މިއަދަކީ މުދައްރިސުންގެ ދުވަހެވެ.
ޅައިރުގައި ގިނަދުވަސްތައް ހޭދަކުރެވުނީރަށްރަށުގައި ކަމުން ހަދާނަށް އަންނަނީ އެތަކެއް އަހަރު ކުރިއެވެ.
ބޮޑުމަގަށް މޫދާ ދިމާލަށް އެހެރަފައިބައިގެން އަންނަނީ މުދައްރިސެވެ. އެއްކުޖަކަށް މިމަންޒަރުފެނުމާއި އެކު ”މުދައްރިސް އެބައާދެއޭ“ ގޮވަމުން ގޭދޮށަށް ދުއްވައިގެންފިއެވެ. ދެންތިބި ކުދިންވެސް ބެލީ މުދައްރިސަށް ނުފެނި އަވަސްއަވަހަށް ގެޔަށްދެވޭތޯއެވެ. މުދައްރިސް އެ އައީ ހުކުރަށް ދާ ގަޑި ޖެހޭއިރުވެސް ކުދިން މޫދުގައި ތިބީމައެވެ. ބެލެނިވެރިންގެ އެދުމުގެ މަތިން ކުދިން ހުކުރަށް ފޮނުވާށެވެ.
މިގޮތަށް ކޮންމެ ނަމާދަކަށް ވެސް ކުދިން އަރާތޯ މުދައްރިސް ބައްލަވާނެއެވެ. ހެދުނު ސުކޫލަށް ކުދިން އައުމާއި އެކު ފަތިސްނަމާދަށް ނުދާކުދިންނަށް ނަސޭހަތްތެރިވާނެއެވެ. ބައެއްފަހަރު އަދަބުވެސް ލިބޭނެއެވެ. އެތައް ސޮފްހާއެއް ލިޔުއްވާނެއެވެ. ”ކޮންމެ ދުވަހަކުވެސް އަހަރެން ނަމާދަށް ދާނަމެވެ.“ މިކަހަލަ ކޮންމެވެސް އިބާރާތެކެވެ. މި ނުލިޔުނަސް ކަންތަކާ ޖެހުނީއެވެ.
ސްކޫލުގެ އެކިއެކި ސަރަހައްދުތައް ހުންނާނީ ބަހާލެވިފައެވެ. އެކި އެކި ހައުސްއަށް އެކި ތަނެވެ. އަދި ކޮންމެ ހައުސްއަކަށް މުދައްރިސަކު ހުންނަވާނެއެވެ. ސުކޫލުނިންމާ ރަނގަބީލު ޖެހުމަކުން އަދި ނިމުނީ ކީނޫނެވެ. ކޮންމެ ކުއްޖަކުވެސް އަވަސްއަވަހަށް ގެޔަށް ގޮސް ކައިހަދައިގެން އަންނާނީ ސްކޫލަށެވެ. އޭރު މުދައްރިސްވެސް ހުންނަވާނީ ސްކޫލުގައެވެ. ދެން އަވަސްވެގަންނާނީ ލިބިފައިވާ ތަނުގައި އެކިވައްތަރުގެ މާގަހާއި ތަރުކާރީގަސް އިންދާށެވެ. މިހުރިހާ ކަމެއްގައިވެސް ލަފާދޭން ހުންނަވާނީ މުދައްރިސެވެ.
ހަވީރުގަޑި ޖެހުމާއިއެކު އެވީ ބަށިމުބާރާތަށް ނޫނީ ފުޓުބޯޅަ މުބާރާތަށް ތައްޔާރުވާން ފަރިތަކުރުންތަށް ފަށާށެވެ. މުބާރާތެއްނެތަސްކޮންމެ ދުވަހަކުވެސް ކުޅެންދާނެއެވެ. މިހުރިހާކަމެއްގައި އުޅޭއިރުވެސް އެންމެގާތުގައި ހުންނަވާނީ މުދައްރިސެވެ.
އިރުއޮށްސުމުން އެންމެންގެތަކަށްގޮސް ދެންއިވޭނީ ދެނަމާދު ދޭތެރޭ ގުރުއާން ކިޔަވާއަޑެވެ. ރޭގަނޑު ނުވަޔެއްގެ ފަހުން ބޭރަކަށް ނުދެވޭނެއެވެ. އެއްކަލަ މުދައްރިސް ރަށުތެރޭގައި ރޭނގަޑު ނުނިދާ އުޅެނީ ކޮންކުދިންނެއްތޯބަލާނެއެވެ. މުދައްރިސްގެ ޒިންމާ މައިންބަފައިންނަށް ވުރެ ބޮޑެވެ. ސައްވީސް ގަޑިއިރު އެހުންނަވަނީ އަހަރުމެން އުޅޭ ނޫޅޭ ބަލާށެވެ.
