އެމް.އެން.ޔޫ.އެސް.ޔޫ ބެޑްމިންޓަން މުބާރާތް 2023 ގެ ފައިނަލު މެޗުގައި ސެންޓަރ ފޯ ފައުންޑޭޝަން ސްޓަޑީޒް (ސީ.އެފް.އެސް) ބަލިކޮށް މުބާރާތުގެ ތަށި ފެކަލްޓީ އޮފް އެޑިއުކޭޝަން (އެފް.އީ) އިން އުފުލާލައިފިއެވެ.
އެޕްރީލް 13 ވީ ބުރާސްފަތި ދުވަހުގެރޭ ކުޅުނު ފައިނަލް މެޗުގެ އަންހެން ޑަބަލްސް ގޭމު ކާމިޔާބު ކުރީ ސީ.އެފް.އެސް އިންނެވެ. މި ގޭމު ސީ.އެފް.އެސް އިން ގެންދިޔައީ ދެ ސެޓު އެއް ސެޓުންނެވެ. މި ގޭމުގެ ފުރަތަމަ ސެޓު ސީ.އެފް.އެސްގެ ނުސްރާ ސަޢީދު އަދި ޢާއިޝަތު މާހާ ނަސީމްގެ ޕެއާ އިން 15-6ން ކާމިޔާބުކޮށްފައިވަނިކޮށް ދެވަނަ ސެޓު އެފް.އީގެ ފާޠިމަތު ރާޔާ ޝާހިދު އަދި ޢާއިޝަތު ޝަދާ ޢަބްދުލްޣަނީގެ ޕެއާ އިން ވަނީ 15-12ން ކާމިޔާބުކޮށްފައެވެ. މި ގޭމުގެ ނަތީޖާ ނެރުމަށް ކުޅުނު ތިންވަނަ ސެޓު ސީ.އެފް.އެސް އިން ކާމިޔާބުކުރީ 15-13ންނެވެ.
ފިރިހެން ސިންގަލްސް ގޭމުގައި ސީ.އެފް.އެސްގެ ޒައިން ޢަބްދުﷲ ޖަމީލު ފުރަތަމަ ސެޓު 15-13ން ކާމިޔާބު ކޮށްފައިވަނިކޮށް އެފް.އީގެ ރުބެން ސިންގު ވަނީ ދެވަނަ ސެޓު 15-10ން އަދި ތިންވަނަ ސެޓު 15-11ން ކާމިޔާބުކޮށްފައެވެ.
ފިރިހެން ޑަބަލްސް ގޭމު އެފް.އީގެ އަޙްމަދު އަލީ އަދި މުޙައްމަދު ސާއިހު އަޙްމަދު ޝިހާމްގެ ޕެއާ އިން ކާމިޔާބު ކުރީ 15-8 އަދި 15-11ން ސެޓުތައް ގެންގޮސްގެންނެވެ. މި ގޭމުގައި ސީ.އެފް.އެސް އިން ކުޅުނީ ޢަލީ ނަވީހު އަދި މުޙައްމަދު އަނޫފް އިބްރާހީމްގެ ޕެއާ އެވެ.
އަންހެން ސިންގަލްސް ގޭމުގެ ފުރަތަމަ ސެޓު އެފް.އީގެ މަރިޔަމް ނަބާހާ ނަސީމް 15-5ން ގެންދިޔައިރު، ދެވަނަ ސެޓުގެ ނަތީޖާ 8-2ގައި އޮއްވާ ސީ.އެފް.އެސްގެ ނަދާ އިސްމާޢީލު ވަނީ ގޭމު ދޫކޮށްލާފައެވެ.
މުބާރާތުގެ ޗެންޕިއަންކަން އެފް.އީ ހޯދިއިރު ރަނަރއަޕް ޓީމަކީ ސީ.އެފް.އެސް އެވެ. ތިންވަނަ ލިބިފައިވަނީ އެމް.އެން.ޔޫ.ބީ.އެސް އަދި އެސް.އެމް އަށެވެ.
މި މުބާރާތުގައި ކުޅުމަށް ހަމަޖެހިފައިވަނީ ހަމައެކަނި ޓީމު އިވެންޓްގެ މެޗުތަކެވެ. މިއީ އެމް.އެން.ޔޫ.އެސް.ޔޫ އިން ބާއްވާ ފުރަތަމަ ބެޑްމިންޓަން މުބާރާތެވެ. މުބާރާތުގެ ހުރިހާ މެޗެއް ކުޅުމަށް ހަމަޖެހިފައިވަނީ އެމް.އެން.ޔޫ ޕީ.އީ ހޯލުގައި ކަމަށްވާއިރު، މުބާރާތް ކުރިއަށް ދާނީ އެޕްރީލު މަހުގެ 06 ން 13 އަށެވެ. މި މުބާރާތް ކުރިއަށް ގެންދެވެނީ ބެޑްމިންޓަން އެސޯސިއޭޝަން އޮފް ދަ މޯލްޑިވްސްގެ ފުރިހަމަ އެހީތެރިކަމާއެކުގައެވެ.
