ދިވަހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ ކުޅުދުއްފުށި ކެމްޕަހުގެ ގޮފި ގުރުޒުން އިންތިޒާމުކުރި “ ގުރުޒު މަދަހަ މުބާރާތް 1445″ ކާމިޔާބުކަމާއެކު ނިންމާލައިފިއެވެ.
މި މުބާރާތުގައި ބައިވެރިވުމުގެ ފުރުސަތު ކެމްޕަހުގެ މުއަށްޒަފުންނާއި، ހުރިހާ ދަރިވަރުންނަށް ވަނީ ހުޅުވާލެވިފައެވެ.
27 މާރިޗު ވީ ބުދަ ދުވަހު ކުޅުދުއްފުށި ކެމްޕަހުގައި ކުރިއަށްގެންދިޔަ މި މުބާރާތުގައި ގިނަ ދަރިވަރުން ވަނީ ބައިވެރިވެފައެވެ.
ވަކި ވަކިން ކިޔުމާއި ގްރޫޕުކޮށް ކިޔުމުގެ ބަޔަށް ބަހާލައިގެން މުބާރާތް ކުރިއަށް ގެންދިޔައިރު، ޖުމުލަ 14 ދަރިވަރުން ވަނީ ބައިވެރިވެފައެވެ. އަދި ގްރޫޕް ބައިގައި 2 ގްރޫޕެއް ވަނީ މަދަހަ ހުށައަޅާފައެވެ.
ރީތި މަދަހަތަކެއް ހުށައަޅާފައިވާ މި މުބާރާތުގެ ނަތީޖާ އެދުހުގެ ރޭ ވަނީ ފާޅުކޮށްފައެވެ. މުބާރާތުގެ ވަނަތަކަށް ހޮވުނު ދަރިވަރުންނަށް ވަނީ ޓްރޮފީ އާއި ހަދާނީ ލިޔުން ދީފައެވެ.
މަދަހަ ކިޔުމުން ވަކި ވަކި ބައިން މުބާރާތުގެ ފަޙުރުވެރި އެއްވަނަ ހާސިލްކޮށްފައިވަނީ މަރިޔަމް ރައުހާ އެވެ. ދެވަނަ އަލޫފާ އަބަދުލް ރަޝީދަށް ލިބުނު އިރު، 3 ވަނަ ހާސިލްކޮށްފައި ވަނީ ފާތިމަތު ރަށާ އަންފާލް އެވެ.
ގްރޫޕު މަދަހައިގެ ބައިން އެއްވަނަ ހާސިލް ކޮށްފައިވަނީ ނާރސިންގ ދަރިވަރުންގެ ގުރޫޕެވެ. އަދި ދެވަނަ ލިބިފައިވަނީ ސްޓާފުންގެ ގްރޫޕަށެވެ.
މި މުބާރާތް ކާމިޔާބު ކަމާއެކު ނިންމާލުމުގައި ކެމްޕަހުގެ މެނޭޖްމެންޓާއި އިސްވާރުންގެ ފަރާތުންވަނީ ފުރިހަމަ އެއްބާރުލުމެއް ލިބިފައެވެ.
ރަމަޟާން މަހަށް ހާއްސަކޮށްގެން ގުރުޒުން ކުރިއަށްގެންދެވުނު މި މަދަހަ މުބާރާތުގެ އިތުރުން އެހެނިހެން ހަރަކާތްތައް ވަނީ ކުރިއަށް ގެންގޮސްފައެވެ.
