ގައުމީ ޔުނިވާސިޓީގެ ދަރިވަރުންގެ ޔޫނިއަންއިން އިންތިޒާމުކޮށްގެން ކޮލެޖް ޔުނިވާސިޓީ ތަކަށް ހުޅުވައިގެން ބާއްވާ އެމް.ޑަބްލިޔު.އެސް.ސީ އެމް.އެން.ޔު.އެސް.ޔޫ ފުޓްސަލް ފިއެސްޓާ 2019 ގައި ވާދަކުރާ އެފް.އެޗް.ޓީ.އެސް ފިރިހެން ޓީމުގެ ކޯޗަކީ މަޝްހޫރު ފުޓްސަލް ކުޅުންތެރިޔާ އަހްމަދް ހަލީމް (އަންމަޑޭ) އެވެ.
ފުޓްސަލްގެ ދުނިޔޭގައި ލ.ގަމު އަންމަޑޭއޭ ބުނުމުން ނޭނގޭނެ މީހެއް މަދުވާނެއެވެ. އޭނާއަކީ ކްލަބް މޯލްޑިވްސް އާއި، ގޯލްޑެން ފުޓްސަލް މުބާރާތްފަދަ ބޮޑެތި މުބާރާތްތަށް ކުޅެ ކާމިޔާބު ކޮށް، އެކި ފަހަރުމަތިން ޓޮޕް ސްކޯރާރ އަދި މުބާރާތުގެ ގަދަ ފަހެއް ގައިވެސް ހިމެނިފައިވާ ކުޅުންތެރިއެކެވެ. އަދި ލާމު އަތޮޅުގެ ގިނަ މުބާރާތްތަކެއް ކާމިޔާބުކޮށް ގާފަރުގެ ބޮޑު މުބާރަތްވެސް ކާމިޔާބު ކޮށްފައިވާ ހުނަރުވެރި ކުޅުންތެރިއެކެވެ. އަންމަޑޭ އަކީ އޮންލީ، އަޔާ، މުއްކި ފަދަ މޮޅެތި ކުޅުންތެރިންނާއި އެއްޓީމަށް ކުޅެމުންދިޔަ ކުޅުންތެރިއެއްވެސްމެއެވެ. އޭނާ ވަނީ ފެނަކަ އާއި ލ.ގަން ފަދަ ގިނަޓީމުތަކުގެ ކެޕްޓަންކަންވެސް ކޮށްފައެވެ. މީގެ އިތުރުން، އަންމަޑޭ ވަނީ ހައްހާ ވައި ކަންމަތިއާއި އެކު ތިންވަނަ ޑިވިޝަން ކުޅެ ކާމިޔާބުކޮށް، ދަ ގޭންގާއިއެކު ދެވަނަ ޑިވިޝަންވެސް ކާމިޔާބުކޮށްފައެވެ. އަންމަޑޭ ފުޓްސަލް ކުޅޭތާ މިހާރު ގާތްގަނޑަކަށް 8 އަހަރު ވެދާނެކަމަށް އޭނާ ބުންޏެވެ.
2018 ވަނަ އަހަރު އަނިޔާއެއްވުމުގެ ސަބަބުން އަންމަޑޭ ވަނީ އެއް އަހަރު ދުވަހަށް ކުޅުމާއި ދުރުވާން ޖެހިފައެވެ. އޭގެ ފަހުން އޭނާ ވަނީ ކޯޗިންގެ ދާއިރާއަށް ނިކުމެފައެވެ. އެންމެ ފުރަތަމަ ކޯޗުކަން ކޮށްދީފައިވަނީ ރިވޮލިޔުޝަން ކަޕުގައި ވައި.އާރް.ސީ އަށެވެ. ވައި.އާރް.ސީ އިން ވަނީ މި މުބާރާތް ކާމިޔާބުކޮށްފައެވެ. މީގެއިތުރުންވެސް އަންމަޑޭ ވަނީ ތިން މުބާރާތެއްގައި ކޯޗުކަންކޮށްދީ، ތިން މުބާރާތްވެސް ކާމިޔާބުކޮށްފައެވެ. މިވީ ކުޑަ ދުވަސްކޮޅު ތެރޭގައި ހާއްޕެ، ޝާކާ އަދި އޮންލީ ފަދަ މޮޅެތި އެތަކެއް ކުޅުންތެރިންނަށް ކޯޗުކަންކޮދީފަވެއެވެ. އެފް،އެޗް.ޓީ.އެސް ގެ ފިރިހެން ޓީމަކީ އަންމަޑޭ ކޯޗުކަންކޮށްދޭ ފަސްވަނަ ޓީމެވެ.
އެފް.އެޗް.ޓީ.އެސް ގެ ޓީމާ ދޭތެރޭ ކޯޗެއްގެ ހައިސިއްޔަތުން ދެކޭގޮތަކީ ކޮބައިތޯ ކުރި ސުވާލުގެ ޖަވާބުގައި އަންމަޑޭ ބުނެފައިވަނީ “ އުންމީދަކީ ކާމިޔާބުވުން. އެންމެ ފަހުން ފެކަލްޓީ އޮފް އިންޖިނިއަރިންގް ސައިންސް އެންޑް ޓެކްނޮލޮޖީއާ ދެކޮޅަށް ކުޅުނު މެޗުން ބަލި ވެފައިވީ ނަމަވެސް ކުރިޔަށް އޮތް މެޗްގައި މޮޅު ކުޅުމެއް ދެއްކޭތޯ މަސަތްކަތް ކުރާނަން. އެފް.އެޗް.ޓީ.އެސް ގެ ޓީމަކީ އެ ހުނަރު ލިބިފައިވާ މޮޅު ކުޅުންތެރިން ތިބި ޓީމެއް.“
ކޯޗެއްގެ ގޮތުގައި މިހާރު މަސަތްކަތް ކުރަމުންދަނީ ނުރަސްމީކޮށް ނަމަވެސް ކޯޗިންގ ޓްރެއިނިންގ އަށްފަހު ރަސްމީކޮށް މި ދާއިރާއިން ފެނިދާނެ ކަމަށް އޭނާ ބުންޏެއެވެ. އަދި ހަމަ އެއާއެކު ކުރިއަށް އޮތް މަހުގައި ކުޅުމުގެ މައިދާނަށް އެނބުރި އަންނާނެ ކަމަށް އަންމަޑޭ ވަނީ ބުނެފައެވެ.
ޝެޓްސްއިން އެދެނީ އަންމަޑޭ އަށް ކުޅުންތެރިއެއްގެ ގޮތުން އަދި ކޯޗެއްގެ ގޮތުގައިވެސް ފާގަތި ދުވަސްތަކަކަށެވެ.
ލިޔުނީ: އާއިޝަތު ޝަމްލާ
މީޑިއާ ކޯޑިނޭޓަރ، ޝެޓްސް
