ފެކަލްޓީ އޮފް ހެލްތް ސައިންސަސް (އެފް.އެޗް.އެސް) ގެ ގޮފި ހީލަރސް އަދި ފެކަލްޓީ އޮފް އިންޖިނިއަރިންގ ސައިންސް އެންޑް ޓެކްނޮލޮޖީ (ފެސްޓް) ގެ ގޮފި އެސްޓާއާ ގުޅިގެން ބޭއްވި ”ޔުރީކާ އެކްސްޕޯ 2022“ ކާމިޔާބު ކަމާއެކު ނިންމާލައިފިއެވެ.
31 އޮގަސްޓް ވީ ބުދަ ދުވަހު އެފް.އެޗް.އެސް ކޮންފަރެންސް ހޯލުގައި ބޭއްވި މި އެކްސްޕޯ ކުރިއަށް ގެންގޮސްފައިވަނީ ދެ ދަން ފަޅިއަކަށް ބަހާލައިގެންނެވެ.
ޔުރީކާ އެކްސްޕޯ ހުޅުވުމުގެ ރަސްމިއްޔާތު ހަމަ އެދުވަހު ހެނދުނު ކުރިއަށް ގެންގޮސްފައިވާއިރު، މިރަސްމިއްޔާތު ޝަރަފުވެރިކޮށްދެއްވީ ފެކަލްޓީ އޮފް ހެލްތު ސައިންސަސްގެ ޑީން ޑރ. އައިޝަތު ޝަނޫރާއެވެ. އަދި މީގެ އިތުރުން ދެ ފެކަލްޓީގެ ލެކްޗަރާއިންނާއި، ހީލަރސް އަދި އެސްޓާގެ ހިންގާކޮމެޓީގެ މެންބަރުންގެ އިތުރުން ގިނަ އަދަދެއްގެ ދަރިވަރުން ވަނީ ބައިވެރިވެފައެވެ. މިރަސްމިއްޔާތުގައި ވާހަކަ ދައްކަވަމުން އެފް.އެޗް.އެސްގެ ޑީން ޑރ. ޝަނޫރާ ވަނީ ހީލަރސް އާއި އެސްޓާ، މި ދެ ގޮފި ގުޅިގެން މިފަދަ ހަރަކާތެއް އިންތިޒާމު ކުރިކަމަށްޓަކައި ޝުކުރުއަދާ ކޮށްފައެވެ. އަދި ހަމައެހެންމެ ސްޓޯލްތައް ތައްޔާރުކުރުމަށް ދަރިވަރުންނާއި ލެކްޗަރާއިން ގުޅިގެން ކޮށްފައިވާ މަސައްކަތްތައް ފާހަގަ ކުރައްވާ ޝުކުރުދަންނަވާފައިވެއެވެ. މީގެ އިތުރުން ޑީންގެ ވާހަކަފުޅުގައި، ކުރިއަށް އޮތްތަނުގައި މިފަދަ އެކްސްޕޯ އެއް މިއަށްވުރެ ފުރިހަމައަށް އަދި މާ ކުލަގަދަކޮށް ބާއްވާނެކަމަށް އުންމީދުކުރައްވާކަމަށާއި، އަދި ވީހާވެސް ބޮޑަށް ރޭވުންތެރިކަމާއެކު މިފަދަ ހަރަކާތްތަކަށް ދުރާލާ ތައްޔާރީތައް ފެށުމަށް ހުރިހާ ދަރިވަރުންނަށް ވަނީ ނަސޭހަތްތެރިވެފައެވެ.
ވަރަށް ކުޑަ މުއްދަތެއްގައިވެސް ޔުރީކާ އެކްސްޕޯ ހަގީގަތަކަށް ހެދުމަށް އެކި ކޯސްތަކުގެ ދަރިވަރުން ކުރި ބުރަ މަސައްކަތް އަގުވަޒަން ކުރުމުގެ ގޮތުން ހީލާރސް އާއި އެސްޓާގެ ފަރާތުން ވަނީ ޔުރީކާ އެކްސްޕޯގައި ސްޓޯލްތައް ބައިވެރިކުރި ކޯސްތަކަށް ހަނދާނީލިޔުން ދީފައެވެ.
