ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ގޮތްޕެއްކަމަށްވާ ބިޒްނަސް ސްކޫލް ސްޓޫޑެންޓްސް އެސޯސިއޭޝަން (ބީ.އެސް.އެސް.އޭ)ގެ ހިންގާ ކޮމިޓީއާއިއެކު ”ގޮފިތަކުގެ ބައްދަލުވުން“ތަކުގެ 8 ވަނަ ބައްދަލުވުން ބާއްވައިފިއެވެ.
މޯލްޑިވްސް ނޭޝަނަލް ޔުނިވަރސިޓީ ބިޒްނަސް ސްކޫލް (އެމް.އެން.ޔޫ.ބީ.އެސް)ގައި ޤާއިމުކުރެވިފައިވާ ގޮފީގެ ހިންގާ ކޮމިޓީގެ 5 މެންބަރުން (ނައިބު ރައީސް ޢަމަލީ ހާޒިރުނުވޭ) އަދި އެމް.އެން.ޔޫ.އެސް.ޔޫގެ ހިންގާ ކޮމިޓީގެ އެސިސްޓެންޓް ސެކްރެޓަރީ ފިޔަވައި ބާކީތިބި ހުރިހާ މެންބަރުން ބައިވެރިވިއެވެ. މި ބައްދަލުވުމުގެ ތަޢާރަފު ދެއްވާފައިވަނީ އެމް.އެން.ޔޫ.އެސް.ޔޫގެ ރައީސް އަރުޝަދު އަޝްރަފެވެ. ގާތްގަނޑަކަށް 1 ގަޑިއިރަށް ކުރިއަށްދިޔަ މި ބައްދަލުވުމުގައި އެމް.އެން.ޔޫ.އެސް.ޔޫގެ ހިންގާ ކޮމިޓީގެ މެންބަރުން ވަނީ ބީ.އެސް.އެސް.އޭގެ ޙަރަކާތްތަކާއިބެހޭގޮތުން މަޝްވަރާކޮށް މިހާރު ކުރިއަށްގެންދިއުމަށް ރާވާފައިވާ ޙަރަކާތްތަކާއި ގުޅޭގޮތުން މަޢުލޫމާތު ހޯދައި އަދި ކުރިއަށް އޮތް ދުވަސްތަކުގައި ރޭވިދާނެ ބައެއް ޙަރަކާތްތަކުގެ މިސާލުތަކެއް ދެއްވާފައެވެ. މިގޮތުން ގޮފީގެ ޙަރަކާތްތައް ވަރުގަދަ ކުރުމަށާއި، އެއްވެސް ދަތިކަމެއް ދިމާވާނަމަ އެކަމެއް އެމް.އެން.ޔޫ.އެސް.ޔޫ އާއި ޙިއްޞާކުރުމަށް ނައިބު ރައީސް (ގޮފިތައް) ޢަލީ ޝަމްޢޫން ވަނީ ވިދާޅުވެފައެވެ. މި ބައްދަލުވުމުގައި ބީ.އެސް.އެސް.އޭގެ ހުރިހާ މެންބަރުންވެސް ވަނީ ވާހަކަ ދައްކަވާފައެވެ. މިގޮތުން އެ މެންބަރުން ޙަރަކާތްތައް ރޭވުމުގައިހުރި ދަތިތަކާއި ޙަރަކާތްތައް އިންތިޒާމުކުރުމުގައި އިރުޝާދު ދެއްވުމަށްވަނީ އެދިވަޑައިގެންފައެވެ. އަދި ބީ.އެސް.އެސް.އޭގެ ފަރާތުން މި ދައުރުގައި ކުރިއަށް ރޭވިފައިވާ ބައެއް ޙަރަކާތްތަކުގެ މަޢުލޫމާތުވެސް ވަނީ ދެއްވާފައެވެ. 08 އޭޕްރީލް 2018ވީ އާދީއްތަދުވަހުގެރޭ ބޭއްވުނު މި ބައްދަލުވުން ކުރިއަށްދިޔައީ އެރޭގެ 09:30 ގައި އެމް.އެން.ޔޫ.އެސް.ޔޫގެ އޮފީހުގައެވެ.
މި ބައްދަލުވުންތަކަކީ ޔޫނިއަންގެ މިހާރު އޮތް 13 ގޮތްޕާއެކު ވަކިވަކިން ބައްދަލުވުންތަކެއް ބޭއްވުމަށް ޔޫނިއަންގެ ހިންގާ ކޮމިޓީން ނިންމައިގެން ބާއްވާ ބައްދަލުވުންތަކެކެވެ. މީގެ ކުރިން ސިއާ، ފެސާ، ހީލާރސް، ޝެޓްސް، ތަރަޙަ، އެސްޓާ އަދި ނިއަރެސް އާއި އެކު ވަނީ ބައްދަލުވުންތައް ކުރިއަށްގެންގޮސްފައެވެ.
