އެމް.އެން.ޔޫ ފެކަލްޓީތަކާއި ރާއްޖޭގެ ކޮލެޖްތަކުގެ މެދުގައި 2013 ވަނަ އަހަރުން ފެށިގެން ސިލްސިލާގޮތެއްގައި ބާއްވަމުން އަންނަ އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ އެމް.އެން.ޔޫ.އެސް.ޔޫގެ ފަރާތުން އިންތިޒާމުކޮށްގެން ބާއްވާ އެންމެ ބޮޑު އެއް ޙަރަކާތެވެ. މިމުބާރާތަށް އެމް.އެން.ޔޫގެ ފެކަލްޓީތަކުގެ އިތުރުން އެހެނިހެން ކޮލެޖުތަކުގެ ބޮޑު ތަރުޙީބެއް ކޮންމެ އަހަރަކު ވެސް ލިބެމުން އަންނައިރު އެމް.އެން.ޔޫ ބިޒްނަސް ސްކޫލުންވެސް މެދުނުކެނޑި އަންނަނީ މި މުބާރާތުގައި ބައިވެރިވަމުންނެވެ. ފާއިތުވި 6 އަހަރަށް ބަލާއިރު އެމް.އެން.ޔޫ ބިޒްނަސް ސްކޫލުން ވަނީ 3 ފަހަރު މި މުބާރާތް ކާމިޔާބުކޮށްފައެވެ.
2013 ވަނަ އަހަރު އެމް.އެން.ޔޫ ފުޓްސަލް ފިއެސްޓާގެ ނަމުގައި ފުޓްސަލް މުބާރާތެއް އިއުލާނުކޮށް، ހަމައެކަނި ފިރިހެން ޑިވިޝަނަށް ހުޅުވައިލި ފުރުސަތުގައި އެމް.އެން.ޔޫ ބިޒްނަސް ސްކޫލުން، ގުރޫޕް ސްޓޭޖްގެ ހުރިހައި މެޗެއް ކާމިޔާބުކޮށް ފައިނަލަށް ދަތުރުކުރުމަކީ ފަޚުރެކެވެ.. އޭގެ އިތުރުން ކުއާޓާ އާއި ސެމީގައި ދެއްކި މޮޅުކުޅުން ތަކުރާރުކޮށް ފުރަތަމަ މުބާރާތުގެ ތަށި އުފުލައިލުމަކީ ހަމަގައިމުވެސް ކުޑަ ޝަރަފެއް ނޫނެވެ. އަދި ޖެހިގެން އައި 2014 ވަނަ އަހަރުގެ މުބާރާތުގައި އެ ކާމިޔާބީ ތަކުރާރުކުރުމަކީ ވެސް ފާހަގަ ނުކޮށް ދޫކޮށްލާވަރު ކަމެއް ނޫނެވެ. ނަމަވެސް ހިތާމައަކީ 2015 ވަނަ އަހަރު، އެ ކާމިޔާބީގެ ސިލްސިލާއަށް ބޮޅެއް އިތުރުކޮށް ތަށި މިލްކު ކުރުމަށް ލިބުނު ފުރުސަތު އަތުން ބީވެގެން ދިއުމެވެ. އެ އަހަރު ފައިނަލުގައި އެމް.އެން.ޔޫ.ބީ.އެސް އިން ކުރި އުންމީދުތައް ފެނަށް ދުއްވައިލީ އެމް.އެން.ޔޫގެ ފެކަލްޓީ އޮފް އެޑިއުކޭޝަންގެ ޓީމުންނެވެ.
