އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2019ގެ އަންހެން ޑިވިޜަންގެ ސެމީ ފައިނަލުގައި އެމް.އައި އާއި ދެކޮޅަށް ވާދަކުރާނީ ވިލާ ކޮލެޖެވެ. މިދެޓީމު ސެމީ ފައިނަލުން ޖާގަ ކަށަވަރުކުރީ ރޭ ކުޅެވުނު ކުއާޓާރ ފައިނަލްގެ މެޗުތަކުން މޮޅުވެގެންނެވެ.
ކުއާޓަރ ފައިނަލުގައި ރޭ އެމް.އައިއާއި ފެކަލްޓީ އޮފް ލޯ އެންޑް އިސްލާމިކް ސްޓަޑީޒް (ފްލިސް) ވާދަކުރި މެޗު އެމް.އައި ކާމިޔާބުކުރީ 0-2އިންނެވެ. މޮޅު ކުޅުންތެރިއަކަށް ހޮވުނީ އެމް.އައިއަށް މެޗުގެ ފުރަތަމަ ގޯލު ކާމިޔާބު ކޮށްދިން، ޖާރޒީ ނަންބަރު 6، އާމިނަތު ޝާމިލާއެވެ. މިއީ މިމުބާރާތުގައި ޝާމިލާގެ 6ވަނަ ގޯލެވެ.
ކުއާޓަރ ފައިނަލްގައި ވިލާ ކޮލެޖާއި ވާދަކުރީ މެޕްސް ކޮލެޖެވެ. މިމެޗު 0-3ގެ ނަތީޖާއަކުން ކާމިޔާބުކުރީ ވިލާ ކޮލެޖެވެ. މޮޅު ކުޅުންތެރިއަކަށް ހޮވުނީ ވިލާ ކޮލެޖްގެ ޖާރޒީ ނަންބަރު 11، ފިރުޝާނާ ނަޞީރެވެ.
މިދެމެޗުން މޮޅުވި ދެޓީމު، އެމް.އައިއާއި ވިލާ ކޮލެޖު ސެމީ ފައިނަލުގައި ވާދަކުރާނީ ސެޕްޓެމްބަރ 26ވާ ބުރާސްފަތިދުވަހުގެރެޔެވެ. މިމެޗު ފެށުމަށް ހަމަޖެހިފައިވަނީ 20:50ގައެވެ.
އެމް.ޑަބްލިއު.އެސް.ސީ އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2019ގެ ޓައިޓްލް ސްޕޮންސަރަކީ މާލޭ ވޯޓަރ އެންޑް ސްވަރޭޖް ކޮމްޕެނީ (އެމް.ޑަބްލިއު.އެސް.ސީ)އެވެ. މި މުބާރާތުގެ ޕްރިންޓިންގ ޕާޓްނަރަކީ އެމް 7އެވެ. ސްޕޮންސަރުންނަކީ ދިރާގު އަދި ވިޒިޓް ލާމްއެވެ. މީޑިއާ ޕާޓްނަރަކީ ޕީ.އެސް.އެމް ސްޕޯޓްސްއެވެ.
އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ޘާނަވީ ދާއިރާގައި ބާއްވާ އެންމެބޮޑު ކުޅިވަރު ޙަރަކާތެވެ. މި މުބާރާތް ރާވައި އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)އިންނެވެ. މި އަހަރު މި ބާއްވަނީ މީގެ 7ވަނަ މުބާރާތެވެ. 2013އިން ފެށިގެން މެދުކެނޑުމެއްނެތި މި މުބާރާތް އަންނަނީ ބާއްވަމުންނެވެ. މި މުބާރާތް ހުޅުވާލާފައިވަނީ އެމް.އެން.ޔޫގެ ފެކަލްޓީތަކާއި ދިވެހިރާއްޖޭގެ އެހެނިހެން ކޮލެޖުތަކަށެވެ. މުބާރާތުގައި ފިރިހެން ޑިވިޜަނާއި އަންހެން ޑިވިޜަން ހިމެނެއެވެ. މުބާރާރުގައި އަންހެން ޑިވިޜަން އެންމެ ފުރަތަމަ ހިމެނީ 2018ވަނަ އަހަރުއެވެ.
ލިޔުނީ: ޝީޒާ މުޙައްމަދު،
އެމް.އެން.ޔޫ.އެސް.ޔޫ މީޑިއާ
