ލެކްނޯ އެމް.އެން.ޔޫ.އެސް.ޔޫ ފުޓްސަލް ފިއެސްޓާގެ ހުކުރު ދުވަހުގެ ރޭ 08:00ގައި ކުޅުނު ފިރިހެން ޑިވިޝަންގެ މެޗުތަކުން މޯލްޑިވްސް ޕޮލިޓެކްނިކް އަދި އެމް.އެން.ޔޫ ބިޒްނަސް ސްކޫލު (އެމް.އެން.ޔޫ.ބީ.އެސް) މޮޅުވެއްޖެއެވެ.
ހުކުރު ދުވަހުގެ ރޭ 08:00ގައި ގްރައުންޑް 1 ގައި ކުޅުނު މެޗުގައި ބައްދަލުކޮށްފައިވަނީ މޯލްޑިވްސް ޕޮލިޓެކްނިކް އާއި ފެކަލްޓީ އޮފް އާރޓްސް (އެފް.އޭ) އެވެ. މި މެޗު 3-0ން ކާމިޔާބުކޮށްފައިވަނީ ޕޮލިޓެކްނިކެވެ. މެޗުގެ ގޯލުތައް ޕޮލިޓެކްނިކަށް ކާމިޔާބުކޮށްދިނީ ޖާރޒީ ނަންބަރު 7 އަލީ ސާހިލް މުހައްމަދާއި މެޗުގެ މޮޅު ކުޅުންތެރިޔާ ޕޮލިޓެކްނިކްގެ ޖާރޒީ ނަންބަރު 11 މުހައްމަދު ރާއިފް ފަޒީލެވެ. ރާއިފް ވަނީ މެޗުގައި 2 ގޯލު ޖަހާފައެވެ.
ހުކުރު ދުވަހުގެ ރޭ 08:00ގައި ގްރައުންޑް 2 ގައި ކުޅުނު މެޗުން އެމް.އައި ބަލިކޮށް އެމް.އެން.ޔޫ.ބީ.އެސް ކާމިޔާބުކޮށްފައިވަނީ 3-1 ގެ ތަފާތުންނެވެ. މެޗުގެ ފުރަތަމަ މިނެޓުގައި އެމް.އެން.ޔޫ.ބީ.އެސް ގެ ޖަރޒީ ނަންބަރު 11 މުހައްމަދު އަނާން ވަނީ ލަނޑެއް ކާމިޔާބުކޮށްފައެވެ. އެމް.އެން.ޔޫ.ބީ.އެސް އަށް ލީޑު ފުޅާކޮށްދިނީ މެޗުގެ 17 ވަނަ މިނިޓުގައި އެ ޓީމުގެ ޖަރޒީ ނަންބަރު 13 ޢަބްދުﷲ ރިމާހެވެ. މެޗުގެ 34 ވަނަ މިނިޓުގައި އެމް.އައި ކޮލެޖުގެ ޖަރޒީ ނަންބަރު 10 މުހައްމަދު މިދުހަތު ގޯލެއް ޖަހާ 2-1 އަށް ނަތީޖާ ބަދަލުކުރިއެވެ. ނަމަވެސް، މެޗުގެ މޮޅު ކުޅުންތެރިޔާ އެމް.އެން.ޔޫ.ބީ.އެސްގެ ޖަރޒީ ނަންބަރު 8 އަޙްމަދު ރިޔުޝާން ވަނީ އެމް.އެން.ޔޫ.ބީ.އެސް އަށް އިތުރު ގޯލެއް ކާމިޔާބުކޮށްދީފައެވެ.
ލެކްނޯ އެމް.އެން.ޔޫ.އެސް.ޔޫ ފުޓްސަލް ފިއެސްޓާގެ ޓައިޓްލް ސްޕޮންސަރަކީ އެމް.ޔޫ ސްޓޯރުން އެތެރެކުރާ ”ލެކްނޯ“ ބްރޭންޑެވެ. މުބާރާތުގެ ކޯ-ސްޕޮންސަރަކީ ޤައުމީ ޔުނިވަރސިޓީގެ ކުންފުނި ޔުނިވިޔަ ހޯލްޑިންގްސް އެވެ. ސަޕޯޓިންގ ޕާޓްނަރުންނަކީ މޯލްޑިވްސް ޓްރޭޑިންގ އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ)، މެންހަޓަން ބިޒްނަސް ހޮޓެލް، އޮންލައިން ނިއުސް ޢަދަދު، މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަމަންޓް އަދި ފުޓްބޯލް އެސޯސިއޭޝަން އޮފް މޯލްޑިވްސް (އެފް.އޭ.އެމް) އެވެ. ސްޕޯޓްސް ޕާޓްނަރަކީ ސޮނީ ސްޕޯޓްސް އެވެ. މުބާރާތުގެ ޑިޖިޓަލް ޕާޓްނަރަކީ ދިރާގު ކަމަށްވާއިރު، ކިޓް ޕާޓްނަރަކީ ޕްރިންޓް ކޯއެވެ. ޕްރިންޓިންގ ޕާޓްނަރަކީ އެމް ސެވަން އެވެ. އަދި އެސޯސިއޭޓިވް ޕާޓްނަރަކީ އަދަދު އޮންލައިންއެވެ.
އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ސާނަވީ ދާއިރާގައި ބާއްވާ އެންމެ ބޮޑު ކުޅިވަރު ޙަރަކާތެވެ. މި މުބާރާތް ރާވާ އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިންނެވެ. މި އަހަރު މި ބާއްވަނީ މީގެ 8 ވަނަ މުބާރާތެވެ. މިއަހަރުގެ މުބާރާތް މި ބޭއްވެނީ ކޮވިޑް-19ގެ ޢާލަމީ ވަބާއާއެކު 2 އަހަރުގެ މެދުކެނޑުމަކަށްފަހުއެވެ. އެންމެ ފަހުން 2019 ވަނަ އަހަރު ބޭއްވި މުބާރާތުގެ ފިރިހެން ޑިވިޝަނުގެ ޗެމްޕިއަނަކީ އެވިޑް ކޮލެޖެވެ. އަދި އަންހެން ޑިވިޝަނުގެ ޗެމްޕިއަނަކީ އެމް.އައި ކޮލެޖެވެ. މި މުބާރާތް އެންމެ ފުރަތަމަ ބޭއްވުނީ 2013 ވަނަ އަހަރެވެ. އެއަށްފަހު 2019 ވަނަ އަހަރާ ހަމައަށް މެދުކެނޑުމެއްނެތި ކޮންމެ އަހަރަކު މި މުބާރާތް ކުރިއަށް ގެންދެވިފައިވެއެވެ. މުބާރާތުގައި އަންހެން ޑިވިޝަން ތަޢާރަފު ކުރެވުނީ 2018 ވަނަ އަހަރެވެ. މި މުބާރާތުގެ އެންމެ ކާމިޔާބު ޓީމަކީ މުބާރާތުގެ ފިރިހެން ޑިވިޝަނުގެ ތަށި 3 ފަހަރު ޙާޞިލުކޮށްފައިވާ އެމް.އެން.ޔޫ ބިޒްނަސް ސްކޫލެވެ.
