އެމް.އެން.ޔޫ.އެސް.ޔޫ ބެޑްމިންޓަން މުބާރާތް 2023 ގައި ފެކަލްޓީ އޮފް ހެލްތު ސައިންސަން އިން ކުޅުނު ހުރިހާ ސެޓެއް ކާމިޔާބުކޮށް، ފެކަލްޓީ އޮފް އިންޖިނިއަރިންގ، ސައިންސް އެންޑް ޓެކްނޮލޮޖީގެ މައްޗަށް ކުރިހޯދައިފިއެވެ.
އެޕްރީލް 6 ވަނަ ދުވަހު ހަވީރު ކުޅުނު މި ޓައިގެ އަންހެން ޑަބަލްސް ގައި އެފް.އެޗް.އެސްގެ ޢާއިޝަތު ނައިޚާ އަދި ޢާއިޝަތު އުލްޔާ ވަހީދުގެ ޕެއާ ވަނީ ފެސްޓުގެ އީމާން އަހުމަދު އަދި ޢާއިޝަތު އަނާ އިބްރާހީމްގެ ޕެއާ 15-05 އަދި 15-12 އިން ބަލިކޮށްފައެވެ.
ފިރިހެން ސިންގަލްސްގައި އެފް.އެޗް.އެސް އިން ކުޅުނީ ހުމައިދު ހަސަން އެވެ. ފެސްޓުގެ ޝަފާޒް ނަޖީބާ ވާދަކޮށް މި މެޗުގެ ސެޓުތައް ހުމައިދު ގެންދިޔައީ 15-13 އަދި 15-12 އިންނެވެ.
ފިރިހެން ޑަބަލްސްގައި އެފް.އެޗް.އެސް އިން ކުޅެން އެރީ އިސްމާޢީލް ޖަޒްލާން އަދި މުޙައްމަދު ޖުމާން އެވެ. ފެސްޓުން ކުޅެން އެރި އާސިރު ޢަބްދުއްޞަމަދު އަދި އިބްރާހީމް ފައިރޫޝް ފައިޞަލްގެ ޕެއާގެ މައްޗަށް އެފް.އެޗް.އެސް އިން ކުރިހޯދީ 15-05 އަދި 15-09 އިންނެވެ.
މި ޓައިގެ އަންހެން ސިންގަލްސްގައި އެފް.އެޗް.އެސް އިން ކުޅުނީ ފާޠިމަތު ޒިޔާނެވެ. ޒިޔާން މެޗު ކާމިޔާބު ކުރީ 15-11 އަދި 15-08 ން ސެޓުތައް ކާމިޔާބުކޮށްގެންނެވެ. ފެސްޓުން މި މެޗުގައި ކުޅުނީ މަރިޔަމް ރިޝްމީ ޢަލީ އެވެ.
ފަހު މެޗުކަމަށްވާ މިކްސްޑް ޑަބަލްސްގައި އެފް.އެޗް.އެސް އިން ކުޅުނީ މުޙައްމަދު ސާހިލް ޢަލީ އަދި އާމިނަތު ޝައިހާ އެވެ. މި ޕެއާ އިން ފެސްޓުގެ ޙަސަން ޝާން މުޙައްމަދު އަދި މަރިޔަމް އިއުފާ ނަޖީބްގެ ޕެއާގެ މައްޗަށް ކުރިހޯދީ 15-06 އަދި 15-14 އިންނެވެ.
މި މުބާރާތުގައި ކުޅުމަށް ހަމަޖެހިފައިވަނީ ހަމައެކަނި ޓީމު އިވެންޓްގެ މެޗުތަކެވެ. މިއީ އެމް.އެން.ޔޫ.އެސް.ޔޫ އިން ބާއްވާ ފުރަތަމަ ބެޑްމިންޓަން މުބާރާތެވެ. މުބާރާތުގެ ހުރިހާ މެޗެއް ކުޅުމަށް ހަމަޖެހިފައިވަނީ އެމް.އެން.ޔޫ ޕީ.އީ ހޯލުގައި ކަމަށްވާއިރު، މުބާރާތް ކުރިއަށް ދާނީ އެޕްރީލު މަހުގެ 06 ން 13 އަށެވެ. މި މުބާރާތް ކުރިއަށް ގެންދެވެނީ ބެޑްމިންޓަން އެސޯސިއޭޝަން އޮފް ދަ މޯލްޑިވްސްގެ ފުރިހަމަ އެހީތެރިކަމާއެކުގައެވެ.