އާދެ! ޢޭރު މުދައްރިސުންނަކީ ބަސްބުނާ ރަށުގެ ކަމުވޮށިވެގަންވާމީހުންނެވެ. ރައްޔިތުން އަހާނީ މުދައްރިސުން ބުނާ އަޑެވެ. އޭރު މުދައްރިސުންނަކީ މުޖުތަމުގައި ގަދަރުވެރި އިހްތިރާމް ލިބިގެންވާ މީހުންނެވެ. މުދައްރިސުކަން ކުރުމަކީ އާދައިގެ ކަމެއްނޫނެވެ. އެއީ އިހްލާސްތެރި ހިތަކައިގެން މެނުވީ ނުކުރެވޭނެކަމެކެވެ. މުޖުތަމައުގެ ލޯތްބާއި އިހްތިރާމް ހޯދައިފައިވަނީ މުޖުތަމައުގެ ދަރިން ތަރުބިއްޔަތުކުރުމުގައި އެފަދަ ދެވަނައެއްނެތީތީއެވެ. ގިނަފަހަރަށް މައިންބަފައިންނަށްވުރެ މުދައްރިސުންނަށް ކުދިންނަށް ދެވޭސަމާލުކަންބޮޑެވެ. ކުއްޖާގެ ދިރިއުޅުމުގައި ގިނަފަހަރަށް ރަނގަޅު ބަދަލެއްގެނުވައިދެނީ ކޮންމެވެސް މުދައްރިސެކެވެ.
އެހެންނަމަވެސް މިއަދު މަންޒަރު ބަދަލުވެ، މުދައްރިސުންނަކީ މުޖުތަމައުގައި އިހްތިރާމް ލިބިގެންވާ ބަޔަކު ކަމުގައި މިވަނީ ހަދަންޖެހިފައެވެ. މުދައްރިސުންގެ ބުރަ ބޮޑު މަސްއޫލިއްޔަތު އަދާކުރަނީ އެތަށްބައިވަރު ގޮންޖެޖުންތަކަކާއެކުއެވެ. މުދައްރިސުންވާ ގުރުބާނީ އަކީ އަގަކުން އަދާކުރެވޭނެ އެއްޗެއްނޫނެވެ. އެހެންނަމަވެސް މުދައްރިސުން ކުރާމަސައްކަތަށް ގަދަރުވެރި ދިރިއުޅުމެއް އުޅެވޭނެވަރުގެ އުޖޫރައެއްލިބެންޖެހޭނެކަމުގައި ދެކެމެވެ. މިދާއިރާ ދޫކޮށް ނުހަނު ލޯތްބާއިއެކު ފެށިމަސައްކަތް ދޫކޮށްދާންޖެހޭ ސަބަބު ހޯދަންޖެހެއެވެ.މިދާއިރާއަށް ޝައުގުވެރިކަން އިތުރުކުރަން މަސައްކަތްތަކެއް މިވަނީ މިއަދު ކުރަންޖެހިފައެވެ.
އެންމެ ފުރަތަމަކަމަކީ މުދައްރިސުންނަކީ މުޖުތަމައުގައި އިހްތިރާމް ލިބިގެންވާ ގަދަރުވެރިބަޔަކަށް ހެދުމެވެ. މުޖުތަމު ބިނާކުރުމުގައި ހޭބޯނާރާ އުޅޭއިރު މުދައްރިސުންގެ ބަސް ކުދިން އަހާނީ މުޅި މުޖުތަމައުވެސް މުދައްރިސުންނަށް އިޚްތިރާމާއި ލޯބިދީގެންނެވެ. ފާހަގަކުރާ އެންމެ ދުވަހަކުން މިކަމެއްނުވާނެއެވެ. އެއީ ކޮންމެ ދުވަހަކީވެސް މުދައްރިސުންގެ ދުވަހަށްވީތީއެވެ. މިއަދު މުދައްރިސުންގެ ދުވަސްފާހަގަ ކުރެވޭއިރު މިއީ އެންމެ ދުވަހެއްގެ ކަމަކަށް ނުހަދަމާތޯއެވެ. މުދައްރިސުންނަށް ހައްގުވާ އިހްތިރާމާއި ލޯބި އަލުން އިއާދަކުރަން މަސައްކަތް ފަށަމާތޯއެވެ.
ހުރިހާ މުދައްރިސުންނަށާއި މުދަރިސްކަންކިޔަވާ ދަރިވަރުންނަށް ދުވަހުގެ ތަހުނިޔާ ލޯތްބާއިއެކު އަރިސްކުރަން.
ލިޔުއްވީ: މަރިޔަމް ފިޒާނާ ރަޝީދު
ޑީން، ފެކަލްޓީ އޮފް އެޑިއުކޭޝަން
