ދިވެހިރާއްޖޭގެ ޤައުމީ ޔުނިވަރސިޓީއަށް އަލަށް ގުޅޭ ދަރިވަރުންނަށް އަމާޒުކޮށްގެން ބާއްވާ ”އެމް.އެން.ޔޫ ޖެނެރަލް އޮރިއެންޓޭޝަން“ 2021 އޯގަސްޓް އިންޓޭކްގައި ގުޅުނު ދަރިވަރުންނަށް ބާއްވައިފިއެވެ.
2021 ވަނަ އަހަރުގެ އޯގަސްޓު އިންޓޭކްގެ އެމް.އެން.ޔޫ ޖެނެރަލް އޮރިއެންޓޭޝަން ބޭއްވިފައިވަނީ އޯގަސްޓު 15 ވަނަ ދުވަހު އެމް.އެން.ޔޫ ސީ.އޭ އޮޑިޓޯރިއަމްގައެވެ.
އެމް.އެން.ޔޫއަށް އަލަށް ގުޅޭ ދަރިވަރުންނަށް ބާއްވާ ޖެނެރަލް އޮރިއެންޓޭޝަން މިފަހަރު ބާއްވާފައިވަނީ އެންމެ ދަންފަޅިއެއްގައެވެ. އޮރިއެންޓޭޝަނުގައި އެމް.އެން.ޔޫ ގެ ހުރިހާ ފެކަލްޓީ/ސެންޓަރ/ސްކޫލް ތަކަށް އަލަށް ގުޅުނު ގިނަ ދަރިވަރުން ބައިވެރިވެފައިވާއިރު، ޒޫމް މެދުވެރިކޮށް އޮންލައިންކޮށް ވެސް ވަނީ ގިނަ ދަރިވަރުންތަކެއް ބައިވެރިވެފައެވެ.
އޮރިއެންޓޭޝަން ބޭއްވިފައިވަނީ މައިގަނޑު 7 ބަޔަކަށް ބަހާލައިގެންނެވެ. އެގޮތުން، ދަރިވަރުންގެ ކިޔެވުމާ ގުޅޭގޮތުން މައުލޫމާތު ދެވިފައިވާއިރު، ދަރިވަރުންގެ އިދާރީ ޚިދުމަތްތަކާއި، ކޯސްތަކުގެ ފީއާއި، ދަރިވަރުންނަށް ޔުނިވަރސިޓީން ފޯރުކޮށްދޭ އެހީތަކުގެ މައުލޫމާތު ދެވިފައިވެއެވެ. ހަމައެއާއެކު، ދަރިވަރުންގެ އިމްތިހާންތަކާ ގުޅޭ ގޮތުންނާއި، ލައިބްރަރީގެ ޚިދުމަތްތަކާއި، އެމް.އެން.ޔޫ ދަރިވަރުންގެ ޔޫނިއަންއާ ގުޅޭ މައުލޫމާތު ހިއްސާކުރެވިފައިވެއެވެ.
މީގެ ފަހުގައި އަލަށް ގުޅުނު ދަރިވަރުންނަށް ކެމްޕަސް ތެރޭގައި ހުރި މުހިންމު އިމާރާތްތަކާއި އެތަންތަނުގެ މައުލޫމާތު ވާނީ ހިއްސާ ކުރެވިފައެވެ. ދަރިވަރުންނަށް ކެމްޕަސްތެރެ ދެއްކުމުގައި ހަރަކާތްތެރިވެފައިވަނީ އެމް.އެން.ޔޫ.އެސް.ޔޫގެ އިސްވާރުންނެވެ.
އޮރިއެންޓޭޝަންގައި އެމް.އެން.ޔޫ.އެސް.ޔޫގެ ގިނަ އަދަދެއްގެ އިސްވާރުން ވަނީ ބައިވެރި ވެފައެވެ. މިގޮތުން އަލަށް ގުޅުނު ދަރިވަރުންނަށް މަރުހަބާ ކިޔުމަށް އެމް.އެން.ޔޫ.އެސް.ޔޫގެ ބޮޑުބެރު ގްރޫޕުން ހަރަކާތްތެރިވެފައިވާއިރު، ލީޑާރސް ގްރޫޕަށް ވަނުމަށް ޝަޢުޤުވެރިވާ ދަރިވަރުންނަށް އެ ފުރުސަތު ފަހިކޮށްދިނުމުގައިވެސް ޔޫނިއަންގެ އިސްވާރުން ހަރަކާތްތެރިވެފައިވެއެވެ.
އެމް.އެން.ޔޫގެ ކޮންމެ ހަރަކާތެއްގައި ވެސް އެމް.އެން.ޔޫ.އެސް.ޔޫގެ ފުރިހަމަ އެއްބާރުލުމާއި އެހީތެރިކަން އަބަދުވެސް ފޯރުކޮށްދެމުން ދެއެވެ.
