ފެކަލްޓީ އެފް އެޑިއުކޭޝަންގެ ދަރިވަރުން ދިވެހި ބަހުގެ ދުވަސް ވަރަށް ކުލަގަދަކޮށް ފާހަގަކޮށްފިއެވެ. ދިވެހި ބަހުގެ ދުވަހުގެ ގޮތުގައި ފާހަގަކުރުމަށް ސަރުކާރުން ކަނޑައަޅާފައިވާ ދުވަހަކީ ކޮންމެ އަހަރެއްގެ ވެސް އޭޕްރިލް 14 ވަނަ ދުވަހެވެ. މި އަހަރުގެ ދިވެހި ބަހުގެ ދުވަހުގެ ޝިއާރަކީ ”ޤައުމީ އެއބައިވަންތަކަމަށްޓަކައި – އެންމެންގެ ސަމާލު ކަން ދިވެހި ބަހަށް“. މި ޝިއާރުން ދޭހަ ކޮށްދެނީ ދިވެހިންގެ އެއްބައިވަންތަކަމުގެ އެއް އަސާސް ކަމުގައިވާ ދިވެހިބަސް، ދިވެހި މުޖުތަމައުގެ އެއްބައިވަންތަކަމަށްޓަކައި ރައްކާތެރި ކޮށް ކުރިއަރުވައި ތަރައްގީކުރަން ޖެހޭކަމެވެ.
ދިވެހިބަހުގެ ދުވަސް ފާހަގަ ކުރުމުގެ ގޮތުން ބޭއްވި ހަފްލާގައި ދިވެހިރާއްޖޭގެ ގައުމީ ޔުނިވަރސިޓީގެ ވައިސް ޗާންސެލަރ އަލްފާޟިލާ އާއިޝަތު ޝާހީން، ފެކަލްޓީ އޮފް އެޑިކޭއުޝަންގެ ޑީން އަލްފާޟިލާ މަރިޔަމް ފިޒާނާ ރަޝީދު، ފެކަލްޓީ އޮފް އެޑިއުކޭޝަންގެ ދިވެހި މުދައްރިސް އާދަމް ޒާހިރުގެ އިތުރުން އެމް.އެން.ޔޫ.އެސް.ޔޫ އިންވެސް ވަނީ ބައިވެރިވެ ވަޑައިގެންފައެވެ.
އަދި ފެކަލްޓީ އޮފް އެޑިއުޝަންގައި ފުލްޓައިމް ކޮށް ތައުލީމު ހާސިލު ކުރަމުންދާ ހުރިހާ ބެޗްތަކުން ވެސް ވަނީ ހަރަކާތްތެރިވެފައެވ ދިވެހި ބަސް ހިމާޔަތް ކުރުމުގެ މުހިންމުކަމާއި ބެހޭގޮތުން ދަރިވަރުންނާއި މުޚާތަބުކޮށް ވާހަކަފުޅު ދައްކަވަމުން ފެކަލްޓީ އޮފް އެޑިއުކޭޝަންގެ ޑީން އަލްފާޟިލާ މަރިޔަމް ފިޒާނާ ރަޝީދު ވަނީ އިބްރަތްތެރި ވާހަކަ އެއް ދަރިވަރުންނާ ހިއްސާކޮށްދެއްވާފައެވެ. އަދި ދިވެހި ބަހަކީ ވަރަށް މުއްސަނދި ބަހެއްކަން ދަރިވަރުންނަށް ހަނދާން ކޮށްދީ، ދިވެހި ބަސް ދިރުވާ އާލާކުރުމަށް މަސައްކަތް ކުރުމަށް ކޮންމެ ދަރިވަރަކުވެސް މަސައްކަތްކުރުމަށް ހިއްވަރުދެއްވާފައެވެ. ދިވެހިރާއްޖޭގެ ގައުމީ ޔުނިވަރސިޓީގެ ވައިސް ޗާންސެލަރ އަލްފާޟިލާ އާއިޝަތު ޝާހީން ދަރިވަރުންނާއި މުޚާތަބުކޮށް ދެއްކެވި ވާހަކަފުޅުގައި، ދަރިވަރުންގެ ކިބައިން ދެ ކަމަކަށް އެދިވަޑައިގަތެވެ. ފުރަތަމަ ކަމަކަށް ދިވެހި ބަހާއި އެހެނިހެން ބަސްތައް މަސްހުނިކޮށްގެން ވާހަކަ ނުދެއްކުމަށް އެދިވަޑައިގެންފައިވެއެވެ. ދިވެހި ބަހާއި އެހެނިހެން ބަސް މަސްހުނިކޮށްގެން ވާހަކަ ދެއްކުމަކީ ދިވެހިބަހަށް ވެވޭ ޚިޔާނާތެއްކަން ދަރިވަރުންނަށް ވަނީ ހަނދާންކޮށް ދެއްވާފައެވެ.ހަމަ އެފަދައިން ފެކަލްޓީ އޮފް އެޑިއުކޭޝަންގައި ތަޢުލީމު ހާސިލު ކުރަމުންދާ ހުރިހާ ދަރިވަރުންނަކީވެސް މުސްތަޤުބަލުގައި މުދައްރިސުން ކަމަށްވާތީ، ދަރިވަރުން ޝައުގުވެރިވާ ފަދަ ގޮތަކަށް ، ދަރިވަރުންނާއި ހަމައަށް ދިވެހިބަސް ފޯރު ކޮށްދިނުމީ ޝާހީން މިސް އެދިލައްވާ ކަމެކެވެ.
މީގެ އިތުރުން ފެކަލްޓީ އޮފް އެޑިއުކޭޝަންގެ ދިވެހި މުދައްރިސް އަލްފާޟިލް އާދަމް ޒާހިރު ދަރިވަރުންނާއި މުހާތަބުކޮށް ވާހަކަފުޅު ދައްކަވަމުން ވިދާޅުވެފައިވަނީ ޤައުމިއްޔަތު ދިރުވުމާއި، ޤައުމިއްޔަތު ވެއްޓުން ވެސް ގުޅިފައިވަނީ މާދަރީބަހާއި ކަމަށެވެ. އަދި މާދަރީބަސް ނެތިދިޔުމުގެ ހިތިކަން ނޫނީ ނިކަމެތިކަން އިހުސާސް ކުރެވޭނީ މާދަރީބަސް ނެތް ދުވަހަކުންކަން ދަރިވަރުންނަށް ހަނދާންކޮށްދެއްވާފައިވެއެވެ. އަދި ދިވެހިބަހުގެ ދުވަހުގެ މުނާސަބަތުގައި ފެކަލްޓީ އޮފް އެޑިއުކޭޝަންގެ ދަރިވަރުންނަށް ދިވެހި މުދައްރިސް ވަނީ ހަތް ގަޑިއިރުގެ ޅެން ހެދުމުގެ ކޯހެއްގައި ހިލޭ ބައިވެރިވުމުގެ ފުރުސަތު ފަހި ކޮށްދެއްވާފައެވެ. މި ހަފްލާ ނިމިގެންގޮސްފައިވަނީ ހަފްލާގައި ބައިވެރިވި އެންމެހާ ފަރާތްތަކަށް ތައްޔާރުކުރެވިފައިވާ ދިވެހި ކެއުމަކުނެވެ.
