ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން ބާއްވާ 10 ވަނަ އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތުގައި މިރޭ ކުޅެވުނު ފިރިހެން ޑިވިޝަންގެ މެޗުތައް ފެކަލްޓީ އޮފް އެޑިއުކޭޝަން (އެފް.އީ)އާއި ފެކަލްޓީ އޮފް ހެލްތް ސައިންސަސް (އެފް.އެޗް.އެސް) އިން ކާމިޔާބުކޮށްފިއެވެ.
މި މުބާރާތުގެ ގުރޫޕް ސްޓޭޖް މެޗުތައް މިރޭ ފެށިގެންދިޔައިރު ފުރަތަމަ ކުޅެވިގެންދިޔައީ ގުރޫޕް އޭ ގެ ފިރިހެން ޑިވިޝަނުގެ މެޗްތަކެވެ. އެގޮތުން މުބާރާތުގެ ފުރަތަމަ މެޗުގައި ބައްދަލުކުރީ އެފް.އީ ގެ ޓީމާއި ފެކަލްޓީ އޮފް އިންޖިނިއަރިންގ ސައިންސް އެންޑް ޓެކްނޮލަޖީ (ފެސްޓް) ގެ ޓީމެވެ.
ބޮޑު ތަފާތަކުން އެފް.އީ އިން ފާއިތުވި އަހަރުގެ ޗެމްޕިއަން ފެސްޓްގެ މައްޗަށް ކުރިހޯދީ ސީދާ ދެ ސެޓުންނެވެ. އެފް.އީ އިން މެޗުގެ ސެޓުތައް ކާމިޔާބުކޮށްފައިވަނީ 25 – 10 އަދި 25 – 9 އިންނެވެ. މި މެޗުގެ މޮޅު ކުޅުންތެރިޔަކަށް ހޮވިފައިވަނީ އެފްއީގެ ޖާޒީ ނަމްބަރު 21 ފަރުހަތު ޖަލީލެވެ.
މިރޭ ދެވަނައަށް ކުޅެވިގެންދިޔަ ފިރިހެން ޑިވިޝަނުގެ މެޗުގައި ސްކޫލް އޮފް މެޑިސިންގ (އެސް.އެމް)ގެ ޓީމާއި ފެކަލްޓީ އޮފް ހެލްތް ސައިންސަސް (އެފް.އެޗް.އެސް)ގެ ޓީމު ބައްދަލުކުރި ފޯރިގަދަ މެޗުން އެފް.އެޗް.އެސް ކާމިޔާބުކޮށްފައިވަނީ ސީދާ ދެ ސެޓުންނެވެ. އެފް.އެޗް.އެސް ގެ ޓީމުން ސެޓުތައް ކާމިޔާބުކޮށްފައިވަނީ 13-25 އަދި 25-20 އިންނެވެ. މިމެޗުގެ މޮޅު ކުޅުންތެރިޔަކަށް ހޮވިފައިވަނީ، އެފް.އެޗް.އެސް ގެ ޓީމަށް ގިނަ ޕޮއިންޓު ތަކެއް ހޯދައިދިން އެ ޓީމުގެ ޖާޒީ ނަމްބަރު 27 ވިޝާހް އަހްމަދެވެ.
މި މުބާރާތުގެ ދެން ކުޅެވިގެންދާނީ ގުރޫޕް ބީ ގެ ފިރިހެން ޑިވިޝަނުގެ ސެންޓަރ ފޯ ފައުންޑޭޝަން (ސީ.އެފް.އެސް) އަދި ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީސް (އެފް.އެޗް.ޓީ.އެސް) ބައްދަލުކުރާ މެޗެވެ. 03 މެއި ވާ ހުކުރު ދުވަހު މެންދުރުފަހު 14:30 ގައި ކުޅެވޭ މި މެޗަށް ފަހު ފިރިހެން ޑިވިޝަނުގެ ގުރޫޕް އޭ ގެ އިތުރު ދެ މެޗެއް ކުޅުމަށްވަނީ ތާވަލު ކުރެވިފައެވެ.
މިއަހަރުގެ މުބާރާތުގައި އަންހެން އަދި ފިރިހެން ޑިވިޝަނުގައި 9 ޓީމާއެކު، ޖުމުލަ 18 ޓީމު ވާދަކުރާނެއެވެ. އިންޓަރ ފެކަލްޓީ ވޮލީ މުބާރާތަކީ ޔޫނިއަނުން ބާއްވަމުން އަންނަ ދެވަނައަށް އެންމެ ބޮޑު ކުޅިވަރު ހަރަކާތެވެ. މުބާރާތް ކުރިއަށްދާނީ މެއި 1 ވަނަ ދުވަހުން ފެށިގެން 11 ވަނަ ދުވަހުގެ ނިޔަލަށް އެމް.އެން.ޔޫ އެފް،އީ ޕީ.އީ ހޯލުގައެވެ.