މަތީ ތައުލީމުދޭ ސްކޫލުތަކުގެ ދަރިވަރުންނާއި އާއްމުންނަށް ހުލުވާލައިގެން ބޭއްވުނު މިއެކްސްޕޯގައި މުޅި ޖުމުލަ 7 ސްޓޯލެއްވަނީ ބެހެއްޓިފައެވެ. އެއީ އެފް.އެޗް.އެސްގެ ފަރާތުން 4 ސްޓޯލާއި ފެސްޓްގެ ފަރާތުން 3 ސްޓޯލެވެ.
އެފް.އެޗް.އެސްގެ ފަރާތުން ބެހެއްޓުނު ސްޓޯލްތަކުގެ ތެރޭގައި ބެޗްލަރސް އޮފް ސައިކޮލަޖީ، ބެޗްލަރސް އޮފް ލެބޯރަޓެރީ ސައިންސް އެންޑް ޓެކްނޮލޮޖީ، ފަރމަސީ އަދި ފިޒިއޮތެރަޕީ ކިޔަވާ ދަރިވަރުން ތަމްސީލުކުރި ސްޓޯލްތައް ހިމެނެއެވެ. މީގެ އިތުރުން ފެސްޓުގެ ފަރާތުން ވަނީ ބެޗްލަރސް އޮފް ކޮމްޕިއުޓަރ ސައިންސް، ބެޗްލަރސް އޮފް އިންވަޔަރމެންޓް މެނޭޖްމެންޓް، ބެޗްލަރސް އޮފް މެރިން ސައިންސް އަދި ބެޗްލަރސް އޮފް އިންފޮމޭޝަން ޓެކްނޮލޮޖީ ގެ ދަރިވަރުން ހިއްސާވެގެން ސްޓޯލްތައް ބައިވެރި ކޮށްފައެވެ.
ޔުރީކާ އެކްސްޕޯގެ މައިގަނޑު މަގުސަދަކީ ފެކަލްޓީ އޮފް ހެލްތު ސައިންސަސް އާއި ފެކަލްޓީ އޮފް އިންޖިނިއަރިންގ ސައިންސް އެންޑް ޓެކްނޮލޮޖީ ގައި ކުރިއަށް ގެންދާ އެކިއެކި ކޯސްތަކުގެ މައުލޫމާތާއި، މި ކޯސްތަކުގައި ދަރިވަރުން އަމަލީގޮތުން ދަސްކުރާ އެކި ހުނަރުތަކާއި ކިޔެވުމަށް ބޭނުންކުރާ އާލާތްތަކާއި ވަސީލަތްތައް ދެއްކުމެވެ.
މި އެކްސްޕޯ އަށް ވަނީ އެކި ސްކޫލްތަކުގެ ދަރިވަރުންނަށް ވެސް ދައުވަތު ދެވިފައެވެ. ނަމަވެސް ދައުވަތު ދެވުނު ގިނަ ސްކޫލުތަކުގައި މި ދުވަސްވަރު އިމްތިހާނުތައް ކުރިއަށްދާތީ، އެކްސްޕޯގައި ރަސްމީކޮށް ބައިވެރިވެވޭގޮތް ނުވިނަމަވެސް، އެކި ސްކޫލުތަކުގެ ދަރިވަރުންނާއި އެމް.އެން.ޔޫގެ އެހެނިހެން ފެކަލްޓީތަކުން ގިނަ ދަރިވަރުންގެ ފަރާތުން ވަނީ މިއެކްސްޕޯއަށް ވަރަށް ބޮޑު ތަރުހީބެއް ލިބިފައެވެ.
ޔުރީކާ އެކްސްޕޯ އަކީ ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަންގެ ދެ ގޮފި ގުޅިގެން ބޭއްވި މިފަދަ ފުރަތަމަ އެކްސްޕޯއެވެ.