2015 ވަނަ އަހަރު ތަށީގައި އަތް ޖެހޭ ހިސާބަށް ގޮސްފައިމެ ނުލިބި ދަނޑުން ފައިބަން ޖެހުން ވީ، ޖެހިގެން އައި އަހަރު އާ ހިތްވަރަކާއެކު ތައްޔާރުވުމަށް އެޅުނު ބާރަކަށެވެ. ދުރާލައި ފަރިތަކުރުންތައް ބާއްވައި، ރޭވުންތެރިކަމާއެކު ކުރި މަސައްކަތުގެ ނަތީޖާ އެފަހަރު ވަރަށް ފޮންޏެވެ. އެ އަހަރު ބީއެސް ޓީމުން މުބާރާތް ނިންމައިލީ 3 ވަނަ ފަހަރަށް އެމް.އެން.ޔޫ ފުޓްސަލް ފިއެސްޓާގެ ތަށި ބިޒްނަސް ސުކޫލުގެ ޓްރޮފީ ހަރުގަނޑަށް ލައިދީފައެވެ. ނަމަވެސް ޓީމުގައި އޭރު ތިބި ކުޅުންތެރިން ބަދަލު ވުމުގެ ސަބަބުން 2017 ވަނަ އަހަރު ވާދަވެރިންނަށް މާކަ އެދެވޭ ރައްދެއް ނުދެވި، ކުއާޓާ ފައިނަލްގައި ފެކަލްޓީ އޮފް ހޮސްޕިޓަލިޓީ އެންޑް ޓޫރިޒަމް ސްޓަޑީޒްގެ ޓީމާއި ވާދަކޮށް 2-1 އިން ޖެހުނީ މުބާރާތާ އަލްވިދާއު ކިޔާށެވެ.
2018 ވަނަ އަހަރުގެ މުބާރާތް އަންހެން އަދި ފިރިހެން ޑިވިޝަންއަށް ހުޅުވާލި އިރު އެމް.އެން.ޔޫ.ބީއެސް އިން ވަނީ އަންހެން އަދި ފިރިހެން ޓީމެއް ވެސް ނެރެފައެވެ. ނަމަވެސް ކުއާޓާ ފައިނަލްގައި ދިވެހިރާއްޖޭގެ އިސްލާމީ ޔުނިވަސިޓީ އާއި ބައްދަލު ކުރި މެޗުން 2-2 އިން އެއްވަރުވެ ޕެނަލްޓީގައި 7-8 އިން ހޯދި މޮޅާއެކު ދިވެހިރާއްޖޭގެ އިސްލާމީ ޔުނިވަސިޓީ އިން ވަނީ އެމް.އެން.ޔޫ.ބީ.އެސްގެ ފިރިހެން ޑިވިޝަނުގެ ޓީމު ’ހުއްޓުވައިފައެވެ‘. އަންހެން ޓީމު ސެމީ ފައިނަލްގައި ކުލީކް ކޮލެޖާއި ބައްދަލު ކުރި މެޗުން 6-0 އިން ބަލިވުމާއެކު ރަން މެޑެއްޔަށް ކުރި އުންމީދު ނިންމާލަން ޖެހުނީ ރިހި ވެސް ނުލިބި އެވެ.
އެމް.އެން.ޔޫ.އެސް.ޔޫ ފުޓްސަލް ފިއެސްޓާ ސިލްސިލާގޮތެއްގައި ބާއްވާ މީ 7 ވަނަ އަހަރެވެ. މިއަހަރު، އެމް.އެން.ޔޫ.ބީއެސްގެ ފިރިހެން ޓީމު ގުރޫޕް ސްޓޭޖްގެ މެޗުތައް ކުޅެ މިހާރު ވަނީ ކުއާޓާ ފައިނަލް ކަށަވަރުކޮށްފައެވެ. ނަމަވެސް އަންހެން ޓީމުން ކުއާޓާ ކަށަވަރުވާނީ ގްރޫޕް ސީގެ މެޗްތައް ނިމުމުންނެވެ. ކުރީ އަހަރުގެ ’ބަލިން‘ ފިލާވަޅު ލިބިގަނެ، މިފަހަރު ފިރިހެން ޓީމާއި އަންހެން ޓީމުން ވެސް އަމާޒުހިފާފައިވަނީ ”ރަން“ ކާމިޔާބީއަކަށެވެ. ކުރިއަށް އޮތީ ވާދަވެރި މެޗުތަކެކެވެ. ވުމާއެކު މީ، ”ރަން“ ހުވަފެނުގައި ހަޤީޤީ ކުލަ ޖެއްސުމަށް ސަޕޯޓަރުންނާއި ޓީމުގެ ކުޅުންތެރިން އެއް ރޫޙެއްގައި މަސައްކަތް ކުރަންވީ ވަގުތެވެ.
ލިޔުނީ : ފާތިމަތު ޒަހްރާ މީޑިއާ ކޯޑިނޭޓަރ،
ބީއެސްއެސްއޭ، އެމް.އެން.ޔޫ.އެސް.ޔޫ
