ހަތަރުވަނަ މެޗުންވެސް އެމް.އެން.ޔޫ.ބީ.އެސް މޮޅުވެއްޖެ!

އެމް.އެން.ޔޫ.އެސް.ޔޫ ބެޑްމިންޓަން މުބާރާތް 2023ގައި އެމް.އެން.ޔޫ ބިޒްނަސް ސްކޫލް (އެމް.އެން.ޔޫ.ބީ.އެސް) އިން ކުޅުނު ހަތަރުވަނަ މެޗުގައި ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް (އެފް.އެޗް.ޓީ.އެސް) ބަލިކޮށްފިއެވެ.

މި މެޗުގެ އަންހެން ޑަބަލްސްގައި އެމް.އެން.ޔޫ.ބީ.އެސް އިން ކުޅެން ނިކުތީ ފާޠިމަތު ހަޔާއު މުޙައްމަދު އަދި މަރިޔަމް ޝަފާ ފާއިޒުގެ ޕެއާ އެވެ. މި ޕެއާ އިން ގޭމު ކާމިޔާބު ކުރީ 15-5 އަދި 15-14 އިން ސެޓުތައް ގެންގޮސްގެންނެވެ. މި ގޭމުގައި އެފް.އެޗް.ޓީ.އެސް އިން ކުޅުނީ ޢާއިޝަތު ޒާޝާ ޝާފީ އަދި ޢާއިޝަތު ޒުހާ ފަހުމީގެ ޕެއާ އެވެ.

ފިރިހެން ސިންގަލްސް ގޭމު އެމް.އެން.ޔޫ.ބީ.އެސްގެ އަޙްމަދު ސާޖިދު މުޙައްމަދު ޠަލާލް ކާމިޔާބުކުރީ 15-3 އަދި 15-7 ން ސެޓުތައް ގެންގޮސްގެންނެވެ. މި ގޭމުގައި އެފް.އެޗް.ޓީ.އެސް އިން ކުޅުނީ އަޙްމަދު ޢަބްދުއްރަޝީދެވެ.

މެޗުގެ ފިރިހެން ޑަބަލްސް ގޭމު ކާމިޔާބުކޮށްފައިވަނީ އެފް.އެޗް.ޓީ.އެސްގެ ދައިސަމް ޢަލީ އަދި މުޙައްމަދު އުލްވާންގެ ޕެއާ އެވެ. މި ގޭމުގެ ފުރަތަމަ ސެޓު އާދަމް ރާއިފް އަދި މުޙައްމަދު ނާފް ޢަބްދުﷲ ނަޢީމްގެ ޕެއާ އިން 15-11 ން ގެންގޮސްފައިވަނިކޮށް އެފް.އެޗް.ޓީ.އެސް އިން ވަނީ ދެން ކުޅުނު ދެ ސެޓު 15-10 އަދި 15-8 ން ކާމިޔާބުކޮށް މި ގޭމުން މޮޅުވެފައެވެ.

މި މެޗުގެ އަންހެން ސިންގަލްސް ގޭމު އެމް.އެން.ޔޫ.ބީ.އެސްގެ މަރިޔަމް ނިހާ ކާމިޔާބުކުރީ ފަސޭހަކަމާއެކު 15-4 އަދި 15-1 ން ސެޓުތައް ގެންގޮސްގެންނެވެ. މި ގޭމުގައި އެފް.އެޗް.ޓީ.އެސް އިން ކުޅުނީ ފާޠިމަތު ހަޔާމް އިބްރާހީމް ސަޢީދެވެ.

މި މެޗުގެ ފަހު ގޭމުކަމަށްވާ މިކްސްޑް ޑަބަލްސް ގޭމު ކާމިޔާބު ކުރީ އެމް.އެން.ޔޫ.ބީ.އެސްގެ އަޙްމަދު ސަމީހު އަދި ޝާލިޔާ އަޙްމަދުގެ ޕެއާ އެވެ. މި ޕެއާ އިން މި ގޭމުގެ ސެޓުތައް ގެންދިޔައީ 15-1 އަދި 15-5ގެ ނަތީޖާ އަކުންނެވެ. މި ގޭމުގައި އެފް.އެޗް.ޓީ.އެސް އިން ކުޅެފައިވަނީ އިބާން ޝާހިދު ޔޫސުފް އަދި ޢާއިޝަތު އުލްފާ މުޙައްމަދުގެ ޕެއާ އެވެ.

މި މުބާރާތުގައި ކުޅުމަށް ހަމަޖެހިފައިވަނީ ހަމައެކަނި ޓީމު އިވެންޓްގެ މެޗުތަކެވެ. މިއީ އެމް.އެން.ޔޫ.އެސް.ޔޫ އިން ބާއްވާ ފުރަތަމަ ބެޑްމިންޓަން މުބާރާތެވެ. މުބާރާތުގެ ހުރިހާ މެޗެއް ކުޅުމަށް ހަމަޖެހިފައިވަނީ އެމް.އެން.ޔޫ ޕީ.އީ ހޯލުގައި ކަމަށްވާއިރު، މުބާރާތް ކުރިއަށް ދާނީ އެޕްރީލު މަހުގެ 06 ން 13 އަށެވެ. މި މުބާރާތް ކުރިއަށް ގެންދެވެނީ ބެޑްމިންޓަން އެސޯސިއޭޝަން އޮފް ދަ މޯލްޑިވްސްގެ ފުރިހަމަ އެހީތެރިކަމާއެކުގައެވެ.