ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ 11 ވަނަ ދައުރުގެ ހިންގާ ކޮމިޓީ، ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ)ގެ ވައިސް ޗާންސެލަރ ޑރ. މުޙައްމަދު ޝަރީފް އިފްތިތާހުކޮށްދެއްވައިފިއެވެ.
ޔޫނިއަންގެ ހިންގާ ކޮމިޓީ އިފްތިތާހުކޮށްދެއްވާފައިވަނީ އެކަމަށް ޚާއްސަކޮށް ހުކުރުދުވަހުގެރޭ އެމް.އެން.ޔޫގެ ސެންޓްރަލް އެޑްމިނިސްޓްރޭޝަން އޮޑިޓޯރިއަމްގައި ބޭއްވި ހަފްލާއެއްގައެވެ. މި ހަފްލާގައި ހިންގާ ކޮމިޓީ އިފްތިތާހު ކުރުމުގެ އިތުރުން، ދަރިވަރުންގެ ޔޫނިއަން އިންދޭ ހާއްސަ އިނާމުތައް ދިނުންވެސް ކުރިއަށް ދިޔައެވެ. އަދި ހަމަ އެހެންމެ، އެމް.އެން.ޔޫ.އެސް.ޔޫ ޕްރެޒެންޓްސް ދަ ނެކްސްޓް ލެވެލްގެ ނަތީޖާ ފާޅުކުރުމާއި، އެންމެ ހަރަކާތްތެރި ގޮފިތައް ހޮވުންވެސް ވަނީ ކުރިއަށް ގެންގޮސްފައެވެ.
މި ރަސްމިއްޔާތުގައި ވާހަކަ ދައްކަވަމުން ވައިސް ޗާންސެލަރ ވަނީ ޔުނިވަރސިޓީ ހަޔާތުގައި އިތުރު ހަރަކާތްތަކުގައި ބައިވެރިވުމުގެ މުހިއްމުކަން ފާހަގަ ކުރައްވާފައެވެ. އަދި އިތުރު ހަރަކާތްތަކުގައި އުޅުމަކީ ކިޔެވުމަށް ބުރޫ އަރަން ޖެހޭ ސަބަބެއް ނޫންކަމަށްވެސް ވައިސް ޗާންސެލަރ ޑރ. ޝަރީފް ފާހަގަކުރެއްވިއެވެ.
ދަރިވަރުންގެ ޔޫނިއަންގެ 11 ވަނަ ދައުރުގެ ހިންގާ ކޮމިޓީ:
- ރައީސް: ޙުސައިން ޒައިދު
- ނައިބު ރައީސް (އިތުރު ހަރަކާތް): މާޒިން މުޙައްމަދު
- ނައިބު ރައީސް (ގޮފިތައް): ޖައިޝް ޢަލީ ވަހީދު
- ނައިބު ރައީސާ (ޢިލްމީ): ނަޖީލާ މޫސާ ނަޢީމް
- ސެކްރެޓަރީ: ޒާޔާ ޙަސަން ޢިމްރާން
- ޚަޒާންދާރު: އަޙްމަދު ސަވާދު
- މީޑިއާ ކޯޑިނޭޓަރ: އާމިނަތު ޔާސްމީން މުޙައްމަދު
- އެސިސްޓެންޓް ސެކްރެޓަރީ: ފާޠިމަތު ނައުޝީން
ދަރިވަރުންގެ ޔޫނިއަންގެ 11 ވަނަ ދައުރުގެ ހިންގާ ކޮމިޓީއަށް ކުރިމަތިލުމަށް ހުޅުވާލާފައިވަނީ 2022 އޮކްޓޫބަރު 13ގައެވެ. މުއްދަތު ހަމަވިއިރު، ކޮންމެ މަޤާމަކަށްވެސް ކުރިމަތިލާފައިވަނީ އެންމެ ކެންޑިޑޭޓެއްކަމަށްވާތީ، އެ ކެންޑިޑޭޓުން ވަނީ އިންތިޚާބަކާނުލައި މަޤާމުތަކަށް ހޮވިފައެވެ.
