ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ 9 ވަނަ ރައީސަކަށް ޢަބްދުﷲ ޝަހުނީޒް އިންތިޚާބުވެ އެ މަޤާމާ ޙަވާލުވެވަޑައިގެން ދެއްކެވި ވާހަކަފުޅުގައި އެމް.އެން.ޔޫ.އެސް.ޔޫގެ ނަމުގައި އޮންލައިން ނޫސް/މަޖައްލާއެއް ރަޖިސްޓަރީ ކުރުމުގެ މަސައްކަތް ފަށާނެކަމަށް ވިދާޅުވެއްޖެއެވެ.
އެމް.އެން.ޔޫ.އެސް.ޔޫގެ 9 ވަނަ ދައުރުގެ ހިންގާ ކޮމިޓީ މެންބަރުންނަށް މަގާމުތައް ހަވާލުކުރުމަށް ނޮވެންބަރު 08ވީ އާދިއްތަދުވަހު ހެނދުނު ބޭއްވުނު ޖަލްސާގައި މަގާމާ ހަވާލުވެލެއްވުމަށް ފަހު ރައީސް އަބްދުﷲ ޝަހުނީޒް ދެއްކެވި ވާހަކަފުޅުގައި އެބޭފުޅާގެ ދައުރުގައި ކުރުމަށް ރާވާފައިވާ ގިނަ ކަންތައްތަކަށްވަނީ އަލިއަޅުއްވާލާފައެވެ.
މިގޮތުން ޑީން އޮފް ސްޓޫޑެންޓްސްގެ މަޝްވަރާއާއި ލަފައާއި އެކު ކުރިއަށް އޮތް އަހަރު ދުޅަހެޔޮ ސިއްހަތާއި ތިމާވެށްޓަށް ސަމާލުކަމެއްދީގެން ހަރަކާތްތަކެއް ހިންގުމަށް ހަމަޖެހިފައިވާ ކަމަށް ރައީސް ވިދާޅުވިއެވެ. ޔުނިވާރސިޓީގެ އަހަރީ ދުވަހާއި ގުޅިގެން މިފެށޭ އަހަރު ބޮޑު ހިނގާލުމެއް ބޭއްވުމުގެ އިތުރުން މެގަޒިން ހެދުމަށް ކުރެވުނު އިންތިޒާރަށް ނިމުން އަންނާނޭކަމަށް ވެސް ރައީސްގެ ވާހަކަފުޅުގައި ފާހަގަކުރެއްވިއެވެ.
ދަރިވަރުންގެ ޔޫނިއަން އިތުރު ހަރުފަތަކަށް ގެންދިއުމަށާއި ލާމަރުކަޒީ އުސޫލުން ކަންކަން ރާވައި ހިންގާނޭކަމަށާއި، މިފެށޭ އަހަރު ކުލަބް ތަކެއް އުފެއްދުމުގެ މަސައްކަތްތައް ފެށިގެންދާނޭކަމަށްވެސް ރައީސްގެ ވާހަކަފުޅުގައި ފާހަގަ ކުރެއްވިއެވެ.
ރައީސް ޝަހުނީޒްގެ ވާހަކަފުޅުގައި ވަރަށް ބޮޑަށް އެމް.އެން.ޔޫ.އެސް.ޔޫގެ މީޑިޔާގެ ހަރަކާތްތަކަށް އަލި އަޅުއްވާލައްވައި ވާހަކަދައްކަވާފައިވެއެވެ.
”އިރާދަކުރެއްވިއްޔާ އަންނަ އަހަރު އަޅުގަނޑުމެންގެ ހަރަކާތްތައް ލައިވް ކުރާނީ އަޅުގަނޑުމެން“
– ރައީސް ޝަހުނީޒް
މީގެއިތުރުން ޔޫނިއަންގެ ވެބްސައިޓަށް ރަނގަޅު ހެޔޮ ބަދަލުތަކެއް ގެނެވިގެން ދާނޭކަމަށްވެސް ރައީސް ވިދާޅުވިއެވެ. މިގޮތުގެ މަތީން ދަރިވަރުންގެ ޝަކުވާ އާއި ހިޔާލު ހުށަހަޅާނޭ ޕޯޓަލްއެއް އިތުރުކުރެވިގެންދާނޭ ކަމުގެ އުފާވެރި ޚަބަރު ވަނީ ރައީސް ދެއްވާފައެވެ. ގައުމީ ޔުނިވާރސިޓީ އިޝްތިހާރުކުމާއި ސޯޝަލް މީޑިއާގައި ހިންގަމުންގެންދާ ހަރަކާތްތަކާ ބެހޭ ގޮތުންވެސް ވަނީ ޝަހުނީޒް ވާހަކަފުޅު ދައްކަވާފައެވެ. އަދި އެމް.އެން.ޔޫ.އެސް.ޔޫ މީޑިއާ އަކީ ކޮބައިކަމާއި އަދި މަޤްޞަދުވެސް ރައީސްވަނީ ވަރަށް ފުރިހަމައަށް ތަފްސީލުކޮށްދެއްވައިފައެވެ.
މިޖަލްސާގައި ރައީސްގެ ވާހަކަފުޅު ނިންމަވާލެއްވުމުގެ ކުރިން ވަނީ މިއަހަރުގެ އެޑްވައިޒަރީ ބޯޑުގެ މެންބަރުން އިޢުލާންކުރައްވާފައެވެ. މިބޯޑުގެ މެންބަރުންގެ ގޮތުގައި އަރުޝަދް އަޝްރަފް ، މުހައްމަދު ޝާން އާމިރު، އަލީ ޝައްމޫން، އާދަމް ރުޝްދީގެ އިތުރުން އަލީ އަމީރު ހަމަޖައްސަވާފައިވާ ކަމަށް ވިދާޅުވިއެވެ.
ދަރިވަރުންގެ ޔޫނިއަންއަކީ 2012 ވަނަ އަހަރު ވުޖޫދަށް އައިސް އެތައް ބައެއްގެ ހިތްވަރާއި މިންނަތުން ކުރިއަށްގެންދާ މަދަނީ ޖަމިއްޔާއެކެވެ. މިޖަމިއްޔާގެ އުއްމީދަކީ ހިންގޭ ހަރަކާތްތައް އިތުރުކުމުގެ ބަދަލުގައި ހިންގޭ ޙަރަކާތްތަކުގެ ފެންވަރު އިތުރުކޮށް ގިނަ ދަރިވަރުން ބައިވެރިކުރުމެވެ.
ލިޔުނީ: ފާޠިމަތު ޝާމިލާ އަޙްމަދު،
އެމް.އެން.ޔޫ.އެސް.ޔޫ މީޑިއާ
