ޝެޓްސް އިން ކެރަމް އެސޯސިއޭޝަން އޮފް މޯލްޑިވްސް ގެ އިސްވެރިންނާއި ބައްދަލުކޮށްފި

ސޮސައިޓީ ފޯ ހޮސްޕިޓާލިޓީ އެންޑް ޓުއަރިޒަމް ސްޓަޑީޒް (ޝެޓްސް) އިން ކެރަމް އެސޯސިއޭޝަން އޮފް މޯލްޑިވްސް (ސީ.އޭ.އެމް) ގެ އިސްވެރިންނާއި ބައްދަލުކޮށްފިއެވެ.

ޝެޓްސް އިން އިސްވެރިންނާއި ބައްދަލުކޮށްފައިވަނީ 21 އެޕްރީލް 2021 ވީ ބުދަ ދުވަހު އެމް.އެން.ޔޫ.އެސް.ޔޫ އޮފީހުގައެވެ. މި ބައްދަލުވުމުގައި ކެރަމް އެސޯސިއޭޝަންގެ ފަރާތުން ބައިވެރި ވެފައިވަނީ އެ އެސޯސިއޭޝަންގެ ޖެނެރަލް ސެކްރެޓަރީ ހުސެއިން ރައުޝާން އަދި ނާޒިމް ހަސަން އެވެ. އަދި ޝެޓްސް ހިންގާ ކޮމިޓީގެ ބައެއް މެންބަރުން ބައިވެރިވެފައިވެއެވެ.

މި ބައްދަލުވުމުގައި އެ އެސޯސިއޭޝަން އާއި ގުޅިގެން ޝެޓްސް އިން ބާއްވަމުން އަންނަ ކެރަމް މުބާރާތް ބާއްވާނެ ގޮތާއި މެދު މަޝްވަރާކޮށްފައި ވެއެވެ. އެގޮތުން މި މުބާރާތުގެ ބައިވެރިންގެ މެދުގައި، ޓީމް އިވެންޓަކާއި ސިންގަލްސް އިވެންޓެއް ބާއްވާ ގޮތަށެވެ. މީގެ ކުރިން މި މުބާރާތް ބާއްވަމުން އައީ ސިންގަލްސް އިވެންޓަކާއި ޑަބަލްސް އިވެންޓެއް ހިމެނޭގޮތަށެވެ. މުބާރާތުގެ އެކި ވަނަތަކަށް ދާ ފަރާތްތަކަށް ކެރަމްގެ ޤައުމީ ފަރިތަކުރުން ތަކުގައި ބައިވެރިވުމުގެ ފުރުސަތު ލިބޭނެ ވާހަކަ، ކެރަމް އެސޯސިއޭޝަން އޮފް މޯލްޑިވްސް ގެ ޖެނެރަލް ސެކްރެޓަރީ ހުސެއިން ރައުޝާން ވަނީ ވިދާޅުވެފައެވެ.

ބުދަ ދުވަހު ބޭއްވުނު މި ބައްދަލުވުމުގައި އިތުރަށް މަޝްވަރާ ކުރެވިފައިވަނީ އަމްޕަޔަރުން ތަމްރީން ކުރުމުގެ ޕްރޮގްރާމާއި ބެހޭގޮތުންނެވެ. 2019 ވަނަ އަހަރުގެ މުބާރާތެކޭ އެއްފަދައިން މި އަހަރުގެ މުބާރާތުގައިވެސް އަމްޕަޔަރުކަން ކުރުމުގެ ފުރުސަތު އެމް.އެން.ޔޫ ގެ ދަރިވަރުންނަށް ހޯދައިދިނުމުގެ ގޮތުން މި ތަމްރީން ޕްރޮގްރާމް ބާއްވަން ދެފަރާތުންވެސް ވަނީ އެއްބަސްވެފައެވެ.

މި އަހަރުގެ މުބާރާތް ކުރިއަށް ގެންދަން ނިންމާފައިވަނީ ކެރަމް އެސޯސިއޭޝަންގެ އިމާރާތުގައި ކަމަށް ވާއިރު، އަމްޕަޔަރުން ތަމްރީން ކުރުމުގެ ޕްރޮގްރާމް ބާއްވަން ނިންމާފައިވަނީ އެމް.އެން.ޔޫ ސެންޓްރަލް ގައެވެ.