ފެކަލްޓީ އޮފް ހެލްތް ސައިންސަސްގެ ގޮފި ހީލާރސް އިން އިސްނަގައިގެން މުޅިން އަލަށް މިއަހަރު ހީލާރސްއަށް ގުޅުނު އައު ލީޑަރުންނަށް ހާއްސަ ކޮށްގެން “ ލީޑާރސް ފަން ޓްރިޕް“ ގެ ނަމުގައި ވިލިމާލެއަށް ކުރި ޕިކްނިކް ދަތުރު ކާމިޔާބު ކަމާއެކީ ނިންމާލައިފިއެވެ.
މި ދަތުރު ގޮސްފައިވަނީ ނިމިދިޔަ ހަފްތާގެ 5 މާރިޗުވީ ހޮނިހިރު ދުވަހުގައެވެ. ހީލާރސްގެ ހިންގާ ކޮމެޓީގެ މެމްބަރުންނާއި ހީލާރސް ކުރީގެ ބައެއް ލީޑަރުންގެ އިތުރުން 20 އަށް ވުރެ ގިނަ އައު ލީޑަރުންވަނީ މިދަތުރުގައި ބައިވެރި ވެފައެވެ.
މިދަތުރާއި ބެހޭ ގޮތުން ވާހަކަ ދައްކަވަމުން ހީލާރސްގެ ރައީސާ ހަސްނާ ވިޝާމް ވިދާޅުވީ މިއީ ހީލާރސްގެ ލީޑާރސް ގުރޫޕާއި ގުޅޭ ދަރިވަރުންނަށް ކުރިއަށް އޮތްތަނުގައި މިފަދަ ދަތުރުތައް ނުވަތަ ހާއްސަ ހަރަކާތެއް ސިލްސިލާގޮތެއްގައި ކުރިއަށް ގެންދިއުމުގެ ފެށުން ކަމުގައެވެ. އަދި އުންމީދަކީ މިފަދަ ހަރަކާތްތަކުގެ ސަބަބުން ކުރިއަށް އޮތްތަނުގައި ފަހަރަކަށް ވުރެ ފަހަރެއް ހީލާރސް އާއި ގުޅޭ ލީޑާރސް އިތުރުވުމެވެ.
މިދަތުރުގެ މައިގަނޑު މަގުސަދަކީ އައު ލީޑަރުންނާއި ހިންގާ ކޮމިޓީ މެންބަރުން އަދި ކުރީގެ ލީޑަރުންނާއި އޮތް ގުޅުން އިތުރަށް ބަދަހިކޮށް މަޖާ މާހައުލެއްގެ ތެރެއިން، ތަފާތު މީހުންނާ ގުޅިގެން މަސައްކަތްކުރާނެ ގޮތްތަކާއި، ޓީމް ޓީމެއް ގޮތުގައި މަސައްކަތް ކުރުމުގެ މުހިންމުކަން ފަދަ ، ކޮންމެހެން ރަނގަޅު ލީޑަރެއްގެ ގައިގައި ހުންނަންޖެހޭ ހުނަރުތައް ތަފާތު ގޭމްތަކުގެ ތެރެއިން ތަރައްގީ ކުރުމެވެ. ހަމަ އެހެންމެ ހީލާރސްގެ ފަރާތުން އައު ލީޑަރުންނަށް ބޭއްވުމަށް ހަމަޖެހިފައިވާ ލީޑާރސް ބައްދަލުވުން ވެސް ވަނީ މިދަތުރުގެ ތެރޭގައި ކުރިއަށް ގެން ގޮސްފައެވެ.
ދަތުރުގެ ފޯރިގަދަ މަޖާ ކުޅިވަރުތައް ފެށުމުގެ ކުރިން ހެދުނުގެ ނާސްތާއަށްފަހު މަޝްވަރާއާއި ހިޔާލުތައް ފާޅުކުރުމަށް ހާއްސަ ކުރެވުނު ވަގުތު ކޮޅުގައި ވަނީ ހީލާރސްގެ ކުރިއަށް ރޭވިފައި ހުރި ހަރަކާތްތަކާއި، އަދި ކުރިއަށް ގެންދެވިދާނެ ހަރަކާތްތަކާ ބެހޭގޮތުން ލީޑަރުންގެ ހިޔާލު ހޯދާފައެވެ.
ހުރިހާ ދަރިވަރުންވެސް ކިޔުވުމުގެ ކަންކަމުގައްޔާއި، ވަޒީފާ އަދި އަމިއްލަ ދިރިއުޅުމުގައި އަވަދިނެތި އެޅޭއިރު، ތާޒާ ހިޔާލު ހުށަހެޅުމާއި، މަޝްވަރާކޮށްލުމަށް ފަހި ފުރުސަތެއް މިދަތުރުގެ ސަބަބުން ވަނީ ފަހިވެގެންގޮސްފައެވެ. އެހެންކަމުން ހީލާރސް އިން ގަބޫލުކުރަނީ އައު ލީޑަރުންނަށް އަމާޒުކުރެވުނު މިދަތުރަކީ ވަރަށްވެސް ކާމިޔާބު ހަރަކާތެއް ގޮތުގައެވެ.
