ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ހިންގާ ކޮމިޓީން ޖަމިއްޔާގެ ގޮފިތަކުގެ ހިންގާ ކޮމިޓީތަކާއި ބައްދަލުކުރަން ފަށައިފިއެވެ. މި ބައްދަލުވުންތަކަކީ ޔޫނިއަންގެ މިހާރު އޮތް 13 ގޮތްޕާއެކު ވަކިވަކިން ބައްދަލުވުންތަކެއް ބޭއްވުމަށް ޔޫނިއަންގެ ހިންގާ ކޮމިޓީން ނިންމައިގެން ބާއްވާ ބައްދަލުވުންތަކެކެވެ. މިގޮތުން އޭޕްރީލް 3 ވީ އަންގާރަދުވަހުގެރޭ ޔޫނިއަންގެ އޮފީހުގައި، މި ސިލްސިލާގެ ފުރަތަމަ ބައްދަލުވުން، ފެކަލްޓީ އޮފް އާރޓްސް (އެފް.އޭ)ގައި ޤާއިމްކުރެވިފައިވާ ޔޫނިއަންގެ ގޮފިކަމަށްވާ ”ސިއާ“ އާއި އެކު ބޭއްވުނެވެ.
ސިއާ އާއި އެކު ބޭއްވުނު ބައްދަލުވުމުގައި ސިއާގެ ރައީސާ ފިޔަވައި ހިންގާ ކޮމިޓީގެ އެހެން ހުރިހާ މެންބަރުން ބައިވެރިވިއިރު ޔޫނިއަންގެ ހިންގާ ކޮމިޓީގެ 5 މެންބަރުން (ރައީސް، ނައިބު ރައީސް (ޢަމަލީ)، ނައިބު ރައީސް (ގޮފިތައް)، މީޑިއާ ކޯޑިނޭޓަރ އަދި އެސިސްޓެންޓް ސެކްރެޓަރީ) ބައިވެރިވިއެވެ. މި ބައްދަލުވުމުގައި ވާހަކަ ދައްކަވަމުން ޔޫނިއަންގެ ރައީސް އަރުޝަދު އަޝްރަފް ވިދާޅުވި ގޮތުގައި މި ބައްދަލުވުންތަކުގެ ބޭނުމަކީ މިވަގުތު ގޮފިތައް އޮތް ޙާލަތު ދެނެގަތުމާއި ގޮފިތަކުން ކުރިއަށް ރާވާފައިވާ ޙަރަކާތްތަކާއިމެދު ޔޫނިއަންގެ ހިންގާ ކޮމިޓީ އާއި މަޝްވަރާކުރުމެވެ. އަދި މީގެ އިތުރުން ގޮފިތަކުންކުރާ މަސައްކަތްތައް ޔޫނިއަންއިން ވިލަރެސް ކުރުމެވެ. ސިއާ އިން މިއަހަރު ކުރިއަށް ގެންގޮސްފައިވާ ޙަރަކާތްތަކާއިބެހޭގޮތުންވެސް ވާހަކަ ދެއްކުނު މި ބައްދަލުވުމުގައި ޔޫނިއަންގެ ނައިބު ރައީސް (ގޮފިތައް) ޢަލީ ޝަމްޢޫންވެސް ވަނީ މި ބައްދަލުވުންތަކުގެ މުހިއްމުކަމަށް އަލިއަޅުވާލާފައެވެ. މި ބައްދަލުވުމުން ކުރިއަށްދިޔައީ ގާތްގަނޑަކަށް 1 ގަޑިއިރަށެވެ.
ސިއާ އާއި އެކު ފުރަތަމަ ބައްދަލުވުން ބޭއްވުނުއިރު، ޔޫނިއަންގެ އަމާޒަކީ އޭޕްރީލްމަހުގެ ތެރޭގައި ޔޫނިއަންގެ ހުރިހާ ގޮތްޕެއްގެ ހިންގާ ކޮމިޓީތަކާއި ބައްދަލުކުރުމެވެ.
