ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އިންތިޒާމުކޮށްގެން ބޭއްވި ”އެމް.އެން.ޔޫ.އެސް.ޔޫ ބަހުސް މުބާރާތް 2024″ގެ އެންމެ މޮޅު ބަހުސްކުރުންތެރިޔަކަށް ފެކަލްޓީ އޮފް ޝަރީޢާ އެންޑް ލޯ (އެފް.އެސް.އެލް)ގެ މުޙައްމަދު އައިޝް މުޞްޠަފާ ހޮވިއްޖެއެވެ.
މި މުބާރާތުގައި އެފް.އެސް.އެލްގެ ޓީމުން ވާދަކުރި ބަހުސްތަކުގެ ތެރެއިން އެންމެ ބަހުސެއް ފިޔަވާ ހުރިހާ ބަހުސެއްގެ މޮޅު ބަހުސްކުރުންތެރިޔާގެ މަޤާމުވެސް ހާސިލްކޮށްފައިވާ އައިޝް އަކީ އެމް.އެން.ޔޫ.އެސް.ޔޫ ބަހުސް ޓީމުގައިވެސް ފާހަގަކޮށްލެވޭ ހުނަރުވެރިއެކެވެ. ނިމިދިޔަ އަލްއުސްތާޛު އިބްރާހީމް ޝިހާބުގެ ހަނދާނީ ވާދައިގެ ތަށްޓަށް ބާއްވާ ވާހަކަދެއްކުމުގެ 37ވަނަ ޤައުމީ މުބާރާތުގެއިވެސް ބަހުސް ކެޓެގަރީއިން ތިންވަނައަށް އެންމެ މޮޅު ބަހުސްކުރުންތެރިޔާގެ މަޤާމު އައިޝް ވަނީ ހޯދާފައެވެ. މުބާރާތުގެ އެންމެ މޮޅު ބަހުސްކުރުންތެރިޔާގެ މަޤާމަށް އިނާމް ހަވާލު ކޮށްދެއްވާފައިވަނީ އެމް.އެން.ޔޫގެ ވައިސް ޗާންސެލަރ ޑރ. އައިޝަތު ޝެހެނާޒު އާދަމްއެވެ.
މި މުބާރާތުގެ ވަނަވަނައަށް ދިޔަ ފަރާތްތަކަށް އިނާމު ހަވާލުކުރުން އޮތީ 25 މެއިވީ ހޮނިހިރުދުވަހުގެރޭ ފައިނަލް ބަހުސަށްފަހު ޤައުމީ ޔުނިވަރސިޓީގެ ސެންޓްރަލް އެޑްމިނިސްޓްރޭޝަން (ސީ.އޭ) އޮޑިޓޯރިއަމްގައި ކުރިއަށް ދިޔަ ރަސްމިއްޔާތުގައެވެ. މި ހަފްލާގައި ވަނީ ބަހުސް މުބާރާތުގެ އެންމެ މޮޅު 5 ބަހުސްކުރުންތެރިން އަދި ކޮންމެ ޓީމެއްގެ އެންމެ މޮޅު ބަހުސްކުރުންތެރިޔާއަށް އިނާމު ދީފައެވެ. މިއަހަރު މުޅިން އަލަށް ކޮންމެ ޓީމެއްގެ އެންމެ މޮޅު ބަހުސްކުރުންތެރިޔާ ހޮވިގެން ދިޔައިރު، މި އިނާމުތައް ހަވާލު ކޮށްދެއްވީ ދަރިވަރުންގެ ޔޫނިއަންގެ 4 ވަނަ އަދި 5 ވަނަ ދައުރުގެ ރައީސް އަލްއުސްތާޛު ޢަލީ ރަޝީދެވެ. މި އިނާމް ހާސިލްކޮށްފައިވާ ފަރާތްތަކަކީ:
އެފް.އެސް.އެލް: މުޙައްމަދު އައިޝް މުޞްޠަފާ
އެސް.އެމް: އަނޫފް ޢަބްދުﷲ
އެފް.އޭ: އަޙްމަދު ބާސިޤް މުޙައްމަދު
އެފް.އީ: އައިޝަތު މައިޝާ ޚާތިމް
އެފް.އެޗް.އެސް: ޢާއިޝަތު ސަދާ މުޙައްމަދު ޞާދިޤް
ސީ.އެފް.އެސް: ޒަފާ މޫސާ ޞިއްދީޤް
އައި.ޔޫ.އެމް: އާމިނަތު ހިދާ ޙުސައިން
