އެމް.އެން.ޔޫ.އެސް.ޔޫ އިންޓަރ ފެކަލްޓީ ބަހުސް މުބާރާތް 2019 ގެ ދެވަނަ ބުރުގައި އެންމެ މަތިން ޕޮއިންޓް ހޯދައި ފެކަލްޓީ އޮފް ލޯ އެންޑް އިސްލާމިކް ސްޓަޑީޒް ގެ އޭ ޓީމު މިހާރުވަނީ ފައިނަލުން ޖާގަ ހޯދާފައެވެ.
ދެވަނަ ބުރުގައި ވާދަވެރި ތިން ބަހުސެއް ކޮށްފައިވާއިރު މުބާރާތުގެ 7 ވަނަ ބަހުސްގައި ބައްދަލުކުރީ ފެކަލްޓީ އޮފް އެޑިއުކޭޝަން (އެފް.އީ)ގެ އޭ ޓީމާއި ފެކަލްޓީ އޮފް އާޓްސް (އެފް.އޭ)ގެ އޭ ޓީމެވެ. މި ބަހުސް 819-672 އިން އެފް.އޭ ގެ އޭ ޓީމު ކާމިޔާބުކޮށް، މިޓީމުން ވަނީ މުބާރާތުގެ ސެމީފައިނަލުން ޖާގަ ކަށަވަރު ކޮށްފައެވެ. މި ބަހުސްގެ އެންމެ މޮޅު ބަހުސް ކުރުންތެރިއަކަށް ހޮވިފައިވަނީ ފެކަލްޓީ އޮފް އާޓްސްގެ އޭ ޓީމްގެ މުޙައްމަދު ރާއިދް ސައީދެވެ.
މުބާރާތުގެ 8 ވަނަ ބަހުސްގައި ބައްދަލުކުރީ ފެކަލްޓީ އޮފް ލޯ އެންޑް އިސްލާމިކް ސްޓަޑީޒް ގެ އޭ ޓީމާއި އެމްއެންޔޫ ބިޒްނަސް ސްކޫލެވެ. 857-852 ޕޮއިންޓްގެ ކުޑަ ފަރަގަކުން 2018 ވަނަ އަހަރުގެ އެއްވަނަ ޓީމް، އެމް.އެން.ޔޫ ބިޒްނަސް ސްކޫލުގެ މައްޗަށް ކުރި ހޯދީ ފެކަލްޓީ އޮފް ލޯ އެންޑް އިސްލާމިކް ސްޓަޑީޒް (އެފް.އެލް.އައި.އެސް)ގެ އޭ ޓީމެވެ. މުބާރާތުގެ ގަވާއިދުގައިވާ ގޮތުން ދެވަނަ ބުރުގައި އެންމެ މަތިން ޕޮއިންޓް ހޯދާ ޓީމެއް ސީދާ ފައިނަލަށް ދަތުރުކުރާނެއެވެ. އެހެންކަމުން ދެވަނަ ބުރުގައި އެންމެ މަތިން ޕޮއިންޓް ހޯދާފައިވާ ޓީމުކަމުގައިވާ ފެކަލްޓީ އޮފް ލޯ އެންޑް އިސްލާމިކް ސްޓަޑީޒް ގެ އޭ ޓީމު މިހާރުވަނީ ފައިނަލުގެ ޖާގަ ކަށަވަރު ކޮށްފައެވެ. 377 ޕޮއިންޓާއެކު މިބަހުސްގެ އެންމެ މޮޅު ބަހުސްކުރުންތެރިއަކަށް ހޮވުނީ އެފް.އެލް.އައި.އެސްގެ އޭ ޓީމުގެ އައިޝަތު ޒަހާއެވެ.އަދި މިއީ މިހާތަނަށް މި މުބާރާތުގައި އެންމެ މަތިން ޕޮއިންޓް ހޯދާފައިވާ ބައިވެރިއާއެވެ.
ދެވަނަ ބުރުގެ ފަހު ބަހުސް އަދި މުބާރާތުގެ 9 ވަނަ ބަހުސްގައި ބައްދަލުކުރީ ފެކަލްޓީ އޮފް ލޯ އެންޑް އިސްލާމިކް ސްޓަޑީޒްގެ ބީޓީމާއި ފެކަލްޓީ އޮފް އެޑިއުކޭޝަންގެ ބީ ޓީމެވެ. 835-739 އިން އެފް.އީ ގެ ބީ ޓީމު ބަލިކޮށް ސެމީ ފައިނަލުގައި ވާދަކުރާނެ ދެވަނަ ޓީމަކަށް ހޮވުނީ ފެކަލްޓީ އޮފް ލޯ އެންޑް އިސްލާމިކް ސްޓަޑީޒްގެ ބީ ޓީމެވެ. މި ބަހުސްގެ އެންމެ މޮޅު ބަހުސް ކުރުންތެރިއަކަށް ދެބައިވެރިއަކު ހޮވިފައި ވާއިރު ދެ ބަހުސް ކުރުންތެރިންނަކީ އެފް.އެލް.އައި.އެސްގެ ބީ ޓީމުގެ އަޙުމަދު ތޯއިލް އާއި އާމިނަތު ނަސޫހާ ރަޝީދެވެ.
މުބާރާތުގެ ސެމީ ފައިނަލުގެ ބަހުސްތައް ކުރިޔަށްދާނީ އޮގަސްޓް 30 ވާ ހުކުރު ދުވަހުގެރެއެވެ.
ލިޔުނީ: ޝަމާ މުޙައްމަދު
މީޑިއާ ކޯޑިނޭޓަރ އެމް.އެން.ޔޫ.އެސް.ޔޫ
