އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތުގައި ބިޒްނަސް ސްކޫލް (ބީ.އެސް)، ފެކަލްޓީ އޮފް އެންޖީނިއަރިންގ، ސައިންސް އެންޑް ޓެކްނޮލޮޖީ (ފެސްޓް) އަދި ސެންޓަރ ފޯރ ފައުންޑޭޝަން ސްޓަޑީޒް (ސީ.އެފް.އެސް) ގެ ފިރިހެން ޓީމުން މުބާރާތުގެ ފެށުން ރަނގަޅުކޮށްފިއެވެ.
މުބާރާތުގެ ގްރޫޕް ބީގައި ހޮނިހިރު ދުވަހުގެރޭ ފެކަލްޓީ އޮފް ހެލްތު ސައިންސް (އެފް.އެޗް.އެސް) އާއި ވާދަކޮށް ބީ.އެސް އިން މެޗު ކާމިޔާބުކުރީ ތިން ސެޓަށް ގޮސްގެންނެވެ. ފޯރިގަދަ މި މެޗުގައި ބީ.އެސް އިން ފުރަތަމަ ސެޓު ކާމިޔާބުކުރީ 25-21 އިންނެވެ. ނަމަވެސް ދެވަނަ ސެޓުގައި އެފް.އެޗް.އެސްގެ ޓީމުން ވަނީ ކުޅުން ރަނގަޅުކޮށް 25-22 ގެ ނަތީޖާއަކުން އެ ސެޓު ކާމިޔާބު ކޮށްފައެވެ. މި މެޗުން ބީ.އެސް. މޮޅުވީ ފަހު ސެޓުގައި 15-08 ގެ ނަތީޖާއަކުން ކުރިހޯދައިގެންނެވެ.
މިއީ މުބާރާތުގައި މިހާތަނަށް ތިން ސެޓަށް ދިޔަ ފުރަތަމަ މެޗެވެ. މި މެޗުގެ މޮޅު ކުޅުންތެރިޔަކަށް ހޮވުނީ ބީ.އެސް ޓީމުގެ ޖާޒީ ނަންބަރު 19، އިބްރާހިމް ޝަރީފެވެ.
ހޮނިހިރު ދުވަހުގެރޭ ގްރޫޕް އޭގައި ވާދަކުރީ ސެންޓަރ ފޯރ މެރިޓައިމް ސްޓަޑީޒް (ސީ.އެމް.އެސްް) އާއި ފެސްޓުގެ ޓީމެވެ. މި މެޗު ފެސްޓުން ކާމިޔާބުކުރީ ސީދާ ދެސެޓުންނެވެ. މެޗުގެ ސެޓުތައް ފެސްޓުން ހޯދީ 25-12 އަދި 25-14 ގެ ނަތީޖާއަކުންނެވެ. މެޗުގެ މޮޅު ކުޅުންތެރިޔަކީ ފެސްޓުގެ ޖާޒީ ނަންބަރު 9، އުމަރު ފާރޫޤެވެ.
ފިރިހެން ޑިވިޝަނުގައި ހޮނިހިރު ދުވަހުގެރޭ ކުޅުނު ތިންވަނަ މެޗުގައި ވާދަކުރީ ސްކޫލް އޮފް ނަރސިންގ (އެސް.އެން) ގެ ޓީމާއި ސީ.އެފް.އެސްގެ ޓީމެވެ. މި މެޗުގެ ދެސެޓުވެސް ސީ.އެފް.އެސް އިން ކާމިޔާބުކުރީ 25-15 ގެ ނަތީޖާއަކުންނެވެ. މި މެޗުގައި މޮޅުކުޅުންތެރިޔާގެ މަގާމު ހާސިލްކުރީ ސީ.އެފް.އެސް ޓީމުގެ ޖާޒީ ނަންބަރު 11، އަހްމަދު އިޝާނެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތަކީ 2015 ވަނަ އަހަރުން ފެށިގެން ސިލްސިލާގޮތެއްގައި މެދުކެނޑުމެއްނެތި ކޮންމެ އަހަރަކު ބާއްވަމުން އަންނަ މުބާރާތެކެވެ. މިއަހަރު މި ބޭއްވެނީ މިފަދަ 8 ވަނަ މުބާރާތެވެ. މިއަހަރުގެ މުބާރާތުގެ ސްޕޮންސަރުންގެ ތެރޭގައި އީސްޓޭޓް ކޮންސްޓްރަކްޝަން ސޮލިއުޝަންސް، އެންޒީ، އޭވް އަދި އޮއޭސެސް ހިމެނެއެވެ. މުބާރާތުގެ ޕްރިންޓިންގ ޕާޓްނަރ އަކީ ކުލަ މޯލްޑިވްސް އެވެ. އަދި އޮންލައިން މީޑިއާ ޕާޓްނަރ އަކީ ސަން މީޑިއާ ގްރޫޕެވެ.
