކޮށްދެއްވައިފިއެވެ.
އެމް.އެން.ޔޫ.އެސް.ޔޫ 9 ވަނަ ދައުރުގެ ހިންގާ ކޮމިޓީ އިފްތިތާހު ކޮށްދީފައިވަނީ 2020 ނޮވެމްބަރު 8 ވަނަ ދުވަހުގެ މެންދުރު ފަހު، އެމް.އެން.ޔޫ ފެކަލްޓީ އޮފް އެޑިއުކޭޝަން (އެފް.އީ) އޮޑިޓޯރިއަމްގައި ބޭއްވުނު ހަފްލާގައެވެ.
ކީރިތި ގުރުއާނުގެ ބަރަކާތުން ފެށިގެންދިޔަ މިހަފްލާގައި، ގުރުއާން ކިޔެވީ އެމް.އެން.ޔޫ ސްކޫލް އޮފް ނާރސިންގގެ ދަރިވަރު ސަމްޙާ އަހްމަދުކަމަށްވާއިރު ހަފްލާ ކުރިޔަށްދާނެ ގޮތުގެ ތައާރަފުދީފައިވަނީ އެމް.އެން.ޔޫ ބިޒްނަސް ސްކޫލްގެ ދަރިވަރު އާލާ ބިންތު ވާފިރެވެ.
މި ހަފްލާގެ އެންމެ ފުރަތަމަ ނަމްބަރެއްގެ ގޮތުގައި ކުރިޔަށްދިޔައީ 8 ވަނަ ދައުރުގެ ރައީސް އަލީ ޝަމްޢޫން ޖަލްސާގެ ބައިވެރިންނާއި މުޚާތަބު ކުރެއްވުމެވެ. ޝަމްޢޫންގެ ވާހަކައިގައި އެމަނިކުފާނު ވަނީ ނިމިދިޔަ ދައުރަކީ ޔޫނިއަންއަށް ގޮންޖެހުން ބޮޑު ދައުރެއްކަމަށް ވިދާޅުވެފައެވެ. އަދި ކުރިޔަށް އޮތް ދައުރަކީ އުންމީދީ ދައުރެއްކަމަށް ވެސް ޝަމްޢޫން ވަނީ ވިދާޅުވެފައެވެ.
އަދި ޝަމްޢޫންގެ ވާހަކައަށްފަހު ދެން ކުރިޔަށް ގޮސްފައިވަނީ ޔޫނިއަންގެ އަހަރީ ވީޑިއޯ ރިޕޯޓް ދެއްކުމެވެ.
އެއަށްފަހު ޔޫނިއަންގެ 9 ވަނަ ދައުރުގެ ހިންގާ ކޮމިޓީ އާއި މަގާމު ހަވާލުކޮށްފައިވާއިރު، މި ނަމްބަރު ފުރިހަމަ ކޮށްދެއްވީ އެމް.އެން.ޔޫގެ ވައިސް ޗާންސެލަރ ޑރ. މުހައްމަދު ޝަރީފް އެވެ.
އެމް.އެން.ޔޫ.އެސް.ޔޫ 9 ވަނަ ދައުރުގެ ހިންގާ ކޮމިޓީ:
- ރައީސް: އަބްދުﷲ ޝަހުނީޒް
- ނާއިބު ރައީސް (އިތުރު ޙަރަކާތް): ހުސައިން އަލީ
- ނާއިބު ރައީސް (ޢިލްމީ): އާމިނަތު މިހުދާ މުޙައްމަދު
- ނާއިބު ރައީސް (ގޮފިތައް): ހުސައިން ޒައިދު
- ޚަޒާންދާރު: އަޙްމަދު ޙައްޔާން ރަޝީދު
- ސެކްރެޓަރީ: ފާތިމަތު ނަޝާތު ވަހީދު
- އެސިސްޓެންޓް ސެކްރެޓަރީ: ޢާއިޝަތު އީފާ އިބްރާހީމް
- މީޑިއާ ކޯޑިނޭޓަރ: ޝުއައިބު މުހައްމަދު އިގްބާލް
މަގާމާއި ހަވާލުވުމަށްފަހު މި ހަފްލާގައި ޝަހުނީޒް ވަނީ ޔޫނިއަންގެ މެމްބަރުންނަށް އުންމީދު ގެނަސްދީ ކުރިޔަށް އޮތް ދައުރުގައި ކުރަން ނިންމާފައި ހުރި ބައެއް ހަރަކާތްތަކުގެ ތަފްސީލު ދެއްވައިފައެވެ.
މި ހަފްލާގައި ޔޫނިއަންގެ އެޑްވައިޒަރީ ބޯޑު މެމްބަރު ޝާންގެ އިތުރުން ޑީން އޮފް ސްޓޫޑެންޓްސް ލީލާ އަހުމަދު ވެސް ވަނީ ވާހަކަ ދައްކާފައެވެ.
ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން އުފެދިފައިވަނީ 2012 ނޮވެންބަރ 06ވަނަ ދުވަހެވެ. މީގެ ފަހުން މި ޔޫނިއަންގެ ތަފާތު 8 ހިންގާ ކޮމިޓީއެއް މަސައްކަތްކޮށްފައިވާއިރު ޔޫނިއަންގެ ހިންގާ ކޮމިޓީއެއްގެ ދައުރަކީ 1 އަހަރު ދުވަހެވެ.
ލިޔުނީ: ޢަބްދުﷲ އަޠޫފް އާތިފް،
އެމް.އެން.ޔޫ.އެސް.ޔޫ މީޑިއާ
