އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތުގެ ފިރިހެން ޑިވިޝަނުގައި ގުރޫޕް ބީ ގެ އެމް.އެން.ޔޫ ބިޒްނަސް ސްކޫލް (އެމް.އެން.ޔޫ ބީ.އެސް)ގެ ޓީމާއި، ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީސް (އެފް.އެޗް.ޓީ.އެސް) އާއި ބައްދަލުކުރި މެޗް ބީ.އެސް އިން ކާމިޔާބުކޮށް ސެމީއިން ޖާގަ ކަށަވަރުކުރިއިރު، ފެކަލްޓީ އޮފް އާރޓްސް (އެފް.އޭ) ގެ ޓީމުން ކުޅުނު މެޗުންވެސް ވަނީ މޮޅުވެފައެވެ.
އެފް.އޭ ގެ ޓީމު ސެންޓަރ ފޯ ފައުންޑޭޝަން ސްޓަޑީޒް (ސީ.އެފް.އެސް)ގެ ޓީމާއި ބައްދަލުކުރި މެޗުގައި ވާދާވެރި ކުޅުމަކަށްފަހު އެފް.އޭގެ ޓީމުން ވަނީ ތަފާތު މޮޅު ކުޅުމެއްދައްކައި 3 ސެޓް 1 ސެޓުން މެޗު ކާމިޔާބުކޮށްފައެވެ. ފުރަތަމަ ސެޓުގައި އެފް.އޭގެޓީމުން ބޮޑު ތަފާތަކުން ސެޓު ގެންދިޔައީ 25-16 އިންނެވެ. ނަމަވެސް ދެވަނަ ސެޓުގައި ސީ.އެފް.އެސްގެ ޓީމުން ވަނީ ކުޅުން ރަނގަޅުކޮށްފައެވެ. އަދި އެފް.އޭގެ ޓީމުން 5 ޕޮއިންޓުގެ ލީޑެއް ނަގާފައިވަނިކޮށް ފަހަތުން އަރާ ވަނީ ނަތީޖާ ހަމަހަމަ ކޮށްފައެވެ. މި ސެޓުގައި ދެ ޓީމުގެ ފަރާތުންވެސް ވަނީ ފޯރިގަދަ ކުޅުމެއް ފެނިގެންގޮސްފައެވެ. ސީ.އެފް.އެސްގެ ޓީމުން ފުރަތަމަ ސެޓުގައި ހެދުނު ގޯސްތައް ރަގަޅުކޮށް، މިސެޓު 24-26 ގެ ނަތީޖާއަކުން ކާމިޔާބުކޮށް ސެމީއަށް ދިއުމުގެ އުންމީދުއާކުރިއެވެ. ނަތީޖާ ނެރުމަށް ކުޅެވުނު ތިން ވަނަ ސެޓުގައި ދެ ޓީމުގެ ފަރާތުން ވަނީ ކުޅުން އިތުރަށް ވަރުގަދަކޮށް މެޗު ކާމިޔާބުކުރުމަށް ވާދަވެރި ކުޅުމެއްދައްކާފައެވެ. މި ސެޓުގައި ފުރަތަމަ ލީޑު ނަގައިފައިވަނީ ސީ.އެފް.އެސްގެ ޓީމުންނެވެ. ފަހަތުން އަރައި އެފް.އޭގެ ޓީމުން 9-9 ނަތީޖާ ހަމަހަމަކޮށް ސީ.އެފް.އެސްގެ ޓީމަށް ދޫނުދީ މެޗު ކާމިޔާބުކުރީ ފަހު ސެޓު 16-14 ންނެވެ. މި މެޗުން އެންމެ މޮޅު ކުޅުންތެރިޔަކަށް ހޮވިފައިވަނީ އެފް.އޭގެ ޖާޒީ ނަމްބަރ 14 ހަސަން ނާފިޒްއެވެ. މި މޮޅާއެކު އެފް.އޭގެ ޓީމުން ސެމީއަށް ދިޔުމަށްޓަކައި، އެފް.އެޗް.ޓީއެސް އާއި ބައްދަލުކުރާ މެޗުންވެސް މޮޅުވާންޖެހޭނެއެވެ.
މި ގުރޫޕުގައި ދެވަނައަށް ކުޅެވުނު މެޗުގައި ބައްދަލުކުރީ ބިޒްނަސް ސްކޫލް އާއި އެފް.އެޗް.ޓީ.އެސްއެވެ. މިމެޗު ބީ.އެސް އިން ކާމިޔާބުކޮށް ސެމީއިން ޖާގަ ކަށަވަރުކޮށްފައިވަނީ އެފް.އެޗް.ޓީ.އެސް އަތުން ސީދާ ދެ ސެޓު ގެންގޮސްގެންނެވެ. މި މެޗުގެ ނަތީޖާއަކީ 25-15 އަދި 25-18 އެވެ. ދެ ޓީމުގެ ފަރާތުންވެސް ރީތި ކުޅުމެއްފެނިގެންދިޔަ މި މެޗުގެ މޮޅު ކުޅުންތެރިޔާގެ މަޤާމު ހާސިލްކޮށްފައިވަނީ އެމް.އެން.ޔޫ ބީ.އެސް ޓީމުގެ ކެޕްޓަން ޖާޒީ ނަމްބަރ 11 އަހުމަދު އިޝާންއެވެ.
6 މެއި ވާ ހޯމަ ދުވަހުވެސް މި މުބާރާތުގެ 4 މެޗެއް ކުޅުމަށްވަނީ ހަމަޖެހިފައެވެ. އަންހެން ޑިވިޝަނުގައި ކުޅެވޭނީ ފެކަލްޓީ އޮފް އެޑިއުކޭޝަން އާއި އެމް.އެން.ޔޫ ބީ.އެސް ބައްދަލުކުރާ މެޗާއި ފެކަލްޓީ އޮފް ހެލްތު ސައިންސަސް އާއި ސްކޫލް އޮފް މެޑިސިން ބައްދަލުކުރާމެޗެވެ. ފިރިހެން ޑިވިޝަނުގައި އެސް.އެމް އާއި ފެސްޓް އަދި އެސް.އެން ގެ އިތުރުން އެފް.އެޗް.އެސްގެ ޓީމު ކުޅޭ މެޗުތައް ވަނީ ތާވަލުކުރެވިފައެވެ.
އެމް.އެން.ޔޫ.އެސް.ޔޫ އިން ސިލްސިލާކޮށް ބާއްވަމުން އަންނަ މިމުބާރާތުގައި މިފަހަރު 18 ޓީމު ވަނީ ބައިވެރިވެފައެވެ. މި މުބާރާތުގެ ހުރިހާ މެޗެއްވެސް ކުޅެވިގެންދާނީ އެމް.އެން.ޔޫ ޕީ.އީ ހޯލުގައެވެ.
