ދިވެހިރާއްޖޭގެ ޤައުމީ ޔުނިވަރސިޓީ ދަރިވރުންގެ ޔޫނިއަން (އެމް.އެން.ޔޫ.އެސް.ޔޫ) އިން ލ. ގަން ކެމްޕަހުގައި ގާއިމުކުރެވިފައިވާ ގޮފި އަހުރަ އާއި ގުޅިގެން މިއަހަރު ކުރިއަށްގެންދިޔަ ލ ގަމު ކައުންސިލް އެމް.އެން.ޔޫ.އެސް.ޔޫ އަހުރަ ހޭންޑްބޯޅަ މުބާރާތް 2024ގެ ފިރިހެން ޑިވިޝަނުގެ ފައިނަލުގައި ވާދަވެރި ކުޅުމަކަށްފަހު ގޯޅިއަންސް ބަލިކޮށް ޗެމްޕިއަންކަން ކައްދޫ އެއަރޕޯޓްސް ކޮމްޕެނީ ލިމިޓެޑް (ކޭ.އޭ.ސީ.އެލް) އިން ހޯދައިފިއެވެ.
ސެޕްޓެމްބަރ 7 ވަނަ ދުވަހުގެ ރޭ މަތިމަރަދޫ ފުޓްސަލް ދަނޑުގައި މި މުބާރާތުގެ ދެ ޑިވިޝަންގެ ފައިނަލް މެޗް ކުޅެވިގެން ދިޔައިރު، މެޗުތައް ޝަރަފްވެރި ކޮށްދެއްވީ ލ ގަމު ދާއިރާގެ މަޖިލިސް މެމްބަރ ޔޫސުފް ނަޝީދުއެވެ. އަދި ކައުންސިލްގެ ރައީސް އަހުމަދު ޒަކީގެ އިތުރުން އެހެނިހެން މުއައްސަސާތަކުގެ އިސްވެރިންވެސް ވަނީ ބައިވެރިވެ ވަޑައިގަންނަވާފައެވެ. ގޯޅިއަންސް އަތުން ޕޮއިންޓެއްގެ ފަރަގަކުން ކޭ.އޭސީ.އެލް މެޗު ކާމިޔާބުކުރިއިރު މި މެޗުގެ މޮޅު ކުޅުންތެރިޔާގެ މަޤާމު ހާސިލްކޮށްފައިވަނީ ކޭ.އޭސީ.އެލް ޓީމުގެ ޖާޒީ ނަމްބަރ 10 އިބްރާހިމް ހައިޝަމް އަބްދުﷲއެވެ. މި މެޗުގައި ދެ ޓީމުގެ ފަރާތުންވެސް ތަފާތު މޮޅު ކުޅުމެއްފެނިގެން ދިޔައެވެ. މެޗުގެ ފުރަތަމަ ހާފް ނިމުނު އިރު 16-12 ގެ ނަތީޖާއަކުން ކޭ.އޭ.ސީ.އެލްގެ ޓީމުން ކުރި ހޯދާފައިވަނިކޮށް، ދެވަނަ ހާފުގައި ގޯޅިއަންސް އިން ވަނީ ފަހަތުން އަރާ މެޗުގެ ލީޑު ނަގާފައެވެ. މެޗު ނިމެން 15 ސިކުންތައް ވީރު ނަތީޖާ އަކީ 28-28 އެވެ. އެންމެ ފަހު ސިކުންތު ކޮޅުގައި ހައިޝަމްގެ މޮޅު ލަނޑާއެކު ކޭ.އޭ.ސީ.އެލްގެ ޓީމުންވަނީ ގޯޅިއަންސްގެ މައްޗަށް ކުރިހޯދާފައެވެ.
މުޅި މުބާރާތުގެ އެންމެ މޮޅު ކުޅުންތެރިޔާގެ މާގާމު ހާސިލްކޮށްފައިވަނީ ގިނަ ގޯލުތަކެއް ކޭ.އޭ.ސީ.އެލްގެ ޓީމަށް ޖަހާދީފައިވާ އެޓީމުގެ ޖާޒީ ނަމްބަރ 17 އަހުމަދު ނަޖީބެވެ. ފައިނަލް މެޗުގައި އެކަނި ވެސް ނަޖީބު ވަނީ 12 ލަނޑު ޖަހާފައެވެ. މުބާރާތުގެ އެންމެ މޮޅު 7 ކުޅުންތެރިންގެ ތެރޭގައި ހިމެނެނީ ނަޖީބުގެ އިތުރުން، އެ ޓީމުގެ ހައިޝަމް، ޖާޒީ ނަމްބަރ 12 މުހައްމަދު މަހުދީ، ޖާޒީ ނަމްބަރ 32 އިބްރާހިމް ނާއިފް، ގޯޅިއަންސްގެ ޖާޒީ ނަމްބަރ 10 ރާއިދު ރަޝީދު، ޖާޒީ ނަމްބަރ 13 އަހުމަދު ނާސިފް އަދި ޖީއާރުއެޗުގެ ގާޒީ ނަމްބަރ 03 ޒައިދު މުހައްމަދު ތައުފީގު އެވެ. އަދި އެންމެ މޮޅު ކޯޗަކަށް ކޭ.އޭ.ސީ.އެލްގެ ޝާހިދު މުހައްމަދު ހޮވިފައިވާއިރު، މުބާރާތުގެ އެންމެ އުއްމީދީ ކުޅުންތެރިޔަކީ ގޯޅިއަންސްގެ ޖާޒީ ނަމްބަރ 09 އަލީ އަޖުމަލް އެވެ.
މިއަހަރުގެ ޗެމްޕިއަން ޓީމަށް ފައިސާގެ އިނާމުގެ ގޮތުގައި 20،000ރ އަދި ޗެމްޕިއަން ޝީލްޑް އަދި މެޑަލް ވަނީ ދެވިފައެވެ. އަދި ރަނަރަޕް ޓީމުކަމަށްވާ ގޯޅިއަންސް އަށް ވެސް ވަނީ 7،000ރ ގެ ފައިސާގެ އިނާމާއި މެޑަލް ދެވިފައެވެ. މި މުބާރާތުގެ ފެއަރ ޕްލޭ ޓީމަށް ހޮވިފައިވަނީ ވައްޓަފާޅި ސްޕޯޓްސް ކްލަބެވެ.
އެމް.އެން.ޔޫ.އެސް.ޔޫ އަހުރަ ހޭންޑްބޯޅަ މުބާރާތަކީ ދަރިވަރުންގެ ޔޫނިއަނުން އަތޮޅު ތެރޭގައި ބާއްވާ އެންމެ ބޮޑު ހަރަކާތެވެ. އަދި ލ އަތޮޅުގެ މުއައްސަސާތަކާއި ޖަމިއްޔާތަކަށް ހުޅުވާލައިގެން ބާއްވާ އެންމެ ބޮޑު ހޭންޑްބޯޅަ މުބާރާތް ވެސްމެއެވެ.
