ރާއްޖޭގައި ފުޅާދާއިރާއަކަށް ވިޔަފާރި ކުރަމުން އަންނަ ލިޓަސް ކުންފުންޏާއެކު ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އަދި ޤައުމީ ޔުނިވަރސިޓީގެ ސްޓާފް ކްލަބުން މަޝްވަރާ ބައްދަލުވުމެއް ބާއްވައިފިއެވެ.
ޤައުމީ ޔުނިވަރސިޓީގެ ކޮންފަރެންސް ހޯލުގައި 6 އޮކްޓޯބަރ 2020 ވީ އަންގާރަ ދުވަހު ބޭއްވުނު މި ބައްދަލުވުމުގައި އެމް.އެން.ޔޫ.އެސް.ޔޫ ގެ ފަރާތުން ބައިވެރިވެވަޑައިގެންނެވީ، 9 ވަނަ ދައުރުގެ އިންތިޚާބީ ރައީސް ޢަބްދުﷲ ޝަހުނީޒް، އިންތިޚާބީ ނައިބު ރައީސް (އިލްމީ) އައިމިނަތު މިހުދާ މުޙައްމަދު، އިންތިޚާބީ ނައިބު ރައީސް (ގޮފިތައް) ޙުސައިން ޒައިދާ، އިންތިޚާބީ ސެކެޓްރީ ފާތިމަތު ނަޝާތު ވަހީދު، މި ހިނގާ ދައުރުގެ ސެކްރެޓަރީ އައިމިނަތު ހަމީޒާ އަޙުމަދު އަދި އިންތިޚާބީ މީޑިއާ ކޯޑިނޭޓަރ ޝުއައިބް މުޙައްމަދު އިޤްބާލްގެ އިތުރުން އެޑްވައިޒަރީ ބޯޑުގެ މެމްބަރު އަރުޝަދު އަޝްރަފްގެ އިތުރުން އެމް.އެން.ޔޫ ކައުންސިލްގައި ދަރިވަރުން ތަމްސީލު ކުރައްވާ މެމްބަރު އިބްރާހީމް ޣާނިމް ޝާހިދު ވަނީ ބައިވެރިވެވަޑައިގެންފައެވެ. އަދި ޤައުމީ ޔުނިވަރސިޓީގެ ސްޓާފް ކްލަބްގެ ރައީސް މަރިޔަމް ޢަބްދުﷲ، އާއި ނައިބު ރައީސް ޢަލީ މޫސާ، އާއި ނައިބު ރައީސާ އައިމަން އަބްދުﷲ، އާއި ސެކްރެޓަރީ މަރިޔަމް ޝިބާނާ، އަދި މެމްބަރު ޝާކިރާ އަލީ ވަނީ ބައިވެރިވެފައެވެ. މީގެ އިތުރުން ލިޓަސްގެ ފަރާތުން ޖެނެރަލް މެނޭޖަރު އަހްމަދު ޒާހިރާއި ލިޓަސް ގުރޫޕްގެ ސޭލްސް އެންޑް މާކެޓިންގ ގެ ސީނިއަރ މެނޭޖަރ އާސިފް ރަޝީދު ވަނީ ބައިވެރިވެވަޑައިގެންފައެވެ.
ލިޓަސްގެ ޖެނެރަލް މެނޭޖަރ އަހްމަދު ޒާހިރު ވިދާޅުވީ، ދަރިވަރުންނަށް ހާއްސަކޮށްގެން ޕްލޭންތައް ތައްޔާރު ކުރުމުގެ މަސައްކަތް ކުރައްވަމުން ގެންދަވާ ކަމަށާއި، އެ ޕްލޭން ވަރަށް އަވަހަށް ހިއްސާ ކުރައްވާނެ ކަމަށެވެ.
މީގެ އިތުރުން ލިޓަސްގެ ސޭލްސް އެންޑް މާކެޓިންގެ ސީނިއަރ މެނޭޖަރ އާސިފް ރަޝީދު ވިދާޅުވީ ރާއްޖޭގެ 10 ސަރަހައްދެއްގައި ލިޓަސްގެ އައުޓްލެޓްސްތައް ހުރިއިރު، މިހާރު އެކުލަވާލަމުންދާ ޕްލޭން އާއިއެކު ދަރިވަރުންނަށާއި މުއައްޒަފުންނަށް އެ އައުޓްލެޓްސް ތަކުން ވިޔަފާރި ކުރުމުގައި ލުއި ފަސޭހަ ގޮތްތަކެއް ލިބިގެންދާނެ ކަމަށެވެ.
އެމް.އެން.ޔޫ ސްޓާފް ކްލަބުގެ ރައީސާ މަރިޔަމް އަބްދުﷲ ވިދާޅުވީ އެމްއެންޔޫގެ ހިޔާވަހިކަމުގެ ދަށުގައި ގިނަ އަދަދެއްގެ ސްޓާފުން ހިމެނޭއިރު، ލިޓަސްގެ ފަރާތުން މުއައްޒަފުންނަށް ލުއި ފަސޭހަ ގޮތްތަކެއް ހަމަޖައްސައިދިނުމަކީ އެމް.އެން.ޔޫ ސްޓާފުންގެ ވަރަށް ބޮޑު އެދުމެއް ކަމަށެވެ.
