އެމްޑަބްލިއުއެސްސީ އެމްއެންޔޫއެސްޔޫ ފުޓްސެލް ފިއެސްޓާގައި ފެކަލްޓީ އޮފް އާޓްސް (އެފްއޭ) ތަފާތު ބޮޑު ނަތީޖާއަކުން ބަލިކޮށް ސެންޓަރ ފޯރ ފައުންޑޭޝަން ސްޓަޑީޒް (ސީއެފްއެސް) އިން ކުއާޓާ ފައިނަލުގެ އުންމީދު އާ ކޮށްފިއެވެ.
މި މެޗު ސީއެފްއެސްއިން ކާމިޔާބުކުރީ 7-2 ގެ ނަތީޖާ އަކުންނެވެ.
މެޗުގެ ދެވަނަ މިނެޓުގައި ސީއެފްއެސްއިން ވަނީ ލަނޑު ޖަހާ މެޗުގެ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ ކެޕްޓަން އައިމަން ރަޝީދެވެ. މި ލަނޑު އޭނާ ކާމިޔާބުކުރީ އައްފާޝްގެ އެހީތެރިކަމާއި އެކުގައެވެ.
މި ލަނޑާއެކު ސީއެފްއެސް އިން ވަނީ އެޓީމުގެ ހަމަލާތައް އިތުރަށް ވަރުގަދަ ކޮށްފައެވެ. އެގޮތުން މެޗުގެ 12 ވަނަ މިނެޓުގައި ސީއެފްއެސްއިން ވަނީ އިތުރު ލަނޑެއް ޖަހާ ލީޑު ފުޅާ ކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ވެސް ކެޕްޓަން އައިމަން ރަޝީދެވެ. މި ލަނޑު އޭނާ ކާމިޔާބުކޮށްދިނީ އެފްއޭގެ ދެ ކުޅުންތެރިން ކައިރިން ނައްޓާލުމަށްފަހު ގޯލުގެ މަތީ ކަނަށް ބޯޅަ ފޮނުވައިލައިގެންނެވެ.
ސީއެފްއެސް އިން ދެ ލަނޑުގެ ލީޑެއް ނަގައިފައިވަނިކޮށް އެފްއޭއިން ވަނީ ފުރަތަމަ ހާފު ނިމުމުގެ ކުރިން ދެ ލަނޑުޖަހާ މެޗުގެ ނަތީޖާ ހަމަހަމަ ކޮށްފައެވެ. އެފްއޭގެ ލަނޑުތައް އެޓީމަށް ކާމިޔާބުކޮށްދިނީ އަހްމަދު އާލިމްގެ އިތުރުން އަލީ ޝާހީންއެވެ.
ދެވަނަ ހާފު ސީއެފްއެސްއިން ފެށީ ވަރުގަދަ އެޓޭކިންގް ގޭމަކަށް ވިސްނައިގެންނެވެ. އެގޮތުން ސީއެފްއެސްއިން ވަނީ އެފްއޭގެ ގޯލަށް ފުލުފުލުގައި ހަމަލާ ފޮނުވައިލައިފައެވެ. މި ހާފުގައި އައްފާޝް ވަނީ ކައިރި ކައިރީގައި ދެ ލަނޑު ޖަހާ ސީއެފްއެސް އަށް ލީޑު ނަގައިދީފައެވެ.
މެޗުގެ 31 ވަނަ މިނެޓުގައި ކެޕްޓަން އައިމަން ވަނީ އިތުރު ލަނޑެއްޖަހާ އޭނާގެ ހެޓްރިކް ފުރިހަމަ ކޮށްފައެވެ.
ސީއެފްއެސްގެ ނޫރު އަދި އަފްނާން މިއިން ކޮންމެ ކުޅުންތެރިޔަކުވަނީ މި މެޗުގައި ލަނޑު ޖަހައިފައެވެ.
މި ނަތީޖާއާއިއެކު ސީއެފްއެސް އޮތީ ތިން ޕޮއިންޓާއިއެކު ގްރޫޕުގެ ތިން ވަނައިގައެވެ. ގްރޫޕުގެ އެއްވަނައިގައި ސައިރެކްސް ކޮލެޖު އޮތީ ކުޅުނު ދެމެޗު ކާމިޔާބުކޮށް ލިބުނު ހަ ޕޮއިންޓާއިއެކުގައެވެ. ދެވަނައިގައި އެމްއައި ކޮލެޖު އޮތީ ލިބުނު ތިން ޕޮއިންޓާއެކު ފައިދާ ގޯލުން ކުރި ލިބޭތީއެވެ.
ލިޔުނީ: އަބްދުﷲ އަތޫފް އާތިފް
ތަރަހަ ރައީސް
