މެޑިކޯސްގެ ފަރާތުން އިސްނަގައިގެން، މޯލްޑިވްސް ބްލަޑް ސާރވިސެސްއާ ގުޅިގެން ސިލްސިލާކޮށް ކުރިޔަށް ގެންދާ ބްލަޑް ޑްރައިވް ތަކުގެ ތެރެއިން މިއަހަރުގެ ފުރަތަމަ ކުއާޓަރގެ ބްލަޑް ޑްރައިވް، މާރިޗް 19 ވާ އާދިއްތަ ދުވަހު ބޭއްވުމަށް ނިންމައިފިއެވެ. މެޑިކޯސް އިން މިހަރަކާތް ކުރިޔަށް ގެންދަނީ ”ރޯލް އަޕް ޔުއަރ ސްލީވްސް- ސޭވް އަ ލައިފް“ މި ޝިޢާރުގެ ދަށުންނެވެ. މިހަރަކާތް އޮންނާނީ، މޯލްޑިވިއަން ބްލަޑް ސާރވިސް ގައެވެ.
މިހަރަކާތުގައި ބައިވެރިވުމުގެ ފުރުސަތުވަނީ އެމްއެންޔޫގެ ހުރިހާ ދަރިވަރުންނަށާއި މުވައްޒަފުންނަށް ވެސް ހުޅުވާލެވިފައެވެ. އާދިއްތަ ދުވަހުގެ 13:00 އިން 16:00 އަށް ކުރިޔަށް ދާ މިހަރަކާތުގައި ބައިވެރިވެވޭނީ އޮންލައިން ފޯމެއް މެދުވެރިކޮށް، ރަޖިސްޓްރީވުމަށް ފަހުގައެވެ.
ލޭހަދިޔާ ކުރުމަށް އަންނަ ކުދިންގެ ބަރުދަނުގައި މަދުވެގެން 45 ކިލޯގްރާމް ހުންނަން ޖެހެއެވެ. އަދި ލޭ ހަދިޔާ ކުރެވޭނީ އުމުރުން 18 އަހަރު ވެފައިވާ ކުދިންނަށެވެ. މީގެ އިތުރުން ލޭހަދިޔާކުރުމަށް އައުމުގެ ކުރިން، ރަނގަޅަށް ކައިގެން ހުރުމަކީވެސް މެޑިކޯސްގެ އިލްތިމާސެކެވެ.
މިހަރަކާތް މެޑިކޯސްއިން ކުރިޔަށް ގެންދާތާ މިއީ ދެވަނަ އަހަރެވެ. ނިމިދިޔަ 2022 ވަނަ އަހަރުގެ ތެރޭގައި މިފަދަ 3 ބްލަޑް ޑްރައިވްއެއް ވަނީ މެޑިކޯސްއިން އިންތިޒާމްކޮށްގެން ބާއްވާފައެވެ. މިހަރަކާތް ކުރިޔަށް ގެންދިޔުމުގައި އެމްބީއެސްގެ ފަރާތުން ލިބޭ އެހީތެރިކަން ފާހަގަކޮށް، މެޑިކޯސްގެ ފަރާތުން އެކަމަށް ޝުކުރު އަދާކުރެއެވެ.