”ގިނަ އަދަދެއްގެ މުއައްޒަފުން އެމް.އެން.ޔޫގައި މަސައްކަތް ކުރޭ. ލިޓަސްގެ ފަރާތުން އެމް.އެން.ޔޫގެ ސްޓާފުންނަށް ލުއި ފަސޭހަ ގޮތްތަކެއް ހަމަޖައްސައި ދިނުމަކީ ސްޓާފުންގެ ވަރަށް ބޮޑު އެދުމެއް.“
މަރިޔަމް ޢަބްދުﷲ، އެމް.އެން.ޔޫ ސްޓާފް ކުލަބު ރައީސާ
ސްޓާފް ކްލަބްގެ ނައިބު ރައީސް އަލީ މޫސާ ވިދާޅުވީ ލިޓަސް ގްރޫޕްގެ ފަރާތުން ރާއްޖޭގެ އެކި ކަންކޮޅުތަކުގައި ތަފާތު އެކި ބާވަތްތަކުގެ ވިޔަފާރި ކުރަމުން އަންނައިރު، ލިޓަސްގެ ފަރާތުން ސްޓާފުންނަށާއި ދަރިވަރުންނަށް ހާއްސަ ޕްލޭންއެއް އެކުލަވާލާ، މި ޕްލޭންގެ ދަށުން ވިޔަފާރި ކުރުމުގެ ފުރުސަތު ލިބިގެންދިޔުން ވެގެންދާނީ މުވައްޒަފުންނަށާއި ދަރިވަރުންނަށް އޭގެ ފައިދާ ކުރާނެ ކަމަށެވެ.
އެމް.އެން.ޔޫ.އެސް.ޔޫގެ އިންތިހާބީ ރައީސް އަބްދުﷲ ޝަހުނީޒް ވިދާޅުވީ އެމް.އެން.ޔޫގެ ކެމްޕަސްތައް ރާއްޖޭގެ އެކި ކަންކޮޅުތަކުގައި ހެދިފައި ހުރިއިރު ލިޓަސްގެ ފަރާތުން ދަރިވަރުންނަށް އެ ކުންފުނީގެ ފިހާރަތަކުން ވިޔަފާރި ކުރުމަށް ހާއްސަ ޕްލޭން އެއް ހެދިގެން ދިޔުމަކީ ދަރިވަރުން ކުރަމުން ގެންދާ އުންމީދެއް ކަމަށް ވިދާޅުވެފައެވެ. އަދި ލިޓަސްގެ ފަރާތުން އަތޮޅުތެރޭގައި ކިޔަވަމުން އަންނަ ދަރިވަރުންނަށް ވެސް ލުއި ފަސޭހަ ގޮތްތަކެއް ހޯދައިދިނުމަކީ ދަރިވަރުންގެ ޔޫނިއަންގެ ވަރަށް ބޮޑު އެދުމެއް ކަމަށް ޝަހުނީޒް ވިދާޅުވިއެވެ.
”ލިޓަސްގެ ފަރާތުން ދަރިވަރުންނަށް ލުއިފަސޭހަ ގޮތްތައް ހެދުމަށް ޕްލޭން ކުރަމުން އަންނައިރު މި ޕްލޭންގައި ހިމަނާ ކަންކަން އަތޮޅުތެރޭ ކެމްޕަސްތަކާއި ހުރިހާ ދަރިވަރުންނަށް ލިބިގެންދާނެގޮތް ހަދައިދިނުމަކީ ދަރިވަރުންގެ ޔޫނިއަންގެ ވަރަށް ބޮޑު އެދުމެއް“
ޢަބްދުﷲ ޝަހުނީޒް، އިންތިޚާބީ ރައީސް
މި ބައްދަލުވުމުގައި ލިޓަސްއިން ވަނީ އެ ކުންފުނިން ކުރަމުން ގެންދާ ވިޔަފާރިތަކުގެ ތަފްސީލު ހިއްސާ ކުރައްވާފައެވެ.
ލިޓަސް ކުންފުންޏަކީ ރާއްޖޭގައި ފުޅާދާއިރާއެއް ގައި ސައިކަލުގެ އިތުރުން އެނޫންވެސް ވިޔަފާރިތައް ކުރަމުން އަންނަ އާއްމުންގެ އިތުބާރު ހޯދާފައިވާ ކުންފުންޏެކެވެ. މީގެ އިތުރުން ލިޓަސް އަކީ 2019 ވަނަ އަހަރު ލީޑިން ގޯލްޑް 100 ކޮމްޕެނީގެ އެވޯޑްވެސް ހޯދައިފައިވާ ކުންފުންޏެކެވެ.
ލިޔުނީ:
މުޙައްމަދު އަޙްނަފް،
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
