ލޮކްޑައުން ޔޫރޯ ފޯރި ފުރަތަމަ ބުރުގެ އެއްވަނައަށް މައިޝާން

އެމް.އެން.ޔޫ.އެސް.ޔޫ ލޮކްޑައުން ޔޫރޯ ފޯރީގެ ފުރަތަމަ ބުރުގެ އެއްވަނަ އަށް މުޙައްމަދު މައިޝާން ހޮވިއްޖެއެވެ.

16 ޕޮއިންޓާއެކު މައިޝާން އެއްވަނައަށް ހޮވިފައިވަނީ މުބާރާތުގެ ފުރަތަމަބުރުގެ މެޗުތައް ނިމުނުއިރުގައި ދެފަރާތަކަށް ލިބުނު ޕޮއިންޓް އެއްވަރުވެފައިވުމުން، ދެ ބައިވެރިންގެ މެދުގައި ގުރުއަތު ނަގައިގެންނެވެ. ގުރުއަތުލުން ބޭއްވިފައިވަނީ އެމް.އެން.ޔޫ.އެސް.ޔޫގެ ފޭސްބުކް ޕޭޖު މެދުވެރިކޮށެވެ.

7 ބުރަކަށް ބަހާލައިގެން ކުރިއަށްގެންދާ  މި މުބާރާތުގެ ކޮންމެ ބުރެއްގައި އެންމެ ގިނަ ޕޮއިންޓް ހޯދާ ފަރާތަށް  “ ސަޕްރައިޒް “ އިނާމެއް ހުށަހެޅިފައިވާއިރު މުޅި މުބާރާތުގައި އެންމެ ގިނަ ޕޮއިންޓް ހޯދާ 3 ފަރާތަށް އަގުހުރި އިނާމުތައްވަނީ ހުށަހެޅިފައެވެ. މިހާތަނަށް މުބާރާތުގައި ޖުމްލަ 116 ފަރާތަކުން ވަނީ ބައިވެރިވެފައެވެ.

އެގޮތުން މުޅި މުބާރާތުން އެއްވަނަ އަށް ހޮވޭ ފަރާތަކަށް މި މުބާރާތުގެ މެއިން ސްޕޮންސަރ ”ޕްރޯ ސޮކާ“ ގެ ފަރާތުން ފުޓްސަލް ނުވަތަ ފުޓްބޯޅަ ބޫޓެއް ދިނުމަށް ވަނީ ނިންމާފައެވެ.

މުޅި މުބާރާތުން އެންމެ ގިނަ ޕޮއިންޓު ހޯދާ 3 ފަރާތަށް ދެވޭ އިނާމުތައް

1 ވަނަ އަށް ދާ ފަރާތަށް ފުޓްސަލް/ފުޓުބޯޅަ ބޫޓެއް އަދި ސަޕްރައިޒް އިނާމެއް

2 ވަނަ އަށް ދާ ފަރާތަށް ފުޓްސަލް ބޯޅައެއް އަދި ސަޕްރައިޒް އިނާމެއް

3 ވަނަ އަށް ދާ ފަރާތަށް، އެ ފަރާތަކަށް އެންމެ ކަމުދާ ޓީމެއްގެ ޖާޒީ އަދި ސަޕްރައިޒް އިނާމެއް

މި މުބާރާތުގެ މަޤްޞަދަކީ ޔޫރޯ މުބާރާތުގެ ފޯރި އާންމުންގެ ތެރޭގައި އިތުރުކުރުމާއި، މާލޭގެ ފުރަބަންދު ޙާލަތުގައި ގޭގައި ތިބެގެން ޝައުޤުވެރިކަމާއެކު ބައިވެރިވެވޭނެ ޙަރަކާތެއް ޢާންމުންނާ ހަމައަށް ގެނެސްދިނުމެވެ. މުބާރާތުގެ މެއިން ސްޕޮންސަރ އަކީ ”ޕްރޯ ސޮކާ“ އެވެ.