ދިވެހިރާއްޖޭގެ ގައުމީ ޔުނިވާސިޓީގެ، ސްކޫލް އޮފް މެޑިސިންއާއި އަލަށް ގުޅުނު ދަރިވަރުންނަށް އަމާޒުކޮށްގެން ”ފްރެޝާރސް ނައިޓް 2023“ ވަރަށް ކުލަގަދަކޮށް ބާއްވައިފިއެވެ.
މެޑިކޯސްގެ 2023 ވަނަ އަހަރުގެ ފްރެޝާރސް ނައިޓް ބާއްވާފައިވަނި މެޑިކޯސްގެ ހިންގާ ކޮމިޓީއާއި، ސްކޫލް އޮފް މެޑިސިންގެ ފަސްވަނަ ބެޗް ގުޅިގެންނެވެ. 2023 ވަނަ އަހަރު އަލަށް ގުޅުނު ދަރިވަރުންނަކީ އެ ފެކަލްޓީގެ ހަވަނަ ބެޗްގެ ދަރިވަރުންނެވެ.
މިރަސްމިއްޔާތުގައި ދަރިވަރުންނާ މުޚާތަބުކޮށް ވާހަކަދައްކަވަމުން، މެޑިކޯސްގެ ރައީސް އަނޫފް ޢަބްދުﷲ ވަނީ ކިޔެވުމުގައި ދެމިތިބުމަށް ހުރިހާ ކުދިންނަށް ހިތްވަރު ދެއްވާފައެވެ. މީގެ އިތުރުން އެމްއެންޔޫ ކައުންސިލްގެ މެމްބަރ މުހައްމަދު ގާނިމް ވަނީ ދަރިވަރުންނާ މުޚާތަބުކޮށް، އެމްއެންޔޫ އަދި އެމްއެންޔޫއެސްޔޫގައި ދަރިވަރުންނަށް ހުރި ފުރުސަތުތަކާ ބެހޭ ގޮތުން މަޢުލޫމާތު ދެއްވާފައެވެ.
މީގެ އިތުރުން އެމްއެންޔޫއެސްޔޫގެ މިދައުރުގެ ރައީސް ހުސައިން ޒައިދުވެސް ވަނީ ދަރިވަރުންނާ މުޚާތަބުކޮށް ވާހަކަދައްކަވާފައެވެ. ޒައިދުގެ ވާހަކަކޮޅުގައި ދަރިވަރުންނަށް ޔޫނިއަން ތެރެއިން ހުރި ފުރުސަތުތަކާއި, އިތުރު ހަރަކާތްތަކުގައި ބައިވެރިވުމުގެ މުހިންމުކަމަށް އަލިއަލުވާލާފައި ވެއެވެ.
މިރަސްމިއްޔާތުގައި، އެހެން އަހަރުތަކެކޭ ވެސް އެއްފަދައިން، ތަފާތު ގޭމެއްގެ ތެރެއިން، އަލަށް ގުޅުނު ދަރިވަރުންނަށް ’މެންޓަރ‘ އިން ކަނޑައަޅާފައިވެއެވެ. ’މެންޓަރ’އިންގެ ގޮތުގައި ކަނޑައަޅާފައިވަނީ 5ވަނަ ބެޗްގެ ދަރިވަރުންނެވެ. މިހަރަކާތުގެ މަގްސަދަކީ ދަރިވަރުންނަށް ކިޔެވުމާއި ޔުނިވާސިޓީ ހަޔާތުގެ އެހެން ކަންކަމުގައި އެހީވާނޭ ފަރާތެއް ކަނޑައެޅުމެވެ.
ރަސްމިއްޔާތު ނިންމާލުމުގެ ގޮތުން މުނިފޫހިފިލުވުމަށް ތަފާތު އެކި އެކި ގޭމްތަކާއި ހަރަކާތްތައް ކުރިޔަށް ގެންގޮސްފައި ވާއިރު، މިރަސްމިއްޔާތުގެ ބައިވެރީންނަށް ޚާއްސަކޮށް، ޚާއްސަ ފަރިއްކޮޅެއްވެސް ވަނީ އަރުވާފައެވެ. މިރަސްމިއްޔާތު ބޭއްވިގެން ދިޔައީ ސްކޫލް އޮފް މެޑިސިންގެ ކިޔެވުން ކުރިޔަށް ގެންދިޔުމަށް ޚާއްސަކުރެވިފައިވާ، ދަރުމަވަންތަ ހޮސްޕިޓަލްގެ 14 ވަނަ ފަންގިފިލާގައެވެ.
