ދިވެހިރާއްޖޭގެ ގައުމީ ޔުނިވަރސިޓީ (އެމް.އެން.ޔޫ) އިން ކުރިޔަށް ގެންދާ ފަހި އެމް.އެން.ޔޫ ޕްރޮގްރާމްގައި އަންގާރަ ދުވަހު ބައިވެރިވެފައިވަނީ ވިލާ އިންޓަނޭޝަނަލް ހައި ސްކޫލުގެ ދަރިވަރުންނެވެ.
އަންގާރަ ދުވަހު އެމް.އެން.ޔޫގައި ކުރިޔަށްދިޔަ މި ހަރަކާތުގައި އެމް.އެން.ޔޫގެ ޑެޕިއުޓީ ވައިސް ޗާންސެލަރ ޑރ. އައިޝަތު ޝެހެނާޒް އާދަމްގެ އިތުރުން ޑީން އޮފް ސްޓޫޑެންޓްސް އާޝިޔާ ލީލާ އަޙްމަދު ވަނީ ބައިވެރިވެފައެވެ. މީގެ އިތުރުން އެމް.އެން.ޔޫ.އެސް.ޔޫގެ ހިންގާ ކޮމެޓީ މެމްބަރުންނާއި، ލީޑާސް ގްރޫޕްގެ މެމްބަރުންވެސް ވަނީ ބައިވެރިވެފައެވެ.
މީގެ ކުރިން މި ހަރަކާތުގައި ސީ.އެޗް.އެސް.ސީގެ އިތުރުން އަހުމަދިއްޔާ އިންޓަނޭޝަނަލް ސްކޫލުގެ ދަރިވަރުންވެސް ވަނީ ބައިވެރިވެފައެވެ.
މިހަރަކާތުގައި ބައިވެރިވާ ދަރިވަރުންނަށް އެމް.އެން.ޔޫގެ ފެކަލްޓީތައް ކަމަށްވާ ސްކޫލް އޮފް މެޑިސިންއަށާއި މެރިޓައިމް ސްޓަޑީޒްގެ ފެސިލިޓީތަކަށް ޒިޔާރާތް ކުރުމަށް ނަން ނޯޓު ކުރުމުގެ ފުރުސަތު އޮންނާނެއެވެ.
ފަހި އެމް.އެން.ޔޫ ޕްރޮގްރާމްގެ މަގްސަދަކީ އެމް.އެން.ޔޫގައި ކިޔަވަމުންދާ ދަރިވަރުންނަށް ހުރި ފުރުސަތުތަކާއި، އެމް.އެން.ޔޫއިން ދޭ ހިދުމަތްތަކާއި، އެމް.އެން.ޔޫގައި ހުރި ވަސީލަތްތަކާއި ދަރިވަރުންނަށް އުފާވެރި މާހައުލެއް ގާއިމުކޮށްދޭން އެމް.އެން.ޔޫއިން ކުރަމުން ގެންދާ މަސައްކަތް ތައާރަފްކޮށްދިނުމަށް ބާއްވާ ޕްރޮގްރާމެކެވެ.
އެމްއެންޔޫއިން ރާވާފައިވަނީ ކޮންމެ ހަފުތާއެއްގެ އަންގާރަ ދުވަހު މި ޕްރޮގްރާމު ސިލްސިލާކޮށް ކުރިއަށް ގެންދިއުމަށެވެ.
އެގޮތުން ގްރޭޓާ މާލެ އޭރިއާގައި އޭ ލެވެލްއަށް ކިޔަވާ ހުރިހާ ސްކޫލްތަކުގެ (ޕްރައިވެޓް ސްކޫލްތައް ވެސް ހިމެނޭ ގޮތަށް) ދަރިވަރުން ޔުނިވާސިޓީއަށް ޒިޔާރަތް ކުރާނެ ކަމަށް އެމްއެންޔޫއިން މައުލޫމާތު ދެއެވެ.
މިއަހަރުގެ ތެރޭގައި އެމްއެންޔޫގެ ޓީމުތައް އަތޮޅުތެރޭގެ އެކި ސަރަހައްދު ތަކަށް ޒިޔާރަތް ކޮށްގެން، ފަހި އެމްއެންޔޫ ޕްރޮގްރާމު ކުރިއަށް ގެންދިއުމަށް ވެސް ޔުނިވާސިޓީން ވަނީ ރާވާފައެވެ.
ފަހި އެމްއެންޔޫ ޕްރޮގްރާމަކީ ޔުނިވާސިޓީގެ ތަސައްވަރާ އެއްގޮތަށް ޔުނިވާސިޓީއިން ނުކުންނަ ދަރިވަރުންނަކީ ފުޅާ ދާއިރާއެއްގައި ވިސްނާ، ސިކުނޑި ހުޅުވިފައި ތިބި ބިނާ ކުރުވަނިވި ހިދުމަތްތެރި، އަނެކުންނާއި ދޭތެރޭ ވިސްނާ، އަމިއްލައަށް އިސްނަގައިގެން ގައުމު ބިނާ ކުރާނެ ހިދުމަތްތެރި ދަރިންތަކެއް އުފެއްދުމުގެ އަމާޒުގައި ހިންގާ ޕްރޮގްރާމެކެވެ.
