ތަރަހަ ބީ.އެސް.އެސް.އޭ ކޮމިއުނިޓީ އެނުއަލް ޓްރިޕް ކާމިޔާބުކަމާއެކު ނިންމާލައިފިއެވެ. މި ދަތުރަކީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ 2 ގޮފި ކަމަށްވާ ތަރަހަ އަދި ބިޒްނަސް ސްކޫލް ސްޓޫޑެންޓްސް އެސޯސިއޭޝަން (ބީ.އެސް.އެސް.އޭ) ގުޅިގެން ރޭވި ޙަރަކާތެކެވެ.
މި ދަތުރުގައި ޖުމްލަ 55 ދަރިވަރުން ބައިވެރިވިއިރު، ސެންޓަރ ފޯ ފައުންޑޭޝަން ސްޓަޑީޒް (ސީ.އެފް.އެސް) އާއި އެމް.އެން.ޔޫ ބިޒްނަސް ސްކޫލްގެ އިތުރުން އެމް.އެން.ޔޫ.އެސް.ޔޫގެ ލީޑަރސް ގްރޫޕްގެ ބައެއް މެންބަރުންވަނީ ބައިވެރިވެފައެވެ.
މި ދަތުރުގައި ކޮމިއުނިޓީ އިވެންޓު ނުވަތަ އިޖުތިމާޢީ ޙަރަކާތެއްގެ ގޮތުގައި ކ. މާފުށީގެ ބައެއް ގެސްޓްހައުސްތަކަށް ޒިޔާރަތްކުރުމާއި، މާފުށީ ވޯޓާރ ސްޕޯޓްސްއާ ގުޅޭ މައުލޫމާތު ދަތުރުގެ ބައިވެރިންނަށް ދިނުމުގެ އިތުރުން ތިމާވެށީގެ ޙަރަކާތެއްގެ ގޮތުން ގަސްއިންދުމުގެ ޙަރަކާތެއް ކުރިއަށް ގެންދެވުނެވެ.
2019 ނޮވެންބަރ 11ވީ ހޯމަދުވަހުގެ ހެނދުނު 06.00ގައި މާފުށްޓަށް ފުރިއިރު، އިޖްތިމާޢީ ޙަރަކާތްތައް ނިންމާލައި، ބައެއް މުނިފޫހިފިލުވުމުގެ ޙަރަކާތްތަކަށްފަހު އެނބުރި މާލެ ފުރީ އެދުވަހުގެ ހަވީރު 04.00ގައެވެ.
މިފަދަ ދަތުރުތަކަކީ ދަރިވަރުންގެ މެދުގައި އެކުވެރިކަން އާލާކޮށް، އިޖްތިމާޢީ ރޫހު ދިރުވުމުގެ މަޤްޞަދުގައި ކުރެވޭ ދަތުރުތަކެކެވެ. މީގެ އިތުރުން ދިރިއުޅުމުގެ މައިދާނަށް ނިކުންނައިރު، އެމް.އެން.ޔޫ.އެސް.ޔޫގެ މެންބަރުންނަކީ ހަރުދަނާ ބަޔަކަށް ހަދައި، މުޖްތަމަޢަށް ފައިދާކުރަނިވި ކަންކަން ކުރާ ބަޔަކަށް ހެދުމެވެ. މިފަދަ ދަތުރުތަކަށް އެމް.އެން.ޔޫ.އެސް.ޔޫ އިންވެސް އެހީވެދޭއިރު، ދަރިވަރުން އަމިއްލައަށް ވެސް މިފަދަ ދަތުރުތަކަށް އެއްބާރުލުންދީ އެހީވެދެއެވެ.
ލިޔުނީ: މުޙައްމަދު އަޙުނަފް،
އިންތިޚާބީ މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
