އެމް.ޑަބްލިއު.އެސް.ސީ އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2019ގެ އަންހެން ޑިވިޜަންގެ ފައިނަލުން ޖާގަ ހޯދީ އެމް.އެން.ޔޫގެ ފެކްލްޓީ އޮފް އެޑިއުކޭޝަން (އެފް.އީ)އާއި އެމް.އައި ކޮލެޖެވެ. މިދެޓީމު ފައިނަލުން ޖާގަ ކަށަވަރުކުރީ ރޭ ކުޅެވުނު ސެމީފައިނަލްގެ މެޗުތަކުން މޮޅުވެގެންނެވެ.
ސެމީ ފައިނަލުގައި ރޭ ސައިރިކްސްއާއި އެފް.އީ ވާދަކުރި މެޗުން އެފް.އީ މޮޅުވީ 1-2ގެ ނަތީޖާއަކުންނެވެ. މެޗުގެ ފުރަތަމަ މިނެޓުގައި ސައިރިކްސްއިން ގޯލުޖަހާފައިވީނަމަވެސް އެފް.އީ ވަނީ ފަހަތުން އަރާ 2 ލަނޑު (މެޗުގެ 6 އަދި 19ވަނަ މިނެޓުގައި) ޖަހާފައެވެ. މެޗުގެ މޮޅު ކުޅުންތެރިއަކަށް ހޮވުނީ އެފް.އީގެ ޖާރޒީ ނަންބަރު 9، ޚާތިމާ ޔޫސުފްއެވެ.
ސެމީ ފައިނަލްގައި އެމް.އައިއާއި ވާދަކުރީ ވިލާ ކޮލެޖެވެ. މިމެޗު ޝަރަފުވެރި ކޮށްދެއްވީ އެމް.އެން.ޔޫގެ ޑީން އޮފް ސްޓުޑެންޓްސް ނާދިޔާ އަޙްމަދު އަދި ލެކްޗަރަރ އަލްފާޟިލާ ފާޠިމަތު ޝަޢުޤީއެވެ. ވާދަވެރި ކުޅުމަކަށްފަހު އެމް.އައި މެޗު ކާމިޔާބކުރީ 1-3ގެ ނަތީޖާއަކުންނެވެ. މޮޅު ކުޅުންތެރިއަކަށް ހޮވުނީ އެމް.އައިއަށް ދެލަނޑު ކާމިޔާބުކޮށްދިން ޖާރޒީ ނަންބަރު 6، އާމިނަތު ޝާމިލާއެވެ. އާމިނަތު ޝާމިލާ ވަނީ ފުރަތަމަ ހާފުގެ 5ވަނަ މިނެޓުގައި މެޗުގެ ނަތީޖާ އެއްވަރުކޮށްދިން ގޯލު ޖަހައިދީފައެވެ.
އެފް.އީއާއި އެމް.އައި މުބާރާތުގެ ފައިނަލް މެޗަށް ނިކުންނާނީ މިއަދު ހަވީރު 03:45ގައެވެ. މިމެޗު އޮންނާނީ އެކުވެނި ވެލިދަނޑުގައެވެ.
އެމް.ޑަބްލިއު.އެސް.ސީ އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2019ގެ ޓައިޓްލް ސްޕޮންސަރަކީ މާލޭ ވޯޓަރ އެންޑް ސްވަރޭޖް ކޮމްޕެނީ (އެމް.ޑަބްލިއު.އެސް.ސީ)އެވެ. މި މުބާރާތުގެ ޕްރިންޓިންގ ޕާޓްނަރަކީ އެމް 7އެވެ. ސްޕޮންސަރުންނަކީ ދިރާގު އަދި ވިޒިޓް ލާމްއެވެ. މީޑިއާ ޕާޓްނަރަކީ ޕީ.އެސް.އެމް ސްޕޯޓްސްއެވެ.
އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ޘާނަވީ ދާއިރާގައި ބާއްވާ އެންމެބޮޑު ކުޅިވަރު ޙަރަކާތެވެ. މި މުބާރާތް ރާވައި އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)އިންނެވެ. މި އަހަރު މި ބާއްވަނީ މީގެ 7ވަނަ މުބާރާތެވެ. 2013އިން ފެށިގެން މެދުކެނޑުމެއްނެތި މި މުބާރާތް އަންނަނީ ބާއްވަމުންނެވެ. މި މުބާރާތް ހުޅުވާލާފައިވަނީ އެމް.އެން.ޔޫގެ ފެކަލްޓީތަކާއި ދިވެހިރާއްޖޭގެ އެހެނިހެން ކޮލެޖުތަކަށެވެ. މުބާރާތުގައި ފިރިހެން ޑިވިޜަނާއި އަންހެން ޑިވިޜަން ހިމެނެއެވެ. މުބާރާރުގައި އަންހެން ޑިވިޜަން އެންމެ ފުރަތަމަ ހިމެނީ 2018ވަނަ އަހަރުއެވެ.
ލިޔުނީ: ޝީޒާ މުޙައްމަދު،
އެމް.އެން.ޔޫ.އެސް.ޔޫ މީޑިއާ
