ފެކަލްޓީ އޮފް އެންޖިނިއަރިންގ ސައިންސް އެންޑް ޓެކްނޮލޮޖީ (ފެސްޓު)ގައި ”ނެޓްއެކެޑް ރައިޑަރސް“ ނެޓްވޯރކިންގ މުބާރާތެއް ބޭއްވުމަށް ތައްޔާރީތައް ފަށައިފިއެވެ. މި މުބާރާތަކީ ދިވެހިރާއްޖޭގެ ޤައުމީ ޔުނިވަރސިޓީއާއި ފެސްޓުގައިވެސް ހިންގާ މިފަދަ ފުރަތަމަ މުބާރާތެވެ.
މުބާރާތުގައި ބައިވެރިވުމަށް ހުޅުވާލާފައިވަނީ 2021 ނުވަތަ 2022 ވަނަ އަހަރު ސިސްކޯ ނެޓްވޯރކިންގ އެކަޑަމީގެ ސިސްކޯ ސަރޓިފައިޑް ނެޓްވޯރކިންގ އެސޯސިއޭޓް (ސީ.ސީ.އެން.އޭ) 1 ނުވަތަ 2 ފުރިހަމަކޮށްފައިވާ ނުވަތަ ފުރިހަމަ ކުރަމުންދާ ފެސްޓުގެ ދަރިވަރުންނަށެވެ. އެމް.އެން.ޔޫގެ ފެސްޓަކީ މުޅި ރާއްޖޭގައިވެސް މި މާއްދާ ކިޔަވައިދޭ ހަމައެކަނި ރަސްމީ ތައުލީމީ އިދާރާއެވެ.
ފެސްޓުގައި ހިންގޭ މި މުބާރާތުން އެއްވަނަ އާއި ދެވަނަ ލިބޭ ދަރިވަރުންނަށް ސިސްކޯ އޭސިއާ-ޕެސިފިކް ޖަޕާން ނެޓްއެކެޑް ރައިޑަރސް މުބާރާތުގައި ދިވެހިރާއްޖެ ތަމްސީލުކުރުމުގެ ފުރުސަތު ލިބިގެންދާނެއެވެ.
މުބާރާތުގައި ބައިވެރިވުމަށް އެދި ފޯމު ހުށަހެޅުމުގެ ސުންގަޑީއަކީ 14 އޭޕްރީލް 2022 ވާ ބުރާސްފަތި ދުވަހުގެ ރޭގަނޑު 10:00 އެވެ. މުބާރާތް ހިންގުމަށް ހަމަޖެހިފައިވަނީ 21 އޭޕްރީލް 2022 ވާ ބުރާސްފަތި ދުވަހުއެވެ.
