ފުޓްސަލް ޓީމްގެ ބައިވެރިން ހޯދީވަރަށްވެސް ރަނގަޅު ކާމިޔާބީއެއް- ނިޔަރެސް

ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން އެމް.އެން.ޔޫ.އެސް.ޔޫ އިން އިންތިޒާމުކޮށްގެން ކޮންމެ އަހަރަކުވެސް ބާއްވަމުން އަންނަ އެންމެ ބޮޑު ޙަރަކާތަކީ “އެމް.އެން.ޔޫ.އެސް.ޔޫ ފުޓްސަލް ފިއެސްޓާ” އެވެ. މީގެ  އަހަރުތަކެއް ކުރިން ފެށި މި މުބާރާތަކީ އެމް.އެން.ޔޫ.އެސް.ޔޫގެ އެންމެ ދުވަސްވީ ޙަރަކާތަށްވީ އިރު ސުކޫލް އޮފް ނާސިން، ނިޔަރެސް(އެމް.އެން.ޔޫ.އެސް.ޔޫ)ގެ ޓީމް އެއް ބައިވެރިވި މިއީ ފުރަތަމަ ފަހަރެވެ.

ނިޔަރެސްގެ މި ފުޓްސަލް ޓީމްގެ ގިނަ ބައިވެރިންނަކީ ފުޓްސަލް ކުޅުމަށް ވަރަށްވެސް އާ ކުދިންތަކެއްކަންވެސް ފާހަގަ ކޮއްލަމެވެ. ނަމަވެސް ހުރިހާބައިވެރިންގެވެސް ގަދަ ހިއްވަރާ އަޒުމާ އެކު ޕުރެކްޓިސްތަކަށް ބަރާބަރަށް ހާޒިރުވަމުން ދިޔައެވެ. މުބާރާތައް މި ފުޓްސަލް ޓީމް ނިކުތީ ވަރަށްވެސް ޖޯޝާ ހިއްވަރާ އެކު މި މުބާރާތުން ރަނގަޅު ކާމިޔާބީއެއް ހޯދުމުގެ އަމާޒުގައެވެ.

ނިޔަރެސްގެ ޓީމް ގުރޫޕް ސްޓޭޖްގެ މެޗުތައް ފޯރިގަދަ ކުޅުމަކާއެކު ކާމިޔާބު ކުރިއެވެ. މި މެޗުތަކުގެ އެންމެ މޮޅު ކުޅުންތެރިންނަށް ހޮވިގެން ގޮސްފައިވަނީވެސް ނިޔަރެސްގެ ޓީމްގެ ކުޅުންތެރިންނެވެ. އެއާ އެކު ނިޔަރެސްގެ ޓީމް ކުއާޓަރ ފައިނަލްސް އަށް ދަތުރުކުރި އެވެ. ކުއާޓަރ ފައިނަލްސްގައި ނިޔަރެސް ވާދަކުރަންޖެހުނީ މިމުބާރާތުގެ އެންމެމޮޅު އެއްޓީމް އާއެވެ. ކުއާޓަރ ފައިނަލްސް އިން ނިޔަރެސްގެ ޓީމް ބަލިވެ، މުބާރާތުން ވަކިވެގެން ދިޔައީ ވަރަށްވެސް ފޯރިގަދަ ކުޅުމެއް ދައްކައިފައެވެ.

ނިޔަރެސް ޓީމްގެ ދަރިވަރުންނަކީ ވަރަށްވެސް ހިއްވަރުގަދަ ކެރޭ ކުދިންތަކެއްކަން މިފަދަކޮންމެ މުބާރާތަކުންވެސް ފެނިގެން ދެއެވެ. އެހެނީ ނިޔަރެސް ޓިމްގެ ދަރިވަރުން ދިޔައީ އެކުދިންގެ ކިޔެވުމަށް ވަރަށްވެސް ފަރުވާތެރިވަމުންނެވެ. މިކުދިން މިކުރި ހިއްވަރަށް، ފައްފަށުން ތައުރީފު ކުރަމުން ނިޔަރެސްގެ ޕުރެޒިޑެންޓް އަމިނަތް ނަޒީހާ ބުނެފައިވެއެވެ.

”މިކުދިން ކުރި ހިއްވަރަށް، ވަރަށްވެސް އުފާކުރަން، މިކުދިން މިހާ ހިސާބަށް އާދެވުނީ ހަމަ އެކުދިންގެ ހިއްވަރުން، އެހެނީ ކުލާސްތަކަށާއި ހޮސްޕިޓަލްގެ ޑިއުޓީތަށް ބަރާބަރަށް ހާޒިރުވަމުން، އެއްވެސް ވަރުބަލިކަމެއް ނެތި މިކުދިން މި ކުރާ ހިއްވަރަށް ހަމަ ސާބަސް ދޭހައިވޭ “ ނަޒީހާ

އާދެ މި ފުޓްސަލް ފިއެސްޓާ ގައި ބައިވެރިވި ޓީމު ތަކުގެ ތެރެއިން އެންމެ ބުރަކޮށް އުޅުނު އެއްޓީމަކަށް ނިޔަރެސް ޓީމްގެ ވާނެކަމާ މެދު ޝައްކެއްނެތެވެ. އަދި މި މުބާރާތުން ލިބުނު ކާމިޔާބީއަށް ވަރަށްވެސް އުފާކުރާ ކުރާކަމާ، ދެންފަހަރަކުން މިޔަށްވުރެ ރަނގަޅު ކާމިޔާބީއެއް ހޯދަން ނިޔަރެސްގެ ޓީމް ތިބީ އަތުކުރި އޮޅައިލައިގެނެވެ.

ފާތިމަތު އަބޫބަކުރު

މީޑިޔާ ކޯޑިނޭޓަރ

ނިޔަރެސް، އެމް،އެން،ޔޫ،އެސް،ޔޫ