ދަރިވަރުންގެ މެދުގައި ބާއްވާ ދެވަނައަށް އެންމެ ބޮޑު މުބާރާތުގެ ހަވަނަ ދުވަހުގެ އަންހެން ޑިވިޝަން މެޗުތަކުން ސްކޫލް އޮފް ނާރސިންގ (އެސް.އެން ) އަދި ސެންޓަރ ފޯ ފައުންޑޭޝަން ސްޓަޑީޒް (ސީ.އެފް.އެސް) މޮޅުވެއްޖެއެވެ.
ބުދަ ދުވަހުގެ ރޭ ކުޅުނު ފުރަތަމަ މެޗުން އެސް.އެން މޮޅުވީ ސީދާ ދެ ސެޓުގެ ނަތީޖާއަކުން ފެކަލްޓީ އޮފް އެޑިއުކޭޝަން (އެފް.އީ)އާ ވާދަކޮށްގެންނެވެ. އެސް.އެން އިން ސެޓުތައް ގެންދިޔައީ 25-13 އަދި 25-05 ންނެވެ. މި މެޗުގައި މޮޅުކުޅުންތެރިޔާގެ މަގާމު ހާސިލްކުރީ އެސް.އެންގެ ޖާޒީ ނަންބަރު 15، އާމިނަތު ސަމްހާއެވެ.
މިރޭގެ އަންހެން ޑިވިޝަންގެ ފަހު މެޗުގައި ބައްދަލުކުރީ ސީ.އެފް.އެސް އަދި ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް (އެފް.އެޗް.ޓީ.އެސް) އެވެ. ފުރަތަމަ ސެޓު 25-03 އިން ސީ.އެފް.އެސް ގެންދިޔައިރު ދެވަނަ ސެޓު ނަގާފައިވަނީ 25-05 ންނެވެ. މި މެޗުގައި މޮޅުކުޅުންތެރިޔާގެ މަގާމު ހާސިލްކުރީ ސީ.އެފް.އެސްގެ ޖާޒީ ނަންބަރު 17، މައިހާ އަލީއެވެ.
މިރޭގެ އަންހެން ޑިވިޝަން މެޗުތަކަށްފަހު ސެމީ ފައިނަލްގައި ވާދަކުރާނެ ޓީމުތައް ވަނީ ކަށަވަރުވެފައެވެ. އެގޮތުން ގްރޫޕް އޭގެ އެއްވަނަ ޓީމުގެ ގޮތުގައި އެސް.އެން އިން ސެމީ ފައިނަލަށް ދަތުރުކޮށްފައިވާއިރު، އެ ގްރޫޕްގެ ދެވަނަ ޓީމުގެ ގޮތުގައި ސެމީ ފައިނަލަށް ދިޔައީ ފެކަލްޓީ އޮފް ހެލްތު ސައިންސަސް (އެފް.އެޗް.އެސް) އެވެ. ގްރޫޕް ބީ އިން ސެމީ ފައިނަލަށް ދަތުރު ކުރީ އެމް.އެން.ޔޫ ބިޒްނަސް ސްކޫލާއި ސީ.އެފް.އެސް ކަމަށްވާއިރު، އެ ގްރޫޕްގެ އެއްވަނަ ޓީމު ކަނޑައެޅިގެންދާނީ ބުރާސްފަތިދުވަހުގެރޭ އެ ދެ ޓީމު ކުޅޭ މެޗަށްފަހު އެވެ. ކުރިން ކުޅުނު މި މެޗު އަލުން ކުޅެން ހިންގާ ކޮމިޓީން ނިންމާފައިވަނީ ކުރިން ކުޅުނު މެޗުގައި ޓީމުގައި ހިމެނުމަށް ޝަރުޠު ހަމަނުވާ ކުޅުންތެރިޔަކު އަރުވައިގެން އެމް.އެން.ޔޫ.ބީ.އެސް އިން ކުޅެފައިވާތީއެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތަކީ 2015 ވަނަ އަހަރުން ފެށިގެން ސިލްސިލާގޮތެއްގައި މެދުކެނޑުމެއްނެތި ކޮންމެ އަހަރަކު ބާއްވަމުން އަންނަ މުބާރާތެކެވެ. މިއަހަރު މި ބޭއްވެނީ މިފަދަ 8 ވަނަ މުބާރާތެވެ. މިއަހަރުގެ މުބާރާތުގެ ސްޕޮންސަރުންގެ ތެރޭގައި އީސްޓޭޓް ކޮންސްޓްރަކްޝަން ސޮލިއުޝަންސް، އެންޒީ، އޭވް އަދި އޮއޭސެސް ހިމެނެއެވެ. މުބާރާތުގެ ޕްރިންޓިންގ ޕާޓްނަރ އަކީ ކުލަ މޯލްޑިވްސް އެވެ. އަދި އޮންލައިން މީޑިއާ ޕާޓްނަރ އަކީ ސަން މީޑިއާ ގްރޫޕެވެ.