އެމް.އެން.ޔޫ.ބީ.އެސް: ފާޠިމަތު ނީޒާ
މީގެއިތުރުން އެންމެ މޮޅު 5 ބަހުސްކުރުންތެރިންނަށް އިނާމު ހަވާލުކޮށްދެއްވީ ޑެޕިއުޓީ ވައިސް ޗާންސެލަރ ޑރ ރަޙީމާ ޢަބްދުއްރަހީމްއެވެ. މިއަހަރުގެ ބަހުސް މުބާރާތުގެ އެންމެ މޮޅު ފަސް ބަހުސްކުރުންތެރިންނަކީ:
އިސްމާޢިލް ރަޒީން އިމްރާން (އެފްއެސްއެލް)
މުޙައްމަދު އަޔާޝް ޢަލީ (އެސްއެމް)
އަޙްމަދު ޝާބިން (އެސްއެމް)
އަނޫފް ޢަބްދުﷲ (އެސްއެމް)
މުޙައްމަދު އައިޝް މުސްތަފާ (އެފްއެސްއެލް)
މުބާރާތުގެ ރަނަރއަޕް ޓީމް، ފެކަލްޓީ އޮފް ޝަރީޢާ އެންޑް ލޯ، އަށް އިނާމު ހަވާލުކޮށްދެއްވީ ދިވެހިރާއްޖޭގެ މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަހްމަދު ޝިޔާމްއެވެ. އަދި ޗެމްޕިއަން ޓީމަށް އިނާމު ހަވާލުކޮށްދެއްވީ ހަފްލާގެ ޝަރަފްވެރި މެހްމާން ދިވެހި ބަހާއި ސަގާފަތާއި ތަރިކައާބެހޭ ވަފީރު އާދަމް ނަސީރު އިބްރާހިމްއެވެ.
މިއަހަރުގެ މުބާރާތް ކާމިޔާބު ކަމާއެކު ނިންމާލުމުގައި ފަޑިޔާރުންގެ ފަރާތުން ލިބުނު އެއްބާރުލުމާއި އެހީތެރިކަން ފާހަގަކޮށް އަދުވަޒަންކުރުމުގެ ގޮތުން ވަނީ ފަޑިޔާރުންނަށްވެސް ވަނީ ހަނދާނީ ލިޔުންދެވިފައެވެ.
މިފަހަރުގެ މުބާރާތްވެސް އިންތިޒާމުކޮށް ހިންގުމުގައި ޔޫނިއަންގެ އިސްވާރުންގެ ފަރާތުން ލިބުނު އެއްބާރުލުމަކީ ހަރަކާތް ކާމިޔާބުކަމާއެކު ނިންމާލުމުގައި އެންމެ އިސްރޯލެއް އަދާކުރި ފަރާތްތަށްކަމުގައި ފާހަގަކުރަށްވާ، ޔޫނިއަންގެ ނައިބު ރައީސް (އިލްމީ) މުހައްމަދު ނާބިތު އަހުމަދުގެ ވާހަކަފުޅުގައި ވަނީ މުބާރާތް ހިންގާ އިންތިޒާމުކުރުމުގައި އެހީތެރިވެދިން ހުރިހާ ބޭފުޅުންނަށް އިޖުމާލީ ގޮތެއްގައި ޝުކުރުއަދާކުރަށްވާފައެވެ.
އެމް.އެން.ޔޫ.އެސް.ޔޫ ބަހުސް މުބާރާތަކީ ދިވެހި ބަސް ދިރުވައި އާލާކޮށް، ބަހުގެ ހަމަތަކާ އެއްގޮތަށް ދިވެހިބަސް ބޭނުން ކުރަން ބާރުއެޅުމަށާއި ޢިލްމީ ފެންވަރެއްގައި އުފެއްދުންތެރި ގޮތުގައި ޚިޔާލު ފާޅުކުރުމުގެ ފުރުޞަތު ފަހިކޮށްދީ، ދޫފަރިތަ، ކުޅަދާނަ ވާހަކަދެއްކުންތެރިންތަކެއް އުފެއްދުމުގެ މަޤްޞަދުގައި ބާއްވަމުން އަންނަ މުބާރާތެކެވެ. މިއަހަރު މި ބޭއްވުނީ ސިލްސިލާކޮށް ބޭއްވޭ މި މުބާރާތުގެ 11 ވަނަ މުބާރާތެވެ.
