ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ ތިނަދޫ ކެމްޕަސްގެ ގޮފި ނޭކައިގެ ޓެލެންޓް ޝޯވ ގްރޭންޑް ސްޓޭޖްގެ 2 ވަނަ އެޑިޝަން ކާމިޔާބުކަމާއެކު ނިންމާލައިފިއެވެ.
6 ނޮވެމްބަރު ވީ ހުކުރު ދުވަހުގެ ރޭގަނޑު ތިނަދޫ ކެމްޕަހުގައި ކުރިއަށް ގެންދިޔަ މި ޙަރަކާތަކީ ތިނަދޫ ކެމްޕަހުގައި ކިޔަވާ ހުރިހައި ދަރިވަރުންނަށް ހުޅުވާލައިގެން އެ ދަރިވަރުންގެ ހުނަރުތައް ދައްކާލުމާއި ދަރިވަރުންގެ މެދުގައި އޮންނަ އެކުވެރިކަން އާލާކުރުމުގެ މަޤްސަދުގައި ނޭކައިން ރާވައި ކުރިއަށް ގެންދިޔަ ޙަރަކާތެކެވެ.
މި ހަރަކާތުގައި އެކި ކޯސްތަކުގެ އެކި ސެމިސްޓަރުތަކުގައި ކިޔަވަމުންދާ ދަރިވަރުންގެ ތަފާތު ހުނަރުވެރި ހުށަހެޅުންތައް ފެނިފައިވެއެވެ. އެގޮތުން ތަފާތު ނެށުންތަކާއި ލަވަކިޔުމުގެ ހުނަރުތައް ވަނީ ދަރިވަރުން ދައްކާފައެވެ. މީގެ އިތުރުން ދަރިވަރުންގެ މެދުގައި ތަފާތު ގޭމްތައްވެސް ކުޅެފައިވެއެވެ.
ރޭގަނޑުގެ ޚާއްސަ ކެއުމަކާއެކު ކުރިއަށް ދިޔަ މި ޙަރަކާތުގައިވަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ 14ވަނަ އަހަރީ ދުވަސްވެސް ފާހަގަކޮށްފައެވެ. މިގޮތުން، އަހަރީ ދުވަހުގެ ޚާއްސަ ކޭކެއް ފެޅުމާއި ދަރުވަރުންގެ ފަރާތުން ޝުއޫރު ފާޅުކުރުންވެސް ކުރިއަށް ގެންގޮސްފައިވެއެވެ.
ގިނަ ޢަދަދެއްގެ ލީދަރުންނާއެކު ކުރިއަށް ދިޔަ މި ޙަރަކާތުގައި ދަރިވަރުންގެ ޔޫނިއަންގެ އެޑްވައިޒަރީ ބޯޑުގެ މެންބަރު އަދި ޔުނިވަރސިޓީގެ ކައުންސިލްގައި ދަރިވަރުން ތަމްސީލްކުރާ މެންބަރު އިސްމާޢީލް ރަޒީން ޢިމްރާންވެސް ވަނީ ބައިވެރިވެވަޑައިގެންފައެވެ.
